Kasemsave Filing Blong Narafala

Problem

Sipos yumi tingting nomo long ol samting we i mekem se ol narafala oli defren long yumi, bambae yumi ting se oli no stret o oli nogud. Hemia i olsem we yumi tritim ol narafala we oli defren long yumi se oli daon moa. Sipos yumi gat nogud tingting olsem long ol narafala, bambae i had blong yumi kasemsave filing blong olgeta. Sipos yumi no kasemsave filing blong narafala, hemia i soemaot se yumi gat bigfala problem ya blong no laekem narafala.

Advaes Blong Baebol

“Sipos ol man oli glad, yufala i glad wetem olgeta.”—ROM 12:15.

?I minim wanem? Advaes ya i soem se yumi mas kasemsave filing blong ol narafala. Taem man i kasemsave filing blong narafala, hem i naf blong putum hem wan long ples blong narafala ya, mo i gat sem filing olsem hem.

?From Wanem i Gud Blong Kasemsave Filing Blong Narafala?

Taem yumi kasemsave filing blong narafala, yumi kasemsave se yumi sem mak nomo long hem. Yumi kasemsave se hem i gat sem filing olsem yumi mo i mekem samting olsem yumi nomo. Fasin ya i halpem yumi blong luk se olgeta man oli famle nomo, nomata se oli gat wanem bakgraon. Moa we yumi tingbaot olsem wanem yumi sem mak long olgeta, bambae yumi gat positif tingting long saed blong olgeta.

Taem yumi kasemsave filing blong narafala, bambae yumi respektem olgeta tu. Fastaem Anne-Marie we i blong Senegal, i stap lukluk daon long ol man we ol narafala oli stap talem se oli blong wan grup we i daon olgeta. Anne-Marie i eksplenem se taem hem i kasemsave filing blong narafala, hemia i givhan long hem. Hem i se: “Taem mi luk olsem wanem ol man long grup ya oli stap safa, mi stap askem mi wan se: ‘?Sipos mi stap long ples blong olgeta, bae mi filim olsem wanem?’ Hemia i pulum mi blong luksave se mi mi no hae moa long olgeta. Mi mi no mekem wan samting we i mekem se mi mi gud moa long olgeta.” Yes, sipos yumi traehad blong kasemsave long ol hadtaem blong ol narafala, bambae i isi moa blong yumi kasemsave long filing blong olgeta, be yumi no kritisaesem olgeta.

Samting We Yu Save Mekem

Sipos yu stap tingting nogud long wan grup blong man, traem faenemaot ol samting we i mekem se oli sem mak long yu. Eksampol, traem tingbaot wanem filing blong olgeta taem oli

Kasemsave filing blong narafala i halpem yumi blong luk se yumi evriwan i famle

kakae wetem famle blong olgeta
stap long sapa afta we oli wok strong long dei ya
spenem taem wetem ol fren
lesin long miusik we oli laekem tumas

Biaen, traem tingbaot sipos yu stap long ol situesen ya. Askem yu wan se:

‘?Bae mi mekem wanem sipos wan man i tritim mi olsem se mi nating nomo?’
‘?Bae mi filim olsem wanem sipos ol narafala oli no save mi, be oli stap jajem mi?’
‘Sipos mi mi wan memba blong smol grup ya, ?bae mi wantem se ol narafala oli tritim mi olsem wanem?’

Sem waetman mo Sikh ya i serem foto blong ol samting we tufala wanwan i gat mo i stap mekem, olsem famle, spot we tufala i laekem, mo wok.

Ril Laef Eksampol: Robert (Singapo)

“Bifo, mi bin ting se olgeta we sora i fas oli narakaen, oli no gat save, mo oli save kros kwik. Taswe mi no go klosap long olgeta. Be mi no luksave se mi no laekem narafala, from we i luk olsem se tingting ya i no spolem eniman.

“Be taem mi kasemsave filing blong olgeta we sora blong olgeta i fas, hemia i halpem mi blong sakemaot fasin ya blong no laekem narafala. Eksampol, mi bin ting se ol man we sora blong olgeta i fas oli hafhaf, from taem mi toktok long olgeta, oli lukluk mi nomo. Ale mi traem tingbaot se bae mi filim olsem wanem sipos mi no save harem voes blong man we i stap toktok long mi. !I tru, bae mi tu mi lukluk hem nomo! Nating sipos mi gat masin blong sora, bae narafala i luk fes blong mi mo i ting we mi stap talem se: “Mi stap traehad blong kasemsave,” be rili mi stap traehad blong harem nomo.

“Taem mi kasemsave filing blong man we sora blong hem i fas, mi no moa gat fasin ya blong no laekem narafala.”