WOL YA I FULAP LONG TRABOL

1 | Protektem Helt Blong Yu

?FROM WANEM I IMPOTEN?

Ol disasta oli save afektem ol man long plante defren rod.

Taem trabol i kasem wan man, hemia i save mekem se hem i stres, mo taem hem i stres longtaem, hemia i save mekem hem i sik.
Ol bigfala trabol oli save mekem se i gat tumas man long hospital, nao i no moa gat inaf meresin.
Ol trabol i save mekem tu se man i no moa gat inaf mane blong pem ol impoten samting olsem kakae mo meresin.

Samting We Yu Mas Save

Strong sik mo stres i save mekem se yu no moa kea long helt blong yu. Nao bambae yu kam sik moa.
Sipos yu no tritim sik ya, yu save kam sik moa o lusum laef blong yu.
Sipos yu gat gudfala helt, bambae yu naf blong mekem ol gudfala desisen nating se yu kasem trabol.
Nating se yu pua o yu rij, yu save protektem helt blong yu.

Samting We Yu Save Mekem Naoia

Man we i waes, i save luksave denja mo i stap longwe long olgeta. Long saed blong helt, i sem mak. Taem yu traehad blong stap klin, mo kipim olting blong yu oli klin, bambae yu no sik oltaem. Blokem sik i gud moa i bitim winim sik.

“Taem ples blong mitufala i klin mo mitufala tu i klin, mitufala i no spenem tumas mane blong go long dokta mo pem meresin.”—Andreas.a

a Mifala i jenisim sam nem long magasin ya.

?WANEM I SAVE GIVHAN?—Sam Gudfala Tingting

Long taem blong trabol, protektem helt blong yu olsemia

STAP KLIN OLTAEM

Stap klin oltaem

Baebol i talem se: “Man we i tingting gud i luksave we trabol i stap kam, nao i go haed.” (Ol Proveb 22:3) Luksave mo blokem ol samting we i save spolem helt blong yu.

Wasem han blong yu oltaem wetem sop mo wota, speseli bifo we yu tajem kakae o taem yu kamaot long toelet.
Klinim haos blong yu oltaem wetem ol sop blong klinap, speseli ples we man i tajem oltaem.
Sipos i posibol, no go klosap long olgeta we oli gat sik we i save spred.

KAKAE OL HELTI KAKAE

Kakae ol helti kakae

Baebol i talem se: “I no gat man we i no laekem nating prapa bodi blong hem. Man i stap fidim bodi blong hem mo i stap mekem i gud long hem.” (Efesas 5:29) Yumi soemaot se yumi lavem bodi blong yumi, taem yumi lukaotgud long ol samting we yumi tekem i go insaed long bodi.

Dring plante wota.
Kakae ol defdefren kaen frut mo vejtebol.
No kakae tumas gris, sol mo suga.
No tekem tumas alkol o drag, o smokem tabak.

“Blong mitufala i no sik, mitufala i traehad blong kakae ol helti kakae. Olsemia bambae mitufala i no westem mane long ol meresin. Mitufala i glad moa blong spenem mane long ol helti kakae.”—Carlos.

EKSASAES MO SPELGUD

Eksasaes

Baebol i talem se: “I moa gud man i spel smol, i bitim we hem i stap wok had tumas mo i stap ronem win.” (Prija 4:6) Yumi nidim wok mo yumi nidim spel.

Yu mas aktif oltaem. Maet fastaem, yu save wokbaot smol evri dei. Hemia i save givhan long yu, nating se yu olfala, yu handikap o yu gat wan bigfala sik.
Spelgud

Yu mas spelgud. Sipos yu no slipgud, bambae yu stres moa o yu no save fokas. Mo sipos i gohed olsem, bambae yu save kasem wan bigfala sik.
Putum wan stret taem blong go slip mo folem taem ya. Traem go slip mo wekap long sem taem evri dei.
No wajem TV o yusum fon taem yu stap long bed.
No kakae tumas, dring kofi, o alkol bifo we yu go slip.

“Mi luk se slip i save afektem helt blong mi. Sipos mi no slipgud, samtaem hed mo bodi blong mi i soa. Be taem mi spelgud, mi harem se mi rere blong mekem eni samting. Mi gat paoa, mo mi no stap sik oltaem.”—Justin.