Japta 8
‘Faet Agens Long Ol Rabis Speret Paoa’
1. ?From wanem yumi stap tingbaot ol wok ya blong ol rabis speret?
OL MAN we oli biliv long ol samting blong bodi nomo, oli save laf nomo taem oli harem se i gat sam rabis speret. Be hemia i no wan bisnes blong laf. Nating sipos oli biliv no sipos oli no biliv, wok blong ol devel i stap mekem nogud long evriwan. Ol man we oli wosip long Jeova oli kasem sam trabol tu from wok blong ol devel ya. Tru ya, oli faswan mak ya we ol devel oli wantem sutum. Aposol Pol i wekemap tingting blong yumi, i talem se: “Yumi gat wan faet blong mekem, be faet ya i no agens long blad mo bodi, be i blong faet agens long ol gavman [we oli no stap long ol samting blong blad mo bodi], agens long ol paoa, agens long ol rula blong wol blong ol tudak ya, agens long ol rabis speret paoa we oli stap long ol ples blong heven.” (Efes. 6:12) Long taem blong yumi tede, faet ya i kasem big blong hem from we Setan i no moa stap long heven mo hem i kros tumas, from we hem i save se taem blong hem i sot.—Rev. 12:12.
2. ?Weswe yumi save win long faet ya agens long ol speret ya we oli bitim ol man?
2 ?Be weswe yumi save win long wan faet blong agensem ol speret paoa we oli bitim man? Yumi save mekem olsem, sipos yumi trastemgud Jeova. Yumi mas lesin long hem mo yumi mas obei long Tok blong hem. Sipos yumi mekem olsem, yumi save blokem ol trabol long bodi, long tingting, mo long ol filing, we ol man ya we oli letem Setan i bos long olgeta oli kasem.—Efes. 6:11; Jem. 4:7.
Ol Rula Blong Wol Long Ol Ples Blong Heven
3. ?Setan i agensem hu ya mo wanem ya?
3 Jeova i soemaot klia long yumi ol fasin blong wol tede, from we hem i stap lukluk wol ya from haeples blong hem long heven. Hem i mekem Jon i kasem wan vison. Long vison ya, Setan i stap olsem wan “bigfala algita we i gat kala blong faea,” we i rere nomo blong kakae evri samting. Hem i wantem kakae Kingdom blong Mesaea blong God, taem Kingdom ya i bon long heven long 1914. From we hem i mestem long samting ya nomo, Setan i statem sam fasin blong agensem ol man blong karem tok blong Kingdom. Ol man ya oli haf namba tu blong laen blong woman blong God. Oli kasem plante rabis trabol from Setan.—Rev. 12:3, 4, 13, 17.
4. (a) ?Baebol i soemaot wanem long saed blong stampa ya blong ol paoa blong ol gavman blong man? (b) ?Ol rula blong politik oli stap hivap blong wanem naoia? ?Hu ya i stap hivimap olgeta?
4 Revelesen ya we Jon i kasem i stap soemaot tu wanem ya i stampa blong ol paoa mo blong raet ya blong ol gavman blong man. Hem i soemaot wan wael anamol we i gat seven hed mo ten hon, mo anamol ya i gat paoa “antap long ol laen, ol pipol, ol lanwis mo ol nesen.” Samting ya i no blong soemaot wan gavman nomo, be samting ya i soemaot olgeta politik gavman blong wol. Jon i kasem save se “bigfala algita ya [Devel Setan] i givim paoa long anamol ya mo i givim long hem wan jea blong king mo bigfala raet blong rul.” (Rev. 13:1, 2, 7; lukluk Luk 4: 5, 6.) Nomata we samfala lida blong politik oli talem se oli gat skul finis, i no gat wan nesen blong “anamol ya” we i ona long Hae Rul blong Jeova mo we i ona long King ya we God i putumap, Jisas Kraes. Olgeta nesen ya evriwan oli stap faet blong holemfas long prapa rul blong olgeta. Tede, olsem Revelesen i soemaot, “sam tok we ol devel oli stampa blong olgeta,” oli stap hivimap olgeta nesen ya gogo kasem “faet ya blong bigfala dei blong God we i Strongfala Olgeta” long Amageden. (Rev. 16:13, 14, 16) Tru ya, olsem aposol Pol i raetem, “ol rula blong wol ya” oli no man be oli “ol rabis speret paoa we oli stap long ol ples blong heven.” (Efes. 6:12) Evri man we i wantem kam wan tru man blong mekem wosip long Jeova, i mas kasem save long ful mining blong samting ya.
