STORI BLONG FRAN PEJ | ?PAOA BLONG MAJIK I KAM WEA?
!Majik i Gat Paoa Long Man!
“Naoia ol muvi mo ol buk oli no soem tumas ol vampaea, wulfman mo devel blong dedman, be oli soem moa ol man we ol rabis spirit oli kontrolem olgeta.” —Niuspepa ya The Wall Street Journal.
TEDE plante buk, muvi, mo video gem oli tokbaot ol man blong majik, ol wij mo ol vampaea. ?Ol samting ya oli save mekem wanem long ol man?
Claude Fischer, wan man blong stadi long laef blong ol man, i talem se: “Naoia plante man long Amerika oli bilif moa long ol gos i bitim ol yia bifo.” Hem i gohed i se: “Plante yangfala mo olfala oli talem se oli stap go luk ol kleva, mo oli bilif se i gat ol ples we ol gos oli stap long hem.”
Naoia i gat ol stori we oli tokbaot ol rabis spirit we oli stap kontrolem ol man mo oli stap mekem ol man oli fraet. Michael Calia i raetem long magasin ya The Wall Street Journal se: “Tede ol stori blong ol devel, wulfman mo vampaea, oli gat paoa long sam kastom we plante man oli save long hem, we oli joen wetem wok blong rabis spirit.”
Wan ripot i talem se “i gat samwe long 25 kasem 50 pesen blong ol man long wol oli bilif long ol gos, mo tu i gat ol buk we oli tokbaot stori blong ol gos we i stap long plante kalja blong ol man.” Mo wan risej we Christopher Bader mo Carson Mencken i mekem long Yunaeted Stet i soemaot se “i gat 70 kasem 80 pesen blong ol man Amerika we oli bilif strong long wok blong majik.”
?Olsem wanem? ?Wok blong ol rabis spirit mo majik i wan samting blong harem gud nomo?
Supernatural: Something that is “unable to be explained by science or the laws of nature.”—Merriam-Webster’s Learner’s Dictionary.