Japta 19

Wok Blong Makem Isrel Blong God

Revelesen 7:1 kasem 17

Stampa tok: 144,000 man oli kasem mak blong God long fes blong ol, mo bigfala kampani i stanap fored long jea blong Jeova mo Smol Sipsip

Taem we i kamtru: I stat long 1914, taem Jisas Kraes i kam King gogo hem i stap rul blong Wan Taosen Yia

1. ?‘Hu bambae i naf blong stanap’ long bigfala dei blong kros blong God?

‘?HU BAMBAE i naf blong stanap long Dei ya?’ (Revelesen 6:17) ?Yes, tru, hu ya i naf? Taem bigfala dei blong kros blong God i spolem wol blong Setan, ating ol rula mo ol man blong wol bambae oli askem kwestin ya. Ating olgeta oli ting se bigfala trabol long taem ya bambae i kilim i ded olgeta man long wol. ?Be samting ya i tru? No gat. Yumi glad we profet blong God i mekem promes olsem: “Olgeta we oli singaot long nem blong Jeova bambae oli stap sef.” (Joel 2:32) Tufala aposol ya Pita mo Pol tufala i agri long poen ya. (Ol Wok 2:19-21; Rom 10:13) Yes, olgeta we oli singaot long nem blong Jeova bambae oli stap laef. ?Hu ya olgeta ya? Long nekis vison bambae yumi luk.

2. ?From wanem yumi sapraes we sam man oli save laef tru long dei blong jajmen blong Jeova?

² Tru, yumi sapraes we sam man oli save laef tru long dei blong jajmen blong Jeova, from we wan narafala profet blong God hem i tokbaot dei ya olsem: “!Yu luk! Jeova i mekem wan bigfala win i blu, hemia kros blong hem, we i kam olsem wan hariken blong swipimaot ol samting. Waelwin ya bambae i kam kilim hed blong ol rabis man. Bigfala kros ya blong Jeova i no save finis, gogo hem i wokem olgeta plan long hat blong hem mo i mekem olgeta i kamtru.” (Jeremaea 30:23, 24) !I impoten tumas we naoia nomo yumi mekem sam samting blong yumi save stanap strong long bigfala win ya!—Proveb 2:22; Aesea 55:6, 7; Sefanaea 2:2, 3.

Fo Win

3. (a) ?Jon i luk we ol enjel oli mas mekem wanem spesel wok? (b) ?“Ol fo win” oli minim wanem?

³ Bifo we Jeova i lego kros ya blong hem, ol enjel long heven oli mas mekem wan spesel wok. Jon i luk samting ya long vison blong hem, nao i se: “Nao biaen long ol samting ya, mi luk fo enjel we oli stap stanap long ol fo kona blong wol. Oli blokem ol fo win long wol, nao i no gat win i blu long graon, mo long solwora mo long tri.” (Revelesen 7:1) ?Hemia i minim wanem tede? Ol “fo win” ya oli klia saen blong jajmen we bambae i spolem ol rabis man long graon. Mo jajmen ya bambae i kasem “solwora,” we i minim ol man we oli no obei. Mo tu jajmen ya bambae i kamtru long ol rula blong wol we oli pulum ol man blong sapotem olgeta. Oli olsem ol bigfala tri.—Aesea 57:20; Ol Sam 37:35, 36.

4. (a) ?Ol fo enjel oli minim wanem? (b) ?Taem ol enjel oli lego ol fo win ya, bambae wanem i hapen long ogenaesesen blong Setan long wol?

⁴ I klia se ol fo enjel ya oli minim fo grup blong enjel we Jeova i yusum olgeta blong blokem jajmen blong hem gogo stret taem blong hem. Taem ol enjel ya oli lego ol waelwin ya we i minim kros blong God, nao oli blu wantaem long not, long saot, long is, mo long wes, bambae oli spolemgud olgeta samting we oli kasem. Bambae i kolosap sem mak long taem we Jeova i bin yusum fo win blong ronem ol man Elam wanwan, mo blong smasem mo kilimaot olgeta. Be win ya long fyuja, hem i bigwan moa bakegen. (Jeremaea 49:36-38) Hem i wan bigbigfala win we i moa strong i bitim “win” we Jeova i yusum blong kilim i ded nesen blong Amon bifo. (Emos 1:13-15) I no gat wan haf blong ogenaesesen blong Setan long wol we hem i naf blong stanap long dei ya blong kros blong Jeova. Long dei ya, Jeova bambae i soemaot blong olwe we rul blong hem i stret.—Ol Sam 83:15, 18; Aesea 29:5, 6.