5. ?From wanem yumi mas lukaotgud blong no letem wol ya blong Setan i pulum yumi?
5 Long evri dei blong laef blong yumi, yumi kasem sam trabol we oli stap spolem olgeta famle blong man. Plante taem, yumi luk ol man oli go stanap long wan saed, from ol tok blong olgeta no from sam narafala rod, no oli putum nesen i stap antap, no wan laen i stap antap, no wan lanwis i stap antap, no wan sosiol haf blong sosaete i stap antap, from we oli haf blong hem. Samtaem tu, oli go long wan saed blong wan faet, nating sipos olgeta wan wan nomo oli no blong faet ya. Be nomata wanem ya i stampa blong faet ya, nomata wanem kaen man no wanem kaen samting oli stap folem, ?oli stap rili biaenem hu? Baebol i talem klia se “olgeta wol i stap aninit long paoa blong rabis wan ya.” (1 Jon 5:19) ?Be weswe nao, wan man i save no letem ol devel oli trikim hem olsem oli stap trikim ol narafala man? I gat wan rod nomo: Hem i mas biaenem Kingdom blong God, mo hem i no mas joen nating long ol faet we oli stap spolem ol defren haf blong wol.—Jon 17:15, 16.
Ol Trik Blong Rabis Wan Ya
6. Talem sam rod we Setan i yusum blong mekem ol man oli ronwe long tru wosip.
6 Long ol defren kaen taem blong histri blong man, Setan i spolem ol man from sam tok no sam trabol long bodi blong olgeta, blong mekem ol man ya oli ronwe long tru wosip. Be hem i yusum tu sam samting we oli haed—sam trik.
7. ?Weswe Setan i soemaot we hem i gat gud han blong trikim ol man, taem hem i yusum ol gyaman jyos?
7 Setan i gat hed, mo hem i holem wan bighaf blong ol man i stap long tudak from ol gyaman skul. Hem i letem olgeta oli gat tingting ya se oli stap mekem wok blong God. From we oli no gat wan tru lav long trutok, olgeta man ya oli letem ol haed samting, ol defren kaen sevis blong jyos we oli blong ol strong filing nomo, no ol bigbigfala paoa (olsem ol merikel) oli pulum olgeta. (2 Tes. 2:9, 10) Be yumi kasem woning finis, se long medel blong olgeta ya tu we oli mekem tru wosip, “samfala bambae oli foldaon . . . oli stap tingbaot sam gyaman tok we ol devel oli stampa blong olgeta, mo sam tijing blong olgeta tu.” (1 Tim. 4:1) ?Olsem wanem samting ya i save hapen?
8. ?Olsem wanem Setan i pulum sam man we oli wosip long Jeova fastaem, oli go long gyaman wosip?
8 Devel i gat gudhan blong pulum wan man long ol fasin slak blong hem. ?Ating wan man i fraet long ol narafala man? Sipos i olsem, maet ol fren no ol famle blong hem oli save pulum hem blong hem i joen long ol fasin blong gyaman wosip. ?Ating wan man i flas tumas? Maet hem i save harem nogud taem hem i kasem advaes from sam narafala, mo taem sam narafala tu oli no agri long ol tingting blong hem. (Prov. 29:25; 15:10; 1 Tim. 6:3, 4) ?Weswe nao long fasin blong hem blong mekem wok blong prij, sipos lav i no pulum hem blong mekem olsem? From we hem i no mekem tingting blong hem i laenap long rod ya we Jisas i soemaot long yumi, maet hem i save lesin nomo long olgeta ya we ‘oli kwaetem ol sora blong hem,’ from we oli talem se i naf nomo blong ridim Baebol mo blong gat “wan gud laef.” (2 Tim. 4:3) Sipos wan man olsem bambae i joen long wan narafala grup blong ol skul, no sipos hem i holemfas nomo long prapa skul blong hem, be Setan i no wari tumas long samting ya. I gat wan samting nomo we hem i wantem, se: Man ya i no mekem wosip long Jeova long rod ya we God i askem from Tok blong hem mo from ogenaesesen blong hem.
