4. ?Hem I Plan Blong God Se Yumi Safa?

?From Wanem i Impoten?

Ansa blong kwestin ya i save jenisim tingting blong yumi long saed blong laef.

Traem Tingbaot

Long tingting blong yu, ?God ya we i wokem ol naesfala samting long wol, bambae i wantem se yumi safa?

Taem sam man oli safa, oli tingting nogud long God, o maet oli ting se i no gat God. Oli bilif se ol man oli safa from we: (1) God i no gat paoa blong blokem, (2) God i no kea, o (3) I no gat God.

?I gat wan narafala risen bakegen?

Samting We Baebol i Talem

God i no wokem yumi blong yumi safa.

Hem i wantem se yumi harem gud long laef.

“I gud yumi evriwan i gohed, yumi stap kakae, mo yumi stap dring, mo yumi stap glad long ol samting ya we yumi stap hadwok long hem, from we ol samting ya oli kam long God nomo.”—PRIJA 3:12, 13.

God i givim evri samting blong Adam mo Iv i gat wan gudfala laef.

I no plan blong God se tufala mo ol pikinini blong tufala oli safa.

“[God] i talem long tufala se, ‘I gud yutufala i gat plante pikinini blong yutufala, blong olgeta we bambae oli kamaot biaen long yutufala, bambae oli save go stap long olgeta ples long wol. Nao bambae yufala i save mekem evri samting long wol ya oli stap aninit long han blong yufala.’”—JENESIS 1:28.

Be tufala i no wantem obei long God.

From samting ya, tufala i safa mo ol pikinini blong tufala tu oli safa.

“Wan man nomo i mekem se sin i kam long wol, mo ded i kamaot from sin. Mo ded i kasem olgeta man from we olgeta evriwan oli mekem sin.”—ROM 5:12.a

God i no mekem yumi blong yumi folem prapa tingting blong yumi.

Taem man i traem blong bos long laef blong hem wan, hemia i olsem we hem i traem blong laef aninit long solwota.

“I no gat man i save kam bos long laef blong hem.”—JEREMAEA 10:23.

God i no wantem se yumi safa.

Hem i wantem se yumi laef long fasin we yumi no pulum plante trabol i kam long yumi.

“Sipos yufala i bin obei long ol tok blong mi, ol gudgudfala samting we mi mi save mekem long yufala, bambae oli save kam long yufala, olsem wan gudfala reva we i stap ron.”—AESEA 48:18.