PRAES I STAP GO ANTAP
Glad Blong Givim Samting
Sipos yu faenem i had blong pem ol samting we yu nidim, maet yu save gat tingting ya se i no posibol blong givim samting long narafala. Be taem yu glad blong givim samting, hemia bambae i givhan long yu. Yes, yu save sevem mane mo long sem taem yu givim samting long narafala.
?FROM WANEM I IMPOTEN?
Taem yumi givim samting long narafala nating se i wan smol samting nomo, be hemia i save mekem i gud long yumi wan. Sam stadi i soemaot se fasin ya blong givim samting i save givhan long tingting mo bodi blong man. Eksampol, i mekem se man i no wari tumas, i no stres, blad presa blong hem i godaon, mo bodi blong hem i no stap soa tumas. Mo tu, i mekem se man i save slip gud long naet.
Taem yumi givim samting long narafala, maet mane o wan narafala samting, bambae i isi blong yumi akseptem help taem yumi stap long trabol. Howard we i laef long Inglan, i talem se: “Mi mo waef blong mi i lukaot rod blong halpem narafala. Nao taem mitufala i nidim help, mitufala i no harem se mitufala i stap mekem hadwok long ol narafala taem oli wantem halpem mitufala.” Man we i glad blong givim samting, hem i no mekem blong kasem samting. Nating se i olsem, hem i kasem ol trufala fren we oli rere blong givhan taem hem i nidim help.
SAMTING WE YU SAVE MEKEM
Serem samting we yu gat. Nating se yu gat smol samting nomo, be yet yu save serem wetem narafala, olsem smol kakae we yu gat. Duncan mo famle blong hem we oli laef long Uganda, oli gat fasin ya blong serem samting we oli gat, nating se oli pua. Duncan i talem se: “Evri Sande, mifala i invaetem narafala i kam long haos blong kakae smol samting we mifala i kukum. Mifala i glad blong spenem taem wetem ol narafala.”
Taem yumi wantem givim samting long narafala, yumi mas tingting gud fastaem. Yumi no wantem givim samting bitim mak, nao famle blong yumi i no gat ol samting we oli nidim.—Job 17:5.
Traem hemia: Serem smol kakae, jus o wota wetem narafala. Sipos yu gat sam samting we yu no moa nidim, yu save givim long ol fren o long ol neba blong yu we maet oli nidim.
Sam nara rod blong givim samting. Sam long ol beswan presen we yu save givim, yu no nid blong pem. Eksampol, yu save yusum taem blong yu blong halpem narafala mo soemaot se yu kea long olgeta. !Ol gudfala toktok blong yu tu, oli wan presen! Taswe i gud yu talemaot long ol narafala se yu glad mo yu lavem olgeta.
Traem hemia: Halpem narafala blong mekem ol wok we oli gat long haos, riperem ol samting, o go mekem soping. Raetem wan naesfala kad o sanem mesej long wan fren, nating se yu talem wan smol toktok nomo blong soemaot se yu stap tingbaot hem.
Taem yu glad nomo blong givim samting long ol narafala, hemia i olsem we yu openem wan doa blong kasem moa blesing.