Stadi 5

Lesingud

1-5. ?Fasin blong lesin i minim wanem, mo from wanem i impoten, olsem long taem blong ol miting?

¹ Yu save gohed gud olsem wan minista blong Jeova sipos yu stap lesingud. Long laef blong yu, fasin blong lesin i impoten tumas blong yu stap lan. Yu stap lesin taem yu harem toktok, be sipos tingting blong yu i no stap long samting we oli stap talem, i olsem we yu no lesin long ol toktok ya. Maet yu bin toktok wetem sam man we oli no lesingud long samting we yu stap talem. Nomata oli stap agri long tok blong yu, yu yu luksave se oli no rili kasem poen we yu wantem talem long olgeta mo oli no rili kasem gudfala samting from. Taswe oltaem yumi mas lesingud, i impoten moa taem yumi go blong lan long saed blong God. Olsem Proveb 1:5 i talem se: “Man we i waes, bambae hem i lesin long ol tok we oli save tijim hem, mo i holem gud olgeta.”

² Ol miting blong kongregesen oli haf blong program we ogenaesesen blong Jeova i stap givim long yumi blong tijim yumi. Taem yumi stap lesingud long ol miting, fasin ya i soemaot se yumi gat respek long Jeova mo ol samting we hem i mekemrere blong tijim yumi. Be God i save yumi mo hem i save se samtaem yumi letem tingting blong yumi i flae olbaot, i no lesingud. Taswe taem hem i askem yumi blong kam kakae plante kakae long saed blong speret we hem i mekemrere finis, hem i talem se: “Lesingud long mi, mo kakae kakae ya we i gud . . . Lesingud mo kam long mi. Sipos yu lesin, bambae sol blong yu i stap laef.” (Aes. 55:2, 3) Sipos yumi wantem kasem laef we i no save finis mo givhan long ol narafala man blong kasem praes ya tu, yumi mas lesingud mo kasem ol tingting blong God.—Hib. 1:1, 2; 2:1.

³ Fasin blong lesingud tu i soemaot gudfala fasin blong mekem tingting i stap daon, mo yumi gat gudfala risen blong mekem olsem. Yumi evriwan yumi save lanem sam samting long narafala man. I no gat wan long yumi we i save evri samting. Nating se man we i givim tok i no naf blong toktok long fasin we i rongud no long ol narafala gud fasin blong givim tok, trufala fasin daon i mekem se yumi lesingud mo ansa long ol samting we hem i talem mo samting ya i givhan mo leftemap tingting blong hem. Ating maet hem i talem sam poen no mining blong tok we neva yumi save bifo. Jeova i save yusum ol pikinini, long saed blong speret, blong mekem trutok blong hem i kam klia.—Mat. 11:25.

⁴ Hem i impoten blong yumi lesingud long ol miting blong kongregesen from we yumi mas mekem ol samting we yumi lanem long ol miting ya oli wok long laef blong yumi. Yumi mas kasem ‘trufala save’ blong yumi save gat nyufala laef. (Kol. 3:9, 10) Be sipos yumi no lesingud, yumi no harem ol tok, maet yumi no luksave fulwan ol jenis we yumi mas mekem long laef blong yumi mo yumi no save gru kwik long saed blong speret. Mo tu, i impoten blong yumi save talem no raetem ol stret ansa long ol kwestin blong tingtingbak. !Mo i impoten moa long wok blong prij, se yumi mas save olsem wanem blong givim ansa long ol man we oli askem kwestin long saed blong bigfala hop blong yumi!

⁵ Taem yu stap traehad blong lesingud long ol tok we man i talem, bambae yu kam naf blong tingbaot ol samting ya we yu bin harem.

6-8. ?Olsem wanem yu save blokem tingting blong yu blong i no go olbaot taem wan man i stap givim tok?

⁶ Olsem wanem blong lesin. I isi nomo blong letem ol samting oli pulum tingting blong yumi taem yumi stap long ol miting. Maet yumi stap tingting yet long ol samting we oli hapen long dei ya no yumi wari tumas long samting we bambae yumi mekem long nekis dei blong hem. ?Be sipos wan man i no lesingud from wanem hem i stap long miting? Taswe yumi mas stretem tingting blong yumi wanwan, blong yumi wanwan i bos long tingting blong yumi. Evri man i mas gat strong tingting blong lesingud taem wan man i givim tok, mo hem i no mas letem tingting blong hem i flae olbaot. I olsem we hem i satem ol narafala tingting we i no laenap wetem tok ya we i stap kamaot. Hemia nao tingting we i fulwan blong lesin long tok.

