Faenem Stret Rod

?YU YU GLAD? ?Sipos yes, wanem i mekem yu yu glad? ?Famle blong yu, wok blong yu, bilif blong yu? Maet yu stap tingbaot wan samting we bambae i mekem yu yu glad, olsem finisim skul, kasem wan gudfala wok, o pem wan niufala trak.

Plante man oli glad taem oli kasem samting we oli wantem. ?Be glad olsem i save stap longtaem? Plante taem, glad ya i blong smoltaem nomo, be biaen oli harem nogud.

Sam diksonari oli talem se man we i glad, klosap oltaem i harem gud, samtaem hem i harem gud smol, samtaem i harem gud bitim mak, mo hem i wantem se laef i gohed olsem.

Mo tu, glad i no dipen long samting we yumi kasem long laef, be i dipen long fasin blong laef blong yumi. I nogud yumi talem se: “Bambae mi glad sipos mi kasem . . . o mi mekem . . . ” Man olsem i stap go longwe moa long glad.

Traem skelem glad wetem gudfala helt. ?Olsem wanem blong gat gudfala helt? Yumi lukaotgud long kakae, yumi eksasaes, mo yumi mekem laef blong yumi i stap klin. Ale, ?olsem wanem blong glad? Yumi folem ol stret fasin mo stret rul long laef blong yumi.

?Wanem ol rul mo fasin we yu mas folem blong yu save glad? I gat sam we oli moa impoten i bitim ol narawan. Hemia sam long olgeta:

• GLAD LONG SAMTING WE YU GAT MO GIVIM PRESEN

• HELT MO STRONG TINGTING

• LAV

• FOGIVIM NARAFALA

• KASEM SAVE FROM WANEM YUMI LAEF

• HOP

Wan buk blong ol waestok i talem se: “Ol man we laef blong olgeta i stret . . . bambae oli save harem gud.” (Ol Sam 119:1) Naoia bambae yumi tokbaot samting ya.