Haf 8

Samting We Baebol i Talemaot Hem i Kamtru

Baebol i no tokbaot nomo ol trufala samting we i hapen finis, be i tokbaot ol samting we bambae oli hapen long fiuja tu. Yumi ol man, yumi no naf blong talemaot fiuja. God nomo i naf, mo from samting ya nao, yumi save se Baebol i mas kamaot long God. ?Baebol i talem wanem long saed blong fiuja?

Baebol i tokbaot bigfala faet blong God. Long faet ya, God bambae i spolem ol rabis fasin mo ol rabis man long wol ya, mo bambae i sevem olgeta we oli mekem wosip long hem. Jisas Kraes, king ya we God i putumap, bambae i mekem se ol man blong God oli gat pis mo glad, mo bambae oli no moa sik mo ded.

Yumi save glad se God bambae i mekem wan niufala paradaes long wol ya. ?Yu yu glad long samting ya? Be yumi mas mekem wan samting sipos yumi wantem stap long paradaes ya. Long laswan stori blong buk ya, yumi lanem wanem we yumi mas mekem, sipos yumi wantem haremgud long ol nambawan samting we God bambae i mekem long ol man we oli wosip long hem. Taswe, yu mas ridim Haf EIT blong faenemaot wanem we Baebol i talem long saed blong fiuja.