Stori 85
Jisas i Bon Long Haos Blong Ol Anamol
?SMOL pikinini ya hem i hu? Yes, hemia Jisas. Meri i jes bonem hem long haos ya we ol man oli kipim ol anamol long hem. Meri i mekem Jisas i slip long wan bokis we oltaem ol man oli stap putum gras long hem, blong ol dongki mo ol narafala anamol oli kakae. ?Be from wanem Meri mo Josef i stap long haos ya we ol anamol oli stap long hem? Hemia i no wan gudfala ples blong bonem wan pikinini.
Yes, i tru. Be i gat wan samting we i mekem se tufala i mas kam stap long haos ya. Sisa Ogastas, man Rom we i king long taem ya, hem i mekem wan loa, se olgeta man oli mas gobak long stret ples blong olgeta, blong ol man oli raetem nem blong olgeta long wan buk. Ale, Josef i kam long taon ya Betlehem from we hem i bon long ples ya. Be taem hem mo Meri i kamtru long taon ya, ples i fulap finis we i no moa gat wan rum blong tufala i stap long hem. Ale tufala i mas kam stap long haos ya blong ol anamol. !Long sem dei nomo, Meri i bonem Jisas! Be olsem yu luk long pija ya, Jisas i oraet nomo.
Ol man blong lukaot long sipsip oli kam blong luk Jisas. ?Yu luk olgeta long pija ya? Olgeta ya oli stap afsaed long vilej, oli stap lukaot long ol sipsip blong olgeta, long naet. Nao wan bigfala laet i saen long olgeta. !Hemia wan enjel! Oli fraet tumas, be enjel i talem long olgeta se: ‘!Yufala i no fraet! Mi mi gat wan gud nius blong talem long yufala. Tede, long vilej ya Betlehem, i gat wan pikinini i jes bon we hem bambae i sevem yufala. Hem i Mesaea ya we i Masta blong yumi. Bambae yufala i save faenem pikinini ya we oli kavremapgud hem long kaliko, nao oli putum hem i stap slip long wan bokis we oltaem ol man oli stap putum gras long hem, blong ol anamol oli kakae.’ Wantaem nomo, i gat fulap enjel oli kam joen wetem enjel ya, nao olgeta oli stap presem God. Ol man blong lukaot long sipsip oli hareap blong go faenem Jisas. Long pija ya, yumi luk we oli faenem Jisas finis.
?From wanem Jisas i wan impoten man? ?Yu yu save se hem i rili hu? Tingbaot faswan stori long buk ya, we i tokbaot fasbon Pikinini blong God. Pikinini ya i wok wetem Jeova blong mekem heven mo wol mo ol narafala samting. !Hemia nao Jisas!
Yes, Jeova i jenisim laef blong Pikinini blong hem long heven blong i save kamdaon long wol, nao hem i putum laef ya insaed long bel blong Meri. Wantaem nomo, pikinini ya i stat gru olsem ol narafala pikinini we oli stap long bel blong mama blong olgeta. Be pikinini Jisas, hem i spesel from we hem i Pikinini blong God. Biaen, Jisas i bon long Betlehem long wan haos blong ol anamol. ?Yu luksave from wanem ol enjel oli glad tumas blong talemaot long ol man se Jisas i bon?