Fren Wetem Ol Defdefren Man

Problem

Sipos yumi no joen wetem ol man we yumi tingting nogud long olgeta, bambae yumi no laekem olgeta moa. Mo sipos yumi fren nomo wetem olgeta we oli sem mak long yumi, bambae yumi ting se tingting, filing, mo aksen blong yumi, i stret, be ol narafala oli rong.

Advaes Blong Baebol

“Yufala i mas openem hat blong yufala moa.”—2 KORIN 6:13.

?I minim wanem? Tok ya “hat,” i save minim ol filing blong yumi. Sipos yumi laekem nomo olgeta we oli sem mak long yumi, hemia i olsem we hat blong yumi i sat o i kam smol. Blong blokem problem ya, yumi mas wantem fren wetem olgeta ya tu we oli defren long yumi.

?From Wanem i Gud Blong Fren Wetem Ol Defdefren Man?

Taem yumi savegud ol narafala, bambae yumi kasemsave from wanem aksen blong olgeta i defren long yumi. Mo taem yumi kam klosap moa long olgeta, bambae yumi luk se oli memba blong grup blong yumi. Ale yumi tinghae moa long olgeta, mo bambae yumi tu yumi glad o sore wetem olgeta.

Tingbaot eksampol blong woman ya Nazaré. Fastaem hem i no laekem ol man we oli muv i kam long kantri blong hem. Be hem i eksplenem wanem i halpem hem blong jenis, i se: “Mi spenem taem wetem olgeta mo mi wok wetem olgeta. Mo mi luk se fasin blong ol man ya i defren long samting we ol narafala oli stap talem. Taem yu fren wetem ol man blong defren kalja, yu lanem blong no jajem olgeta folem klos o toktok blong olgeta, mo yu stat blong lavem mo tinghae long wanwan long olgeta.”

Samting We Yu Save Mekem

Faenem rod blong toktok long ol man we kantri, kala blong skin, o lanwis blong olgeta i defren long yu. Yu save

Askem blong oli stori smol long saed blong olgeta.
Invaetem olgeta blong kam kakae wetem yu.
Lesin taem oli stori, mo faenemaot wanem i impoten moa long olgeta.

Sipos yu traem kasemsave long ekspiriens blong olgeta, bambae yu save from wanem oli defren long yu, mo hemia bambae i halpem yu blong laekem mo gat gudfala tingting long olgeta.

Ril Laef Eksampol: Kandasamy Mo Sookammah (Kanada)

“Mitufala i gruap long Saot Afrika, long taem we i tabu blong waetman i joen wetem blakman. Oli fosem ol man blong defren kala, blong oli laef long ol defren komuniti, mo hemia i mekem se ol man oli no laekem ol narafala we oli gat defren kala blong skin. Mifala i no waetman, mo mifala i no laekem ol waetman from sam long olgeta oli lukluk daon long mifala. Long taem ya, mifala i no ting se mifala i no laekem narafala. Mifala i ting se olgeta nao oli stap spolem mifala.

“Blong jenis, mitufala i faswan blong openem hat blong mitufala, ale mifala i fren wetem olgeta blong ol defdefren bakgraon. Taem mitufala i joen wetem ol waetman, mitufala i luk se laef blong mifala i klosap sem mak. Situesen mo ol problem we mifala i fesem oli sem mak.

“Mitufala i tekem janis tu blong tekem wan waet kapol i kam long haos blong longtaem lelebet. Samting ya i mekem mitufala i savegud tufala. Biaen, mifala i frengud mo mifala i mekem i sem mak long mifala. Hemia i givhan, blong mitufala i gat gudfala tingting long ol waetman.”