⁷ Wan gudfala rod blong mekem se tingting blong yu i no flae olbaot no yu stap tingting long narafala samting, i blong raetemdaon ol poen mo ol vas blong Baebol taem man i givim tok. Raetemdaon ol sotfala not nomo, sipos yu stap raetem plante samting tumas bambae yu no save lesingud. Taem yu raetemdaon smol not nomo samting ya i givhan long yu blong yu tingting fulwan long tok we i stap kamaot. Ol not ya we yu raetemdaon maet oli save givhan long yu long fyuja. Be nating sipos yu neva yusum olgeta bakegen, ol not ya oli givhan long yu blong yu lesingud long man we i givim tok. Yu folemgud tok blong hem mo yu kasem save long stampa tok blong hem.

⁸ Taem tu man tufala i storeyan nao sipos wan long tufala i askem wan gudfala kwestin long bisnes we tufala i storeyan long hem, samting ya i soemaot se man ya i stap lesingud. Mo tu taem yu stap lesin long wan man we i givim tok nao sipos yu gat sam kwestin long tingting blong yu, samting ya i soemaot se yu stap lesingud mo yu stap lesin blong luk sipos man ya i save ansarem ol kwestin ya blong yu. Mo bakegen yu save askem yu wan se olsem wanem blong yusum tok we i kamaot.

9. ?From we tingting i wok kwik bitim toktok olsem wanem yumi save yusumgud samting ya?

⁹ Tingting blong man i wok kwik bitim toktok blong man we i stap givim tok, olsemia nao i letem taem blong ol narafala tingting oli kam long maen blong man we i stap lesin. Oli bin faenemaot se man i save tingbaot samwe 400 tok long wan menet, be long fasin blong toktok man i save talem 125 tok long wan menet. Taswe yumi save yusumgud spid blong tingting sipos yumi stap tingtinggud long ol tok we oli kamaot, luksave ol bigfala poen long tok ya, tingtingbak long olgeta mo yumi save holem ol tok ya long tingting blong yumi oltaem.

10, 11. ?Olsem wanem stret tingting i pusum yumi blong lesingud?

¹⁰ Narafala samting blong givhan long yumi blong yumi kasem ol impoten poen long tok blong man, yumi mas gat stret tingting blong lesin. I no stret blong lesin blong daonem man we i mekem tok from fasin blong hem blong toktok no from ol save we hem i stap givim. Long Tiokratik skul hem i wok blong man blong lukaot long skul blong givim ol advaes. Yumi ol narafala yumi fri, yumi traehad blong kasem ol impoten poen we man blong givim tok i save talemaot long yumi.

¹¹ Mo bakegen, taem man blong lukaot long skul i givim advaes long wan studen we i givim tok, i nogud narafala studen i tingbaot sipos hem i agri long advaes ya no no gat. Be bambae i gud long hem blong askem hem wan sipos advaes ya i stret long hem tu no no gat, mo wanem gudfala samting hem i save kasem from. Nao taem hem i lesingud long evri tok we i kamaot samting ya i save givhan long hem blong gohed gud, hem i no stap wet long taem ya nomo we hem i mekem tok blong hem.

12. ?Olsem wanem ol pikinini oli save lanem blong kam man blong lesingud?

¹² Ol yangfala mo ol smol pikinini oli mas lanem tu blong lesingud. I gud se long miting oli save sidaon long wan ples we ol papa mama oli save lukluk olgeta. Sipos ol pikinini ya oli save rid, i gud sipos oli gat prapa buk blong olgeta. I no stret blong ol pikinini oli yusum taem ya blong ridim buk we i no laenap wetem tok. Blong leftemap tingting blong olgeta blong oli lesin, i gud se taem oli gobak long haos papa mama oli save askem olgeta blong oli talem bakegen ol samting we oli lanem. Mo ol papa mama oli save givim gudfala toktok long ol pikinini sipos oli stap tingbaot ol tok yet no oli stap raetemdaon sam poen we oli harem long miting.—Dut. 31:12.

13, 14. ?Olsem wanem kakae i save spolem fasin blong lesin?

¹³ I isi blong lesingud long miting sipos yumi no kakae tumas bifo yumi go long miting, tumas kakae i save mekem man i wantem slip. Hem i olsem from bodi blong yumi i yusum paoa blong tantanem kakae insaed long bel blong yumi, mo i livim smol paoa nomo blong mekem tingting i wok. Taem tingting i no klia, ol man oli save kam slak blong lesin long tok we i kamaot, mo bambae oli no ansa mo oli no save gat fasin tangkyu no oli save slip olgeta long taem blong miting.

