Taem Kingdom Blong God i Rul, Ol Man Bambae Oli “Gat Gudfala Laef”

I no longtaem, Kingdom ya we God i stanemap mo yumi stap wet long hem, bambae i putum pis long fulwol mo ol man bambae oli joen gud. Ol Sam 72:7 i talem se ol man bambae oli “gat gudfala laef.” ?Be wetaem Kingdom ya bambae i kam? ?Wanem bambae i hapen long taem ya? ?Mo olsem wanem yu yu save kasem blesing from rul blong Kingdom ya?

?WETAEM KINGDOM BLONG GOD BAMBAE I KAM?

Baebol i talemaot plante bigfala trabol we oli mekemap wan “saen” blong soemaot se i no longtaem Kingdom blong God bambae i kam. I gat faet long fulwol, hanggri, sik, graon i seksek bigwan, mo ol fasin blong brekem loa oli kam antap.—Matiu 24:3, 7, 12; Luk 21:11; Revelesen 6:2-8.

Wan narafala profet tok i talem se: ‘Long ol las dei, laef bambae i strong tumas mo bambae i had blong winim ol trabol. Bambae ol man oli tingbaot olgeta nomo, oli laekem mane tumas, oli no obei long papa mo mama blong olgeta, oli no save talem tangkiu, oli no gat fasin blong holemstrong long ol narafala, oli no gat sore, oli no wantem lesin long narafala, oli spolem nem blong narafala, oli no save bos long tingting blong olgeta, oli wael olgeta, oli no laekem ol gudfala fasin, oli flas, mo oli laekem moa ol samting we oli save harem gud long hem i bitim we oli lavem God.’ (2 Timoti 3:1-4) Longtaem finis i kam, i gat sam man we oli mekem ol fasin ya. Be naoia, klosap olgeta man oli mekem.

Ol profet tok ya oli stat blong kamtru long yia 1914. Ol man blong raetem histri, ol haeman, mo ol man blong raetem ol buk, oli tokbaot olsem wanem wol ya i jenis afta long 1914. Wan man Denmak we i raetem histri, nem blong hem Peter Munch, i talem se: “Taem bigfala faet i stat long 1914, wol i jenis. Bifo long taem ya, i luk olsem se wol i stap kam gud moa, . . . be afta, i gat ol disasta, trabol, fasin agens, mo ol man oli fraet mo harem se oli no moa sef.”

Be yumi save glad, from we ol trabol ya oli soemaot se yumi stap klosap nomo long taem ya we Kingdom blong God bambae i rulum fulwol. Hemia wan gud nius ya. Mo Jisas i talem se klosap long en, “ol man bambae oli talemaot gud nius ya blong Kingdom long olgeta ples long wol, blong oli witnes long olgeta neson, nao biaen en bambae i kam.”—Matiu 24:14.

Ol Witnes blong Jehova oli stap talemaot gud nius ya blong Kingdom blong God. Nem blong magasin blong olgeta se, Wajtaoa i Talemaot Kingdom Blong Jehova. Mo magasin ya i tokbaot ol nambawan blesing we Kingdom blong God bambae i mekem i kamtru long ol man mo wol ya.

?WANEM BAMBAE I HAPEN TAEM KINGDOM I KAM?

Traem tingbaot fo impoten samting ya:

1. Kingdom ya bambae i no yusum eni lida blong politik blong wol ya.

2. Ol lida blong politik bambae oli no wantem lego paoa blong olgeta, taswe bambae oli faet agensem Kingdom blong God.—Ol Sam 2:2-9.

3. Kingdom ya bambae i spolem ol politik paoa blong wol ya. (Daniel 2:44; Revelesen 19:17-21) Bigfala faet ya we i laswan long wol, nem blong hem se Amagedon.—Revelesen 16:14, 16.

4. Olgeta we oli obei long Kingdom blong God bambae oli gotru long Amagedon mo stap long pis long niufala wol. Olgeta ya oli “bigfala hip blong ol man,” we maet oli plante milian. —Revelesen 7:9, 10, 13, 14.

?OLSEM WANEM YU YU SAVE KASEM BLESING FROM RUL BLONG KINGDOM?

Blong stap aninit long Kingdom blong God, fastaem yu mas kasem save. Jisas i prea se: “Laef ya we i no save finis, hemia se man i gohed blong save yu we yu nomo yu tru God, mo i save Jisas Kraes we yu yu sanem hem i kam.”—Jon 17:3.

Taem ol man oli save gud Jehova God, oli kasem plante blesing. Traem tingbaot tufala blesing ya: Faswan se, bilif blong olgeta long God i kam strong moa. Bilif ya we i stanap long ol trufala samting, i mekem tingting blong olgeta i strong se Kingdom blong God i wan prapa gavman mo bambae i kamtru i no longtaem. (Hibrus 11:1) Seken blesing se, oli lavem God mo ol man raonabaot long olgeta. Taem oli lavem God, oli wantem obei long hem wetem fulhat blong olgeta. Taem oli lavem ol man, oli folem tok ya blong Jisas, se: “Fasin we yufala i wantem blong ol narafala oli mekem long yufala, yufala i mas mekem long olgeta.”—Luk 6:31.

Olsem wan papa we i lavem ol pikinini blong hem, God i wantem se yumi gat wan gudfala laef. Hem i wantem se yumi kasem samting we Baebol i kolem “laef ya we i prapa wan.” (1 Timoti 6:19) Tede yumi no gat “laef ya we i prapa wan.” Plante milian man oli gat wan laef we i had, mo oli traehad evri dei blong kasem ol samting we oli nidim blong laef. Blong kasem save long “laef ya we i prapa wan,” traem tingbaot sam nambawan samting we Kingdom blong God bambae i mekem long ol man.