1. ?God Nao I Mekem Yumi Safa?

?From Wanem i Impoten?

Plante man oli ting se yumi safa from we God i wantem olsem.

Traem Tingbaot

Plante lida blong skul oli talem stret o oli givim tingting se God nao i mekem yumi safa. Samfala oli talem olsem:

God i mekem ol disasta blong panisim ol man.
Ol pikinini oli ded from we God i nidim sam moa enjel long heven.
God i stap wetem ol ami, nating se faet i mekem ol man oli safa tumas.

?Be yu ting se maet ol lida blong ol skul ya oli stap giaman long saed blong God? ?Olsem wanem sipos God i no agri long olgeta?

BLONG SAVE MOA

Wajem video ya ?From Wanem Yu Mas Stadi Baebol? long jw.org.

Samting We Baebol i Talem

I no God we i mekem yumi safa.

Baebol i soemaot se fasin blong hem i defren olgeta, i se:

“[God] i stret olwe nomo. . . . Oltaem hem i stap mekem ol samting we i stret.”—DUTRONOME 32:4.

“!God i gat olgeta paoa! ?Yufala i ting se hem i save mekem samting we i no stret?”—JOB 34:10.

“!God ya, hem i no save mekem wan samting we i no stret!”—JOB 34:12.

God i no glad long ol skul we oli giaman long saed blong hem.

Hemia i minim ol skul we oli tijim se God nao i mekem yumi safa, wetem ol skul we oli joen long faet mo raf fasin.

“Ol profet ya oli stap yusum nem blong mi [God], be oli giaman nomo. Mi mi no sanem olgeta i kam, mo mi no givim tok long olgeta blong oli kam talemaot. Mo ol vison ya we oli stap tokbaot long yufala, mi mi no soemaot long olgeta nating. Ol samting ya we oli stap talem se bambae i kamtru, hemia i tingting blong olgeta nomo.”—JEREMAEA 14:14.

Jisas i agensem ol skul we oli gat tu fes.

“I no evri man we oli stap singaot mi se ‘Masta, Masta,’ we bambae oli go insaed long Kingdom blong heven. Olgeta nomo we oli stap mekem samting we Papa blong mi long heven i wantem, bambae oli go. Long dei ya, plante man bambae oli talem long mi se: ‘Masta, Masta, long nem blong yu, mifala i stap talemaot ol profet tok, . . . mifala i stap ronemaot ol rabis spirit, mo . . . mifala i mekem plante merikel, ?olsem wanem long mifala?’ Be bambae mi mi talem long olgeta se: ‘!Mi mi no save yufala! !Yufala i gowe long mi, yufala i man blong brekem loa!’” —MATIU 7:21-23.