Ol Tijing We i Givim Hop

God Bambae i Tekemaot Ol Man Nogud

“Taem ol man nogud oli gru kwik olsem ol rabis gras mo olgeta man we oli stap mekem ol fasin nogud, oli stap wingud, hemia from we bambae yu spolem olgeta blong olwe.”—OL SAM 92:7.

Olsem yumi lanem long laswan atikol, rabis fasin i stap kam bigwan moa. Yumi no sud sapraes long samting ya. From we Baebol i talem finis long 2 Timoti 3:1-5 se “long ol las dei” ya, fasin blong man bambae i kam mowas. ?Be las dei blong wanem? Hemia las dei blong ol man long wol ya we oli no wantem obei long God. I no longtaem, God bambae i distroem olgeta we oli no wantem jenisim ol rabis fasin blong olgeta. Nao ol gudfala man we oli obei long God, olgeta nomo bambae oli laef long wol. “Ol stret man bambae oli tekem wol ya i blong olgeta, mo bambae oli stap long hem blong olwe.”—Ol Sam 37:29.

God Bambae i Distroem Setan

“God ya we i givim pis bambae i smasem Setan.”—ROM 16:20.

Taem Setan wetem ol dimon blong hem, mo ol rabis man oli lus, pis bambae i stap long fulwol. Krieta blong yumi i promes se: “bambae i no gat man i save mekem [yu yu] fraet.”—Maeka 4:4.

God Bambae i Finisim Sik Mo Ded

“Tent blong God i stap wetem ol man . . . Mo hem bambae i ravemaot wota blong ae blong olgeta, mo bambae i no moa gat man i ded, mo bambae man i no moa sore, mo bambae i no moa gat man i krae, mo bambae man i no moa harem nogud long bodi blong hem.” —REVELESEN 21:3, 4.

Fasin safa mo sik bambae oli lus, from we God bambae i finis ol trabol we Setan, Adam, Iv, mo sin i mekem long yumi. Nao “bambae i no moa gat man i ded.” Olgeta we oli lavem mo obei long Krieta, bambae oli laef blong olwe. ?Be bambae oli laef wea?

Krieta Bambae i Mekem Wol i Kam Paradaes

“Draeples mo graon we i drae we i drae bambae tufala i harem gud, mo draeples bambae i glad mo i gat plante flaoa long hem olsem flaoa ya safron.”—AESEA 35:1.

Taem God i finisim ol rabis man, bambae wol i kam wan paradaes. Bambae i gat plante naesfala ples blong spel, mo ol gudfala garen, mo graon bambae i givim plante kakae. (Ol Sam 72:16) Solwota, ol lek, mo ol reva, bambae oli klingud mo i fulap long ol animol. !Bambae yu no moa harem tok ya “polusen” bakegen! Man bambae i wokem prapa haos blong hem mo i laef long hem. Mo bambae i no moa gat man i homles, i hanggri, o i pua.—Aesea 65:21, 22.

God Bambae i Mekem Ol Dedman Oli Laef Bakegen

“Bambae oli laef bakegen.”—OL WOK 24:15.

?Yu yu wantem luk ol famle mo fren blong yu we oli ded finis? God ya we i gat olgeta paoa, bambae i mekem olgeta oli laef bakegen long Paradaes long wol. Bambae yu luksave olgeta mo olgeta tu bambae oli luksave yu. !Tingbaot glad we bambae yufala i gat! ?From wanem yumi sua se samting ya bambae i hapen? From we Baebol i tokbaot sam pikinini mo bigman we oli laef bakegen mo joen wetem famle blong olgeta. Mo tu, plante taem Jisas i mekem ol man oli laef bakegen long fes blong plante man.—Luk 8:49-56; Jon 11:11-14, 38-44.