9. ?Weswe Setan i stap yusum ol fasin blong seks blong trikim ol man?
9 Setan i yusum ol trik tu blong pulum ol man oli haremgud long sam samting we oli stret, be long sam fasin we oli rong nomo. Hem i mekem olsem long saed blong ol samting blong seks. From we oli sakem ol rul blong Baebol, plante man blong wol ya oli ting se fasin blong slip tugeta bifo wan man mo wan woman tufala i mared, be hemia i stret nomo. Oli talem se hemia wan fasin blong soemaot we oli bigman finis. ?Olsem wanem nao, long ol man we oli mared finis? Sipos olgeta oli gat trabol long famle blong olgeta, be oli kwik nomo blong mekem divos mo blong mared bakegen, no blong lego man no woman blong hem, blong stap wan wan, no blong laef wetem wan narafala man no woman. ?Taem yumi luk ol fasin ya blong laef, yumi stap ting se yumi mestem wan samting? ?Yumi stap ting se Kristin laef i had tumas? Ol trik blong Setan i blong mekem wan man i stap tingting se Jeova i blokem ol man blong hem blong oli no kasem ol gud samting. Devel i stap pulum tingting blong ol man long ol pleplei we oli save kasem naoia—be oli no mas tingbaot ol nogud frut blong samting ya we olgeta mo ol narafala tu oli save kasem bambae. Hem i mekem man i no tingbaot ol fasin fren blong hem wetem Jeova mo Pikinini blong hem.—Gal. 6:7, 8; 1 Kor. 6:9, 10.
10. ?Olsem wanem Setan i traem spolem tingting blong yumi from fasin raf?
10 I gat wan narafala samting we man i ronem tumas, se: Ol pleplei. Sam pleplei we oli stret nomo oli save mekem i gud nomo long saed blong bodi, tingting, mo ol filing tu. ?Be weswe nao long tingting blong yumi, taem Setan i yusum sam kaen rod we yumi stap spel, blong traem mekem yumi fogetem fasin blong tingting we i blong Jeova? Olsem ya nao, yumi save se Jeova i no laekem nating olgeta man blong raf fasin. (Sam 11:5) ?Be weswe nao taem sam sinema no sam video oli soemaot ol raf fasin ya? ?Yumi stap sidaon nomo blong lukluk ol samting ya? ?Weswe nao, taem fasin raf ya i stap long spot, yumi agri long hem no ating yumi joen long hem from we yumi mekem spot ya?—Lukluk Jenesis 6:13.
11. ?Olsem wanem wan man we i gat save long ol trutok long saed blong ol fasin blong ol speret, i save foldaon long trap blong fasin blong ol devel sipos hem i no lukaot gud?
11 Yumi savegud se enikaen man we i joen long wan kaen fasin blong kleva wok—wan wei blong save ol samting blong fyuja, yusum ol lif no ol posen, traem toktok wetem ol dedman—olgeta samting ya “oli sam samting we Jeova i no laekem nating.” Taswe yumi no save gat tingting ya blong go luk wan kleva, no blong mekem welkam long hem long haos blong yumi, blong hem i mekem sam kaen fasin blong hem. ?Be yumi stap lesin long olgeta no yumi stap lukluk long olgeta, sipos oli stap long wan sinema no long wan video? I klia we neva yumi save agri we wan kleva i givim sam kaen lif long yumi, ?be maet yumi save taetem wan string raon long han blong wan smol pikinini from we yumi ting se bambae samting ya i save sevem hem long sam kaen trabol? Yumi save tu se Baebol i tok agens long olgeta we “oli fasem ol narafala from wan majik.” ?Be yumi save letem wan man i bos long tingting blong yumi blong samtaem nomo, from sam kaen trik blong ae blong hem (hypnotism)?—Dut. 18:10-12; Gal. 5:19-21.
