Ol Miting Blong Pulum Ol Man Blong Laeklaekem Olgeta Mo Mekem Ol Gudfala Wok

Fasin blong ol Kristin long taem bifo i blong joen wanples blong harem tok blong Baebol mo joengud wetem ol narafala Kristin. Plante taem oli joen long haos blong wan man nomo. Tede, ol kongregesen blong ol Wetnes blong Jeova oli joen wanples tri taem evri wik. Mifala i singaot yu blong kam long ol miting ya. Ol miting ya oli no folem sam kaen kastom, be risen blong olgeta i blong letem God i lanem yumi. Ol miting blong kongregesen oli stat mo oli finis wetem wan singsing mo prea. Ol man oli no pem blong kam insaed mo i no gat kleksin.—Ol Wok 4:23-31; 14:22; 15:32, 35; Rom 16:5; Kolosi 4:15.

Ating pablik tok, hem i faswan miting we bambae yu go long hem. Hem i stap ron long 45 menet. Hem i tokbaot ol Baebol tijing, ol profet tok, no maet hem i givim advaes long saed blong Kristin fasin blong laef. Biaen long tok ya, olgeta oli yusum wan haf blong Wajtaoa blong mekem Baebol stadi. Long evri Wajtaoa i gat sam spesel haf blong stadi long kongregesen. Program blong stadi ya i olsem: Fastaem, oli ridim wan haf blong stadi we i stap long Wajtaoa. Biaen, brata we i mekem miting ya i askem sam kwestin long haf ya we brata i jes ridim. Olgeta we oli wantem ansa, oli leftemap han blong olgeta. Nao brata we i lidim Wajtaoa i singaot sam long olgeta blong givim ansa. Ale oli gohed long sem fasin long nekis haf. Miting ya i stap ron long wan haoa.

Samtaem long sem wik, i gat tufala narafala miting bakegen. Faswan i stap ron long 45 menet mo sekenwan i sem mak. Nem blong faswan: Tiokratik Skul. Hem i trenem man blong kasem save long saed blong ol tijing blong Baebol, blong hem i save tijim gud ol man. Fas haf blong miting ya, hem i wan tok we i stap gohed long 15 menet. Afta, sam studen blong skul ya oli mekem sam sot tok. Plante wik bifo, oli talem long ol studen wanem tok oli mas mekem, taswe oli gat naf taem blong reregud. Afta we wan studen i givim smol tok blong hem, brata we i stap lukaot long skul ya, i go antap blong givim advaes we i soemaot olsem wanem studen ya i save kam moa gud long tok blong hem. Oli prentem finis plante buk blong givhan long skul ya. Olgeta we oli go evritaem long ol miting, oli save joen long skul ya. Be fasin blong laef blong olgeta i mas stret wetem ol loa blong Baebol.

Nem blong miting we i stap ron biaen, Miting blong Kingdom Wok. Hem i gat tri no fo haf long hem. Oli tokbaot fasin blong talemaot gud nyus long evri haos wanwan, mo sam samting bakegen long saed blong minista wok. Insaed long ol haf blong miting ya, oli mekem sam pleplei, sam man oli storeyan tugeta, mo ol man we oli stap lesin samtaem oli save talem sam toktok tu. Plante haf blong program ya oli kamaot long wan smol pepa we i gat fo pej nomo, Kingdom Wok Blong Yumi. Watchtower Sosaete i prentem pepa ya wan taem evri manis.

Evri wik, kongregesen i seraot long ol smol grup blong mekem wan narafala miting. Hem i wan stadi we plante taem oli stap mekem long sam haos blong sam brata long kongregesen. Stadi ya i stanap long Baebol, mo oli yusum wan buk we Sosaete i bin wokem i no longtaem. From we grup i smol, olgeta long miting ya oli gat gudfala jans blong givim sam ansa. Mo tu, oli gat jans blong frengud wetem olgeta long grup ya.

Bighaf long ol kongregesen, oli mekem ol miting long sam haos-Kingdom we ol Wetnes blong Jeova oli wokem. Olgeta oli pem ol bilding ya from ol presen mane we ol Wetnes oli givim, mo bighaf blong wok blong bildim ol haos ya oli mekem fri nomo. Long ol miting i gat sam smol bokis i stap, mo olgeta we oli wantem givim presen mane, oli save putum long bokis ya.

Ol miting blong kongregesen oli givhan long ol Wetnes blong Jeova blong folem advaes long Hibrus 10:24, 25: “I gud yumi stap tingbaot yumi, blong yumi givgivhan long yumi blong mekem yumi strong blong laekem ol man, mo blong mekem ol gudfala fasin. I nogud yumi lego ol miting blong jyos [kongregesen], olsem we sam long yumi oli mekem finis. Oltaem yumi mas stap toktok long yumi blong mekem tingting blong yumi i kam strong moa, from we yufala i luk we Dei ya we Masta blong yumi bambae i jajem olgeta man, hem i kam kolosap finis.”

• ?Olsem wanem ol miting blong ol Kristin bifo, oli sem mak long ol miting blong ol Wetnes blong Jeova?

• ?Traem storeyan long faefala miting blong ol Wetnes we oli mekem evri wik?

• ?Olsem wanem ol Wetnes oli bildim ol haos-Kingdom?

[Tok Blong Pija Long Pej 14]

Elda i stap mekem Wajtaoa stadi, long Yunaeted Stet

Tiokratik Skul, Faro Aelan

Wan grup i stadi long wan haos, long Aelan Yap

Haos-Kingdom we ol Wetnes blong Jeova oli bildim long tu dei, Nyu Bronfel, Teksas, Yunaeted Stet

[Tok Blong Pija Long Pej 15]

Ol Haos Kingdom long defren kantri

Japan

Ostrelya

Ostria

Spen