?Olsem Wanem Teknoloji I Save Afektem Pikinini Blong Yu?
Ol pikinini we oli bon tede, oli bon long taem blong teknoloji, taswe oli savegud olsem wanem blong yusum. Be ol bigman oli jes lanem, taswe i had blong oli yusum.
Nating se i olsem, sam man oli makem se taem ol yangfala oli spenem tumas taem long intenet, hemia i save mekem oli . . .
kam slef blong divaes blong olgeta.
joen long fasin blong spolem narafala long Intenet.
lukluk ponografi nating se oli minim o nogat.
SAMTING WE YU MAS SAVE
SLEF BLONG DIVAES
Ol man oli wokem ol gem mo sam samting long intenet, blong pulum ol man oli kam slef blong ol samting ya. Buk ya Reclaiming Conversation i talem se: “Oli wokem ol app long fon blong yumi blong mekem se yumi stap nomo long fon blong yumi. Taem yumi spenem moa taem long ol advetaesmen, ol man we oli wokem ol advetaesmen ya oli stap kasem moa mane.”
BLONG TINGBAOT: ?Ol pikinini blong yu oli spenem tumas taem long divaes blong olgeta? ?Olsem wanem yu save halpem olgeta blong oli yusumgud taem blong olgeta?—EFESAS 5:15, 16.
SPOLEM NARAFALA
Sam man taem oli yusum intenet, fasin blong olgeta i kam moa nogud, nao i isi blong oli save spolem narafala.
Sam man oli spolem narafala long sosol media, from oli wantem gat haenem mo kam popiula. Mo taem wan man i luk se ol narafala oli no invaetem hem blong joen wetem olgeta, hem i save harem olsem se oli stap spolem hem.
BLONG TINGBAOT: ?Ol pikinini blong yu oli spolem narafala taem oli stap long intenet? (Efesas 4:31) ?Oli harem nogud taem narafala i no invaetem olgeta?
PONOGRAFI
Intenet i mekem se i isi nomo blong man i luk ol doti pija mo video. Sam perens oli yusum ol seting long fon blong blokem ol doti pija blong pikinini i no luk. Be samtaem hemia i no wok, from we ol pikinini oli stil save luk ol samting ya.
Seksting, i minim fasin ya we man i yusum fon blong sanem o kasem ol doti pija. Long sam kantri, folem loa mo yia blong man, kot i save jajem man from fasin ya.
BLONG TINGBAOT: ?Olsem wanem yu save givhan long ol pikinini blong oli no lukluk o sanem ol doti pija? —EFESAS 5:3, 4.
SAMTING WE YU SAVE MEKEM
TRENEM PIKININI BLONG YU
Nating se ol pikinini oli savegud teknoloji, be oli stil nidim advaes. Buk ya Indistractable i talem se taem yu givim wan divaes long pikinini, be yu no tijim hem blong yusum long rod we i sef, “hemia i olsem we yu letem pikinini i jam long wan pul, be hem i no save swim.”
ADVAES BLONG BAEBOL: “Yu trenem wan pikinini long rod we hem i sud folem. Nating sipos hem i kam olfala, be bambae hem i no gowe long hem.”—OL PROVEB 22:6, FUTNOT.
Jusum samting we yu wantem traem, o raetemdaon sam narafala tingting.
Tijim pikinini blong toktok kaen wetem ol narafala long intenet
Halpem pikinini blong i no harem nogud taem narafala i no invaetem hem
Traem evri rod blong protektem pikinini long ol nogud samting long intenet
Jekem fon blong pikinini se hem i stap yusum olsem wanem
Jusum wan stret taem we pikinini i save spenem long fon blong hem evri dei
Meksua se pikinini i no tekem fon taem i go slip long naet
Putum wan rul blong no yusum fon long taem blong kakae