WOL YA I FULAP LONG TRABOL

2 | Protektem Olting Blong Yu

?FROM WANEM I IMPOTEN?

Plante man oli traehad evri dei blong kasem ol samting we oli nidim. Sore tumas, ol trabol oli save mekem se laef i kam had. ?From wanem?

Plante taem kakae mo haos i sas moa long ples we i gat trabol.
Ol trabol oli save mekem man i lusum wok, o i kasem smol mane nomo.
Ol disasta oli save spolem bisnes, haos mo olting we man i gat. Mo i mekem plante man i kam pua.

Samting We Yu Mas Save

Sipos yu manejem gud mane blong yu, bambae yu naf blong fesem trabol.
Tingbaot se olting we yu gat mo ol mane we yu sevem, oli save lusum valiu blong olgeta.
Mane i no save pem evri samting. Yu no save pem famle blong i joengud o pem gladtaem.

Samting We Yu Save Mekem Naoia

Baebol i talem se: “Sipos yumi gat kakae blong yumi mo klos blong yumi, hemia i naf, yumi save harem gud.”—1 Timoti 6:8.

Yumi haremgud, taem yumi no bitim mak long ol samting we yumi wantem mo yumi glad long samting we yumi gat. Hemia i impoten speseli sipos yumi nogat plante mane.

Blong haremgud, yu mas mekem laef blong yu i simpol. Sipos yu wantem gat ol samting we yu nogat mane blong hem, bambae yu kasem problem long mane.

?WANEM I SAVE GIVHAN?—Sam Gudfala Tingting

Long taem blong ol trabol, folem ol advaes ya blong protektem olting blong yu

DAONEM OL EKSPENS

Mekem wan badjet

No spenem mane long samting we yu no nidim. Tingbaot: ‘?Mi rili nidim wan trak? ?Mi save planem kakae insted blong pem long stoa?’
Bifo we yu pem wan samting, tingbaot: ‘?Mi mi rili nidim? ?Mi mi naf blo pem?’
Askem help blong gavman o narafala oganaesesen.

“Evriwan long famle i jekem ol samting we mifala i stap pem. Mifala i stopem o no moa spenem tumas mane long ol entatenmen. Mo tu, mifala i stat blong kukum ol kakae we oli no sas.”—Gift.

MEKEM WAN BADJET

Daonem ol ekspens

Baebol i talem se: “Man we i stap wok had, i sua se ol plan blong hem bambae oli go gud, be ol man we oli stap wok hariap, i sua se bambae oli kam pua nomo.” (Ol Proveb 21:5) Wan badjet i save halpem yu blong no spenem mane bitim wanem we yu gat.

Fastaem, raetemdaon hamas mane yu kasem long manis.
Afta, raetemdaon ol ekspens blong luk olsem wanem yu stap spenem mane blong yu.
Nao skelem mane we yu stap kasem wetem ol mane we yu stap spenem mo sipos i nidim makem ol samting we yu save karemaot.

“Evri manis mifala i raetemdaon mane we mifala i kasem mo mane we mifala i spenem. Mo mifala i traem sevem sam mane blong emejensi. Hemia i mekem se mifala i no moa wari from mifala i save olsem wanem blong yusum mane.”—Carlos.

NO KAON / SEVEM MANE

No kaon / sevem mane

Mekem wan gudfala plan blong no kaon. Sipos i posibol, no kaon nating. Be traem sevem mane blong pem samting we yu wantem.
Evri manis sevem smol mane blong yusum long taem we yu no ekspektem.

WOK HAD / HOLEMTAET WOK

Baebol i talem se: “Taem man i wok had long enikaen wok, gudfala samting i kamaot from.”—Ol Proveb 14:23.

Wok had / holemtaet wok

Yu mas gat gudfala tingting long wok blong yu. Nating se yu no laekem tumas wok ya, be stil yu kasem mane long hem.
Traehad blong kam wan gudfala wokman we narafala i trastem. Hemia bambae i halpem yu blong holemtaet wok mo sipos yu lusum wok ya bambae i isi blong faenem narawan.

“Mi glad blong mekem enikaen wok. Nating se mi no laekem wok ya o pei blong hem i smol. Oltaem mi wok had mo mekem wan gudfala wok olsem se mi stap wok blong mi wan.”—Dmitriy

Sipos yu stap lukaot wan wok . . .

Hemia samting we yu mas mekem. Ring long ol kampani we oli gat ol wok we yu save mekem nating se oli no askem man blong wok. Talem long ol fren mo famle se yu stap lukaotem wok.
Rere blong mekem eni wok. Bambae yu neva faenem evri samting we yu wantem long wan wok.