Stori 36
Buluk We Oli Wokem Long Gol
?OL MAN Isrel oli stap mekem wanem naoia? !Yu luk! !Oli stap bodaon long wan buluk! ?From wanem oli mekem olsem?
Moses i stap longtaem tumas antap long hil, ale ol man Isrel oli stat taltalem se: ‘Yumi no save wanem i hapen long Moses. I gud yumi mekem wan god we i save lidim yumi i aot long ples ya.’
Eron we i brata blong Moses, i talem se: ‘Ale, yufala i go tekem ol iaring blong ol woman blong yufala, mo yufala i karem olgeta oli kam long mi.’ Ol man Isrel oli mekem olsem, nao Eron i kukum ol iaring ya blong mekem gol blong olgeta i ronaot. Nao hem i wokem pija blong wan buluk long gol ya. Ol man oli talem se: ‘!Hemia nao God blong yumi, we i lidim yumi i aot long Ijip!’ Ale oli mekem wan bigfala lafet, mo oli bodaon long buluk ya.
Taem Jeova i luk samting ya, hem i kros tumas. Nao hem i talem long Moses se: ‘Yu godaon bakegen kwiktaem. Ol man Isrel oli stap mekem samting we i nogud tumas. Oli fogetem loa blong mi mo oli stap bodaon long wan buluk we oli wokem long gol.’
Moses i hareap blong kamdaon long hil ya. ?Taem hem i kam klosap long ol man, hem i luk wanem? !Oli stap singsing mo danis raon long buluk ya we oli wokem long gol! Moses i kros we i kros, ale hem i sakem tufala flat ston ya we Jeova i raetem ol loa long tufala, oli godaon long graon, mo tufala i brobrok nogud. Nao hem i tekem buluk ya we oli wokem long gol, mo hem i bonem long faea gogo gol i ronaot. Nao hem i graenem gol ya i kam paoda.
Samting ya we ol man Isrel oli mekem i nogud tumas. Taswe, Moses i talem long sam man blong oli holem naef blong faet blong olgeta, mo hem i givim oda long olgeta se: ‘Ol nogud man we oli wosipim buluk ya oli mas ded.’ !Ale, oli kilim 3,000 man i ded! Samting ya i soem se yumi mas lukaotgud blong wosipim Jeova nomo, i no ol giaman god.