WOL YA I FULAP LONG TRABOL

3 | Protektem Frensip Blong Yu Wetem Narafala

?FROM WANEM I IMPOTEN?

Taem ol trabol long wol oli kam plante moa, hemia i save afektem frensip we man i gat wetem narafala.

Ol man oli no moa joen wetem ol fren blong olgeta.
Hasban mo waef oli no moa toktok gud tugeta.
Ol perens oli no moa tingbaot problem blong pikinini.

Samting We Yu Mas save

Frensip i save givhan long helt mo filing blong yu speseli long hadtaem.
Stres from ol trabol long wol i save afektem famle blong yu.
Ol nius we ol pikinini oli wajem o harem, i save mekem oli wari mo fraet.

Samting We Yu Save Mekem Naoia

Baebol i talem se: “Wan tru fren i soemaot lav oltaem, mo hem i wan brata we i kamtru long yu long taem blong trabol.”—Ol Proveb 17:17.

Tingbaot ol fren we oli save halpem yu o givim gudfala advaes. Ol gudfala fren olsem, oli save givhan long yu blong fesem ol jalens we yu fesem evri dei.

?WANEM I SAVE GIVHAN?—Sam Gudfala Tingting

Long taem blong trabol, mekem ol samting ya blong protektem frensip blong yu

FRENGUD MOA WETEM PATNA BLONG YU

Frengud moa wetem patna blong yu

Baebol i talem se: “Tu man i gud moa i bitim wan man nomo . . . From we sipos wan long tufala i foldaon, narawan i save halpem narawan blong i stanap.” (Prija 4:9, 10) Olgeta we oli mared oli olsem tu paelot long wan plen we oli folem sem plan, be oli no olsem tu plen we i faet agensem tufala.

Gohed blong mekem i gud long yutufala nating se yutufala i stres. Traem gat longfala tingting.
Wan taem evri wik, tokbaot eni problem we yutufala i gat. Stretem problem ya, be no stretem yutufala.
Spenem taem tugeta blong mekem sam samting we yutufala i laekem.
Tingbaot ol naes taem we yutufala i spenem tugeta bifo, maet lukluk foto blong mared o ol narafala naes memori.

“Wan kapol i no save agri long evri samting be tufala i save wok tugeta olsem wan tim. Wan kapol i save joen blong mekem desisen mo wok tugeta blong mekem plan ya i wokaot.”—David.

GOHED BLONG JOEN WETEM OL FREN

Gohed blong joen wetem ol fren

Yu save kasem help long ol fren be tu yu save givhan long olgeta. Taem yu mekem narafala i strong, yu tu yu kam strong.
Evri dei jekem sam fren blong save sipos oli oraet.
Askem ol fren se oli mekem wanem blong dil wetem ol semfala jalens we yu stap fesem.

“Taem yu fesem ol trabol olsem raf solwota, ol fren oli save givim stret daereksen long yu. Maet oli save rimaenem yu long ol samting we yu save finis. Ol fren oli lavem yu mo oli save se yu tu yu lavem olgeta.”—Nicole.

SAPOTEM OL PIKININI BLONG YU

Sapotem ol pikinini blong yu

Baebol i talem se: “Evri man i mas rere oltaem blong lesin, i no mas hariap blong toktok.” (Jemes 1:19) Long stat, maet i had blong ol pikinini oli talemaot filing blong olgeta be taem yu gat longfala tingting mo lesin long olgeta, bambae oli talemaot.

Mekem se ol pikinini blong yu oli kamfotebol blong tokbaot ol filing blong olgeta. Sam pikinini oli glad moa blong toktok wetem papa mama taem oli ron long trak o taem oli wokbaot, i bitim we oli sidaon mo toktok fes tu fes.
Meksua se ol pikinini blong yu oli no wajem o lesin tumas long ol nius we i save mekem oli fraet o wari.
Talemaot long ol pikinini samting we yu mekem blong famle i stap sef.
Mekem wan plan blong emejensi mo praktis wetem ol pikinini blong yu.

“Toktok wetem ol pikinini blong yu mo letem oli talemaot filing blong olgeta. Maet oli holemtaet wari, fraet o kros blong olgeta. Talem se yu tu yu gat ol filing ya.”—Bethany.