5. ?Olsem wanem profet tok blong Jeremaea i givhan long yumi blong kasem save se ol jajmen blong God bambae oli kasem olgeta ples long wol?

⁵ ?Yumi save sua se bambae ol jajmen blong God oli kasem olgeta ples long wol? Lesin bakegen long profet blong God, Jeremaea: “!Yu luk! Wan bigfala trabol i stap go blong kasem olgeta nesen long wol wanwan. Mo wan bigfala win bambae i girap long ol ples long wol we oli farawe tumas. Mo tru, ol man we Jeova i kilim i ded olgeta, long dei ya bambae ol dedbodi blong olgeta oli stap olbaot long wol, i stat long wan saed blong wol i go kasem narasaed blong wol.” (Jeremaea 25:32, 33) Taem bigfala win ya i blu long wol, semtaem tudak bambae i kavremap wol. Olgeta rula mo gavman blong wol bambae oli seksek gogo oli lus olgeta. (Revelesen 6:12-14) Be i no olgeta man evriwan we fyuja blong ol i tudak. ?Oraet nao, ol enjel oli blokem ol fo win ya blong sevem hu?

Wok Blong Makem Ol Slef Blong God

6. ?Hu i talem long ol enjel blong blokem ol fo win ya? ?From samting ya, i gat naf taem blong mekem wanem wok?

⁶ Nao Jon i gohed blong talem se samfala bambae oli kasem wan mak, nao oli save kasem laef from. Hem i se: “Nao mi luk wan narafala enjel i stap kam, we i aot long saed we san i stap kam antap. Hem i holem mak we God ya we i laef we i no save ded, hem i stap yusum blong makem ol man blong hem. Enjel ya i singaot bigfala, i tok long ol fo enjel ya we God i givim paoa finis long olgeta blong oli spolem graon mo solwora. Hem i talem se ‘Yufala i no spolem graon mo solwora mo tri fastaem, gogo bambae mifala i makem ol man blong wok blong God blong yumi, mifala i putum mak blong hem long fes blong olgeta.’ ”—Revelesen 7:2, 3.

7. ?Namba faef enjel ya hem i rili hu? ?Wanem i givhan long yumi blong pruvum samting ya?

⁷ Baebol i no talem nem blong namba faef enjel ya. Be plante samting i pruvum se enjel ya hem i Masta Jisas, taem hem i kasem paoa long heven finis. Jisas i jif blong ol enjel. Taswe long vas ya tu, hem i bos long ol narafala enjel. (1 Tesalonaeka 4:16; Jud 9) Hem i kamaot long is, olsem tufala ‘king we i kamaot long saed we san i kam antap,’ hemia Jeova mo Kraes blong hem. Tufala i kam blong mekem jajmen i kamtru long wol ya, olsem we tufala king ya Darias mo Saeras, tufala i daonem gud Babilon blong bifo. (Revelesen 16:12; Aesea 45:1; Jeremaea 51:11; Daniel 5:31) Mo tu, enjel ya i olsem Jisas from we hem i holem wok ya blong putum mak blong God i stap long fes blong ol Kristin man we tabu speret i makemaot olgeta finis. (Efesas 1:13, 14) Mo tu, taem ol enjel oli lego ol win ya, Jisas nao i lidim ol ami long heven blong oli mekem ol jajmen blong God oli kamtru long ol nesen. (Revelesen 19:11-16) Taswe yumi save se Jisas nomo i stret blong givim oda blong blokem ol enjel oli no spolem ogenaesesen blong Setan long wol gogo wok blong putum mak blong God long ol slef blong hem i finis.

8. ?Wanem mak ya blong God? ?Wok blong putum mak ya i stat wetaem?

