Kristin Kongregesen Blong Faswan Handred Yia
Long Pentekos blong yia 33 K.T.a, 120 disaepol blong Jisas oli kasem tabu speret, mo oli stat toktok long plante defren lanwis, oli stap talem ol bigbigfala samting blong God. Hemia stat blong Kristin kongregesen. Long dei ya, samwe long 3,000 nyufala disaepol oli tekem baptaes.—Ol Wok, japta 2.
Ol aposol mo sam narafala man tu, oli no fraet blong gohed blong talemaot Tok blong God. Taswe ol kongregesen long ol defren ples oli kam bigwan. Olsem buk blong Ol Wok Blong Ol Aposol i talem, kwiktaem nomo wok blong prij i kavremap eria blong Mediterenia, i stat long Babilon mo Not Afrika, i go kasem Rom mo ating Spen tu. —Rom 15:18-29; Kolosi 1:23; 1 Pita5:13.
Long ol ples we oli bin mekem sam disaepol, oli stanemap wan kongregesen, mo oli putumap sam man olsem elda no ol man blong lukaot long olgeta. Ol man ya, oli mas gat gud Kristin fasin, mo oli mas bigman long saed blong speret. Wok blong olgeta i blong tijim stret save mo leftemap ol gudfala fasin insaed long kongregesen. Oli no mekem fasin olsem ol lida blong ol narafala skul, be olgeta oli minista we oli wok tugeta wetem ol narafala from Kingdom blong God.—Ol Wok 14:23; 20:28; 1 Korin3:5; 5:13; Kolosi 4:11; 1 Timote 3:1-15; Hibrus 13:17; 1 Pita 5:1-4.
Ol aposol mo samfala we oli wok wetem, oli bin wok olsem wan hed kampani. Olgeta i lidim ol narafala long wok blong prij, mo oli stretem enikaen trabol long kongregesen blong Jerusalem. Oli sanem sam brata, we oli gat gud Kristin fasin, oli go long Sameria mo Antiok. Oli go blong givhan long olgeta we oli nyuwan mo bilif blong olgeta i no strong yet. Oli stretem wan rao long saed blong sakomsaes, mo oli sanem disisin blong olgeta i go long ol kongregesen blong oli folem advaes ya. Ol man ya oli no bos long ol narafala man, be oli givhan mo oli wok wetem olgeta long kongregesen.—Ol Wok 4:33; 6:1-7; 8:14-25; 11:22-24; 15:1-32; 16:4, 5; 1 Korin 3:5-9; 4:1, 2; 2 Korin 1:24.
Blong makem olgeta disaepol blong bifo, oli tekem nem ya: Kristin. God nomo i givim nem ya long olgeta. Mo tu, oli defren long ol narafala man from ol tijing blong olgeta, we oli kolem: Tijing blong ol aposol, no rod blong ol gudfala toktok. Mo tu, ol tijing blong Baebol, oli kolem trutok. —Jon 17:17; Ol Wok 2:42; 11:26; Rom 6:17;1 Timote 4:6; 6:1,3; 2 Timote 1:13; 2 Pita 2:2; 2 Jon 1, 4, 9.
Long taem ya, olgeta Kristin oli haf long wan kampani blong ol brata long olgeta ples blong wol, mo oli laeklaekem olgeta. Oli intres tumas long ol Kristin we oli stap long ol narafala ples. Taem oli wokbaot i go long wan narafala ples, oli welkam long haos blong olgeta we oli gat sem bilif. Oli holemtaet wan gudfala fasin blong laef, from we olgeta oli tabu man we oli defren long wol. Olgeta oli tingting oltaem long dei blong Jeova mo wetaem bambae i kamtru, mo oli wok strong blong talemaot bilif blong olgeta long ol man.—Jon 13:34, 35; 15:17-19; Ol Wok 5:42; 11:28, 29; Rom 10:9, 10, 13-15; Taetas 2:11-14; Hibrus 10:23; 13:15; 1 Pita 1:14-16; 2:9-12; 5:9; 2 Pita 3:11-14; 3 Jon 5-8.
Stret long ol profet tok, wan bigfala apostasib i stat kamaot long ol yia we oli ron biaen long 100 K.T. kasem 200 K.T. Ol bigfala jyos oli kamaot from. Olgeta oli no holemtaet stret fasin olsem Kristin kongregesen bifo, hemia fasin long saed blong ol tijing, fasin blong laef, ogenaesesen, mo fasin blong no joen long wol.—Matyu 13:24-30, 37-43; 2 Tesalonaeka, japta 2.
Jisas i bin talem se trufala wosip bambae i kam antap bakegen long en blong wol. 1,900 yia biaen long taem blong Jisas, ol Wetnes blong Jeova, oli bilif se wok we olgeta oli stap mekem naoia, i stret nomo long profet tok ya. Ol nekis pej bambae oli eksplenem from wanem.
[Ol Futnot]
a K.T. i min se Kristin Taem.
b Apostasi i min se samfala oli lego trutok mo oli agens long hem.
• ?Olsem wanem Kristin kongregesen i bin stat, mo olsem wanem hem i kam bigwan?
• ?Hu ya olgeta we oli bin lukaot long kongregesen ya mo olsem wanem?
• ?Wanem samting we oli mekem se ol Kristin blong faswan handred yia oli defren long ol narafala man long taem ya?
[Map blong pija long pej 7]
Gret Si
Blak Si
Caspin Si
Persam Galf
Red Si.
Gud nyus i kasem ol ples ya long faswan handred yia.
ITALI
Rom
GRIS
MALTA
KRIT
SAEPRAS
ESYA
BITINIA
GALESIA
KAPADOSIA
SILISIA
SIRIA
ISREL
Jerusalem
MESOPOTEMIA
Babilon
Sam man long ol ples ya oli stat bilif.
ILIRIKAM
MEDIA
PATIA
ILAM
AREBIA
LIBIA
IJIP
ITIOPIA
[Tok Blong Pija Long Pej 7]
Ol Kristin bifo oli no fraet blong talemaot Tok blong God.
Ol Kristin oli welkam long haos blong ol narafala Kristin taem oli wokbaot samples.