Waes Advaes Blong Mekem Famle i Hapi

Ol Hasban, Lavem Waef

“Ol hasban oli mas lavem waef blong olgeta olsem we oli lavem prapa bodi blong olgeta. Man we i lavem waef blong hem, hem i lavem hem wan, from we i no gat man we i no laekem nating prapa bodi blong hem. Man i stap fidim bodi blong hem mo i stap mekem i gud long hem.”—EFESAS 5:28, 29.

Hasban i hed blong famle. (Efesas 5:23) Be wan gudfala hasban i no strong tumas, no i stap tingbaot hem wan nomo. Hem i tinghae long waef blong hem mo i keagud long hem, long saed blong bodi mo long filing. Mo tu, hem i traehad blong mekem waef i glad, be i no fosem waef oltaem blong i folem tingting blong hem. (Filipae 2:4) Hem i save storian gud wetem waef mo i lesin long hem taem i toktok. Hem i no mas “kros bitim mak” long waef o spolem bodi mo filing blong hem.—Kolosi 3:19.

Ol Waef, Respektem Hasban

“Waef i mas gat bigfala respek long hasban blong hem.”—EFESAS 5:33.

Taem wan waef i respektem hasban mo i sapotem ol desisen blong hem, hem i stap mekem se i gat pis long famle. Sipos hasban i mekem wan mastik, waef i no daonem hem, be i mas gohed blong gat kwaet fasin mo respek. (1 Pita 3:4) Taem i nidim blong tokbaot wan problem wetem hasban, bambae hem i jusum wan stret taem blong mekem, mo i toktok wetem respek.—Prija 3:7.

Stap Tru Long Hasban o Waef

“Man bambae i . . . go joen wetem waef blong hem, mo bambae tufala i kam wan bodi nomo.”—JENESIS 2:24.

Taem man mo woman i mared, tufala i fomem wan strong famle. So wan kapol i sud wok had blong mekem mared blong tufala i strong, taem tufala i storian gud mo mekem ol smosmol samting blong soem lav long tufala. Tufala i mas stap tru long tufala, taem tufala i no slip wetem ol narafala. Fasin blong slip wetem narafala, i save spolem hasban o waef. Hemia i spolem fasin blong trastem narafala, mo i save mekem famle i seraot.—Hibru 13:4.

Perens Trenem Ol Pikinini

“Yu trenem wan [pikinini] long rod we hem i sud folem. Nating sipos hem i kam olfala, be bambae hem i no gowe long hem.” —OL PROVEB 22:6, futnot.

God i givim wok blong trenem pikinini long ol perens. Hemia i minim tu se oli mas tijim ol gudfala fasin long ol pikinini mo soem gudfala eksampol long olgeta. (Dutronome 6:6, 7) Taem wan pikinini i mekem wan nogud samting, papa o mama we i waes i no mas kwik blong kam kros. Hem “i mas rere oltaem blong lesin, i no mas hariap blong toktok, mo i no mas hariap blong kros.” (Jemes 1:19) Sipos papa o mama i ting se pikinini i nidim fasin stretem, hem i mas mekem wetem lav be i no wetem kros.

Ol Pikinini, Obei Long Ol Perens

“Ol pikinini. Yufala i mas obei long papa mo mama blong yufala . . . ‘Yu mas ona long papa mo mama blong yu.’”—EFESAS 6:1, 2.

Ol pikinini oli mas obei mo soem bigfala respek long ol perens blong olgeta. Taem ol pikinini oli soem respek olsem, oli mekem se i gat glad, pis mo fasin joengud insaed long famle. Ol pikinini we oli bigman finis oli ona long ol perens blong olgeta taem oli lukaotgud long olgeta. Hemia i minim tu se oli halpem olgeta blong kipim haos blong olgeta i klin, o givim mane long olgeta taem oli nidim.—1 Timoti 5:3, 4.