12. (a) ?Olsem wanem Setan i yusum myusek blong mekem sam tingting we oli rong oli go olbaot? (b) ?Olsem wanem ol klos, ol fasin blong hea, mo ol fasin blong toktok, oli save soemaot we yumi stap tinghae tumas long samfala man we laef blong olgeta i no stret long ol samting we Jeova i laekem? (c) ? Yumi mas mekem wanem blong yumi no foldaon from ol trap blong Setan?
12 Yumi ridim finis long Baebol se yumi no mas ‘tokbaot fasin blong slip olbaot, ol kaen fasin we oli no klin, yes yumi no mas tokbaot samting ya long medel blong yumi wetem sam nogud tingting.’ (Efes. 5:3-5) ?Be weswe nao taem ol samting ya oli stampa samting blong sam myusek, no sam kaen singsing we oli gat wan kaen fasin blong pleplei we oli bitim mak? ?Maet samtaem yumi no luksave yet, be yumi stap talem bakegen ol toktok blong ol singsing ya we oli stap leftemap fasin blong seks taem man i no mared, fasin blong yusum ol drag blong pleplei nomo, no sam narafala samting we oli bitim samting ya? Antap bakegen, yumi save se yumi no mas folem rod blong ol man ya we oli mekem ol samting ya. ?Be yumi stap traem mekem yumi kam sem mak long olgeta, from we yumi folem rod blong ol klos blong olgeta, fasin tu blong ol hea blong olgeta no fasin blong ol toktok blong olgeta? !Yes, Setan i waes tumas blong trikim man! !Ol rod blong hem oli gyaman nomo, mo oli pulum ol man blong mekem i stret nomo long ol prapa tingting blong hem we i rotin finis! (2 Kor. 4:3, 4) Blong yumi no foldaon long ol trap blong hem, yumi mas lukaot blong no go olbaot wetem wol ya. Yumi mas rimemba oltaem se ol devel oli “ol rula blong wol blong ol tudak ya” mo yumi mas strong blong faet agens long paoa blong olgeta.—Efes. 6:12; 1 Pita 5:8.
Ol Tul Blong Faet
13. ?Nating we yumi sinman, weswe yumi save winim wol ya blong Setan?
13 Bifo we hem i ded, Jisas i talem long ol aposol blong hem, se: “!Tingting blong yufala i mas strong! Mi mi winim wol ya.” Olgeta tu oli save kam man we oli winim wol; mo samwe long 60 yia biaen aposol Jon i raetem se: “?Hu ya hemia ya we i winim wol ya? ?Hemia i no man ya nomo we i bilif se Jisas i Pikinini blong God?” (Jon 16:33; 1 Jon 5:5) Yumi save soemaot bilif ya sipos yumi obei long ol komanmen blong Jisas mo sipos yumi trastem Tok blong God. Jisas i mekem olsem. ?Be yumi mas mekem wanem moa? Yumi mas holemfas long kongregesen ya we Jisas i hed blong hem. Taem yumi foldaon, yumi mas tanem tingting blong yumi from sin ya mo yumi mas askem God i fogivim yumi from sakrafaes blong Jisas Kraes. Long rod ya, nating we yumi sinman, yumi tu i save winim wol.
14. (a) Ridim Efesas 6:13-18. (b) Yusum ol kwestin mo ol vas ya we oli stap, blong mekem wan toktok long saed blong ol blesing we oli kamaot from evri haf blong ol klos blong faet.