¹⁴ Maet i impoten moa blong jenisim ol program blong yu blong yu save stap oltaem blong harem tok blong skul. Sam studen long plante skul oli stap mestem skul mo oli stap traem ridim buk blong olgeta nomo long haos. Be bambae yu no save kasem ol gudfala samting sipos yu no harem tok blong givim advaes. Yu no mas letem ol famle no ol fren blong yu oli blokem yu long ol miting. Yu mas traehad blong stap long ol miting nao oltaem yu save harem trutok blong laef we i kamaot long Tok blong God.

15, 16. ?Eksplenem olsem wanem blong faenemaot sipos yumi stap lesingud mo olsem wanem blong kamgud moa long fasin ya long ol miting?

¹⁵ Traem luk sipos yu stap lesingud. Yumi spenem faef haoa long evri wik long ol miting blong kongregesen, mo long ol taem ya yumi gat jans blong lanem sam samting taem yumi stap lesin. ?Olsem wanem, yu traehad blong yusumgud ol haoa ya? ?Hamas long ol gudfala tok we yumi stap harem long evri wik yu stap tingbaot yet? ?Afta long Tiokratik Skul mo Miting Blong Kingdom Wok, yu save talem bakegen ol bigfala poen long prapa tok blong yu, no samtaem yu fogetem man we i givim tok? ?Ating yu save kasem ol gudfala samting sipos yu traehad moa blong lesingud, no maet yu save raetemdaon ol not tu? Traem mekem samting ya. Biaen long miting yu save tokbaot bakegen ol bigfala poen wetem ol narafala man.

¹⁶ Long evri wik, i gat ol kwestin long sam miting, we oli askem ol man we oli stap lesin blong ansa. Ol ansa oli soemaot se man i spenem plante haoa blong stadi hem wan mo i gat plante ekspiryens. ?Taem ol narafala man oli givim ansa, yu yu lesingud long olgeta? ?Taem oli talem ansa finis, yu save talem ansa blong olgeta bakegen long prapa tok blong yu? Traem mekem olsem, bambae yu glad blong luk se yu stap lesin moa gud i bitim bifo.

17. ?Wanem samting i save givhan long yumi blong lesingud taem oli stap ridim ol haf?

¹⁷ Long ol miting ya ol man oli rid plante. Long Wajtaoa Stadi mo Buk Stadi oli ridim ol haf blong ol buk no magasin we oli stap stadi long hem. ?Yu yu rili lesin long ol samting we oli ridim, no yu stap tingting long narafala samting? I gat plante samting long ol haf we yumi no gat inaf taem blong talem evriwan. Mo fasin blong talem bakegen ol stampa poen i givhan long ol man blong tingbaot. !Bambae yumi save lanem plante samting sipos yumi rili lesin long evri samting we oli ridim long ol miting! Sipos yu folem riding taem yu stap lesin long sem taem, bambae samting ya i givhan long yu.

18-20. ?Olsem wanem ol man we oli wantem lesin oli save kasem pei from?

¹⁸ Ol man we oli lesingud oli kasem pei from. Olgeta we oli wantem lesin oli luksave se i gat plante samting blong lanem mo oli traehad blong lanem plante samting sipos oli naf blong mekem olsem. Oli lesin long advaes blong Proveb 2:3, 4 i se: “Yu mas gohed blong singaot long dip save, mo yu mas singaot strong long fasin luksave . . . yu mas stap lukaot samting ya olsem selva.” Mo taem oli stap lukaotem samting ya Jeova i blesem olgeta, from we hem i promes se: “Sipos yu mekem olsem, bambae yu kasem save long fasin fraet gud long Jeova, mo bambae yu faenem save blong God. . . . Bambae yu yu luksave stret fasin mo fasin blong skelem ol samting mo gudfala fasin, rod ya we i gud.”—Prov. 2:5, 9.

¹⁹ I tru se blong kam man blong lesingud yumi mas stretem tingting blong yumi wanwan. !Nating se i olsem, gudfala frut i save kamaot from! Nao bambae i klia se yumi stap gru long saed blong speret. Yumi mekem ol impoten jenis long laef blong yumi. Mo yumi save kamgud moa blong talemaot gud nyus long platfom mo long wok blong prij.

²⁰ Yumi no gat plante taem blong mekem prapa stadi blong yumi wanwan, be yumi gat jans blong lesingud moa long taem blong ol miting blong kongregesen. !Fasin blong yumi blong lesin i impoten tumas! Mo from we ol samting we yumi stap harem oli haf long wok blong yumi long Jeova mo laef blong olwe, advaes blong Jisas i stret nomo i se: “Tok ya we yufala i stap lesin long hem, yufala i mas tingbaotgud long hem.”—Luk 8:18.