WOL YA I FULAP LONG TRABOL

4 | Protektem Hop Blong Yu

?FROM WANEM I IMPOTEN?

Wari from ol trabol long wol, i save afektem bodi mo filing blong man. Plante we oli kasem problem ya, oli lusum hop. ?So oli mekem wanem?

Sam man oli no wantem tingbaot fiuja.
Sam narafala oli drong o tekem drag blong oli fogetem ol problem blong olgeta.
Sam oli harem se i moa gud oli ded i bitim we oli laef. Oli wantem kilim olgeta wan i ded.

Samting We Yu Mas Save

Sam long ol trabol we yu stap fesem maet oli blong smoltaem mo i save kamgud enitaem.
Nating sipos situesen blong yu i no jenis, i gat sam samting we yu save mekem blong givhan long yu blong dil wetem.
Baebol i givim wan trufala hop, hem nomo i save solvem fulwan problem blong ol man.

Samting We Yu Save Mekem Naoia

Baebol i talem se: “Yufala i no mas wari tumas from ol samting blong tumoro. Ol wari blong tumoro oli blong tumoro. Trabol blong wan dei hem i naf finis blong dei ya.”—Matiu 6:34.

Tingbaot fastaem problem blong wan dei. No letem wari blong tumoro i blokem yu blong handelem ol problem blong tede.

Sipos yu wari long wan trabol we maet i no save hapen, hemia i save givim moa stres mo i save mekem yu lusum hop.

?WANEM I SAVE GIVHAN?—Sam Gudfala Tingting

FOKAS LONG OL POSITIF SAMTING

Baebol i talem se: “Man we i stap safa, evri dei long laef blong hem i nogud nomo, be man we hat blong hem i glad, i olsem we hem i stap lafet olwe nomo.” (Ol Proveb 15:15) Sipos yu fokas long problem, bambae yu no tingbaot rod blong fiksim problem. Be sipos yu gat positif tingting, bambae yu wantem stretem.

No spenem tumas taem blong lesin mo wajem nius.
Long en blong dei, tingbaot tu o tri samting we yu glad from.
Raetemdaon ol samting we yu mas mekem long dei ya. Seraotem ol bigfala wok i go long ol smosmol wok we yu save mekem, nao long en blo dei bambae yu glad se yu mekem sam wok.

LUKAOTEM HELP

Baebol i talem se: “Man we i stap hem wan oltaem . . . hem i sakemaot olgeta waestok we i wok gud.” (Ol Proveb 18:1) Yu no save kamaot long wan hol yu wan nomo, yu nidim help blong narafala.

Askem help blong ol famle mo ol fren.
Mo tu, yu lukaot rod blong givhan long olgeta. Taem yu givhan long narafala, bambae yu gat stret tingting long ol problem blong yu.
Sipos tingting blong yu i foldaon mo yu wantem ded, i gud yu go luk wan dokta. Samtaem filing ya i save mining se yu gat problem long helt olsem sik ya dipresen. Plante man oli kamgud afta we oli go long dokta.a

a Wekap! ya i no talem stret tritmen we i gud blong folem.

Baebol i Givim Trufala Hop

Man ya we i raetem Sam, i prea long God se: “Tok blong yu hem i laet blong leg blong mi, mo hem i laet we i saenem rod blong mi.” (Ol Sam 119:105) Makem se Baebol, Tok Blong God, i olsemia.

Wan laet i givhan blong saenem ples we yumi wokbaot long hem. Sem mak, Baebol i givim ol waes advaes blong mekem desisen taem yumi fesem trabol.

Wan laet i save saenem rod blong yumi blong save luk samting we i stap fored. Sem mak, Baebol i save givim klia hop long saed blong fiuja.

Baebol i wan tabu buk we i tokbaot histri blong man be i no hemia nomo hem i givim trufala hop tu. Hem i ansa long ol kwestin ya:

?Olsem Wanem?

?Olsem wanem fasin safa i stat? Baebol i talem se: “Wan man nomo i mekem se sin i kam long wol, mo ded i kamaot from sin. Mo ded i kasem olgeta man from we olgeta evriwan oli mekem sin.”—Rom 5:12.

?From Wanem?

?From wanem ol gavman oli no save winim ol problem blong yumi? Baebol i talem se: “Man we i stap wokbaot, hem tu i no naf blong lidim step blong hem.” (Jeremaea 10:23) Ol problem we i stap hapen long wol ya i pruvum ol tok ya.

?Wanem?

?Wanem samting we God bambae i mekem blong fiksim problem ya? Baebol i talem se: “Hem bambae i ravemaot wota blong ae blong olgeta, mo bambae i no moa gat man i ded, mo bambae man i no moa sore, mo bambae i no moa gat man i krae, mo bambae man i no moa harem nogud long bodi blong hem.”—Revelesen 21:4.