14 Blong yumi win olgeta, yumi mas karem “olgeta klos blong faet blong God.” Yumi no mas daonem wan haf blong ol klos ya. Plis yu yu openem Baebol blong yu long Efesas 6:13-18 mo yu yu ridim olsem wanem Baebol i soemaot ol klos ya blong faet. Nao, taem bambae yu ansa long ol kwestin we oli stap biaen, yu yu mas tingbaot olsem wanem evri haf blong ol klos ya oli save sevem yu long sam kaen trabol.
“Trutok i fasem ol kidni blong yu”
?Nating sipos yumi save trutok finis, olsem wanem fasin blong stadi oltaem, fasin blong tingtinggud long ol trutok blong Baebol, mo fasin blong kam long ol miting i save sevem yumi? (Fil. 3:1; 4:8, 9; 1 Kor. 10:12, 13; 2 Kor. 13:5; 1 Pita 1:13, Kingdom Interlinear)
“Aeanklos blong stretfasin”
?Hu ya i stampa blong stretfasin ya? (Rev. 15:3)
Yusum wan pija we i soemat we wan man we i no obei long komanmen blong Jeova, from we hem i sot long lav blong ol rod blong hem, i save kasem bigfala trabol long saed blong speret. (Lukluk 1 Samuel 15:22, 23; Dutronome 7:3, 4.)
“Ol fut oli gat ol sus blong gud nyus blong pis”
?Sipos ol leg blong yumi oli bisi oltaem blong go talemaot ol rod blong pis blong Jeova long ol man, olsem wanem samting ya i sevem yumi long sam kaen trabol? (Rom 10:15; Sam 73:2, 3; 1 Tim. 5:13)
“Bigfala sil ya blong bilif”
?Sipos bilif blong yumi i stanap strong, olsem wanem bambae long tingting blong yumi sipos samfala oli traehad blong mekem yumi fraet no blong mekem tingting blong yumi i hafhaf? (Lukluk 2 Timote 1:12; 2 King 6:15-17.)
“Hat blong rod blong sef”
?Weswe hop ya blong sef i halpem yumi blong blokem ol trap we oli save mekem yumi foldaon, from we yumi tingbaot tumas olting blong wol? (1 Tim. 6:7-10, 19)
“Naef blong faet blong speret”
?Taem yumi faet agens long ol samting ya we oli wantem spolem fasin blong speret blong yumi, no fasin blong speret blong ol narafala, yumi mas stanap long wanem? (Sam 119:98; Prov. 3:5, 6; lukluk Matyu 4:3-4.)
?Stret long ol tok ya blong Efesas 6:18, 19, wanem narafala samting i impoten tumas blong win long faet ya blong speret? ?Yumi mas yusum samting ya long wanem kaen taem? ?Mo hamas taem? ?Yumi mas yusum samting ya blong mekem i gud long hu?
15. (a) ?Yumi stap yumi wan wan blong mekem faet ya long saed blong speret? (b) ?Weswe yumi save faet be i no blong blokem ol samting nomo?
15 From we yumi Kristin soldia, yumi joen long wan bigfala ami we i stap mekem wan faet long saed blong speret. Sipos yumi lukaot gud, mo sipos yumi yusum gud ol kaen klos blong faet we i kam from God, bambae yumi no foldaon from faet ya. Be defren nao, bambae yumi save givhangud long ol brata blong yumi we oli mekem wok blong God. Bambae yumi rere blong mekem faet ya we i no blong blokem ol samting nomo, be i blong talemaot gud nyus blong Kingdom Mesaea blong God. Hemia gavman ya nomo we Setan i stap agensem hem bigwan tede.
Tingtingbak
● ?From wanem ol man we oli wosip long Jeova oli no joen nating long ol faet ya we oli seraotem ol defren haf blong wol?
● ?Wanem ya samfala long ol trik we Setan i yusum blong spolem ol Kristin long saed blong speret?
● ?Olsem wanem ol klos blong faet ya we God i givim, oli stap sevem yumi long faet ya blong speret?