Stori 3

Faswan Man Mo Woman

?OLSEM wanem pija ya i defren long hemia we yumi jes luk long narafala pej? Yes, i tru, i gat tu man long pija ya. Hemia faswan man mo woman. ?Hu i wokem tufala ya? God nao i wokem tufala. ?Yu yu save prapa nem blong God? Nem blong hem, Jeova. Mo nem blong faswan man mo woman ya, hemia Adam mo Iv.

Blong wokem Adam, God i tekem sam graon nao i wokem wan bodi we i stret gud olgeta, wan bodi blong man. Ale, hem i blu long nus blong Adam, mo man ya i laef.

Jeova God i givim wok long Adam. Hem i askem long Adam blong putum nem blong ol defdefren kaen anamol. Ating Adam i lukluk longtaem ol fasin blong ol wanwan anamol ya, blong hem i save jusum wan nem we i stret long olgeta. Taem Adam i stap putum nem blong ol anamol, hem i luksave wan samting. ?Yu save wanem samting ya?

Olgeta anamol oli gat wan fren blong olgeta. I gat papa elefen mo mama elefen, i gat papa laeon mo mama laeon. Be Adam i no gat wan fren blong hem. Taswe Jeova i mekem se Adam i slip we i slip, mo hem i tekemaot wan rib long bodi blong Adam. Nao Jeova i yusum rib ya blong wokem wan woman blong Adam.

!Adam i glad tumas! !Mo tingbaot olsem wanem Iv i mas glad blong laef long wan naesfala garen olsem! Naoia tufala i save gat pikinini, mo olgeta evriwan oli save harem gud blong laef tugeta.

Jeova i wantem se Adam mo Iv i laef olwe. Hem i wantem se tufala wetem ol pikinini blong tufala oli mekem ful wol i kam wan naesfala ples olsem garen blong Iden. I sua se Adam mo Iv i glad tumas taem tufala i kasem wok ya. ?Sipos yu yu bin gat janis blong mekem wok ya, bambae yu harem gud blong mekem? Be tufala i no harem gud blong longtaem. Bambae yumi luk from wanem i olsem.

Ol Sam 83⁠:​18, NW; Eksodas 3⁠:​14, futnot; Jenesis 1⁠:​26-31; 2⁠:​7-25.