⁸ ?Wanem mak ya blong God we i mas stap long fes blong olgeta? ?Mo hu ya ol slef ya blong God? Wok ya blong putum mak long olgeta i stat long Pentekos 33 K.T., taem ol faswan Kristin man Isrel oli kasem tabu speret. Biaen, God i singaot sam “hiten man” tu, mo i putum tabu speret blong hem long olgeta. (Rom 3:29; Ol Wok 2:1-4, 14, 32, 33; 15:14) Aposol Pol i talem se ol Kristin we God i putum tabu speret long olgeta oli savegud se oli “joen finis long Kraes.” Mo hem i talem se God i “putum mak blong hem long yumi, se yumi blong hem. Mo hem nomo i putum Tabu Speret ya long tingting blong yumi, we hem i olsem saen blong soemaot we ol promes blong God bambae oli kamtru long yumi.” (2 Korin 1:21, 22; skelem wetem Revelesen 14:1.) Taswe taem God i adoptem ol slef ya, nao oli kam ol speret pikinini blong hem, oli kasem wan saen blong pruvum se bambae oli go long heven. Hemia i wan mak, no wan promes. (2 Korin 5:1, 5; Efesas 1:10, 11) From samting ya, oli save talem se: “Speret ya blong God i kam joen long tingting blong yumi, blong talemaot we yumi pikinini blong God. Nao from we yumi pikinini blong hem, bambae yumi save kasem ol gudgudfala samting we God i putum olgeta oli tabu, se bambae oli blong ol man blong hem. Mo bambae yumi save joen long Kraes blong kasem haf long ol gudgudfala samting we God i putum olgeta oli tabu, se bambae oli blong Kraes. Mo from we yumi joen long Kraes blong harem nogud olsem we hem i harem nogud, be bambae yumi save joen long hem bakegen, blong kasem gudfala laef blong hem long heven.”—Rom 8:15-17.

9. (a) ?Ol pikinini blong God we tabu speret i makemaot olgeta mo oli stap long wol yet, oli mas stanap strong olsem wanem? (b) ?Oli mas stap kasem traem gogo wetaem?

⁹ ‘From we yumi harem nogud olsem we hem i harem nogud’—?wanem mining blong tok ya? Blong kasem gudfala presen ya, laef, ol Kristin we God i putum tabu speret long olgeta, oli mas stanap strong mo holemtaet bilif blong olgeta gogo oli ded. (Revelesen 2:10) Oli no save ting se: ‘God i sevem mi finis, blong olwe.’ No gat. (Matyu 10:22; Luk 13:24) Defren olgeta, Baebol i givim advaes ya, se: “Ol brata mo sista. God i jusumaot yufala, mo i singaot yufala blong yufala i man blong hem. From ol samting ya, yufala i mas traehad moa blong mekem tufala samting ya i karem frut long laef blong yufala. Sipos yufala i mekem olsem, bambae yufala i no save foldaon samtaem.” Oli mas folem fasin blong aposol Pol we long en blong laef blong hem, hem i save talem se: “Mi mi faet strong finis long gudfala faet ya we yumi stap faet long hem. Mi mi kamtru finis long en blong resis ya, mo mi stap holem yet fasin blong bilif.” (2 Pita 1:10, 11; 2 Timote 4:7, 8) Taswe ol pikinini blong God we tabu speret i makemaot olgeta mo oli stap yet long wol, oli mas kasem ol samting blong traem mo skelem olgeta gogo Jisas mo kampani blong ol enjel blong hem oli putum mak ya blong God ‘long fes’ blong olgeta blong olwe. Mak ya i soemaot klia mo blong olwe se oli trufala “man blong wok blong God blong yumi,” we oli winim finis ol traem long laef blong ol. Nao mak ya i save stap olwe long olgeta, we i no gat wan samting nating i save ravemaot hem. I klia se taem ol enjel oli lego ol fo win blong trabol long wol, wok blong putum mak ya long fes blong ol man Isrel blong speret bambae i finis olgeta, nating we sam long grup ya bambae oli laef yet long wol. (Matyu 24:13; Revelesen 19:7) !Long taem ya, bambae oli kasem fulnamba blong olgeta!—Rom 11:25, 26.

?Hamas Man Oli Kasem Mak Ya?

10. (a) ?Wanem sam vas we oli soemaot se ol man we oli kasem mak ya oli gat stret namba blong olgeta we God i makemaot finis? (b) ?Hamas man evriwan oli kasem mak ya? Talem lis blong nem blong olgeta.

¹⁰ Jisas i talem long olgeta we bambae oli mas kasem mak ya, se: “Yufala we i smol kampani blong ol sipsip, yufala i no fraet, from we Papa blong yufala hem i glad tumas blong givim kingdom long yufala.” (Luk 12:32, NW) Sam narafala vas, olsem Revelesen 6:11 mo Rom 11:25, oli soemaot se smol kampani ya i gat stret namba blong hem, we God i makemaot finis. Nekis tok blong Jon i pruvum samting ya, i se: “Nao mi harem namba blong ol man we mak blong God i stap long olgeta. I gat wan handred fotefo taosen man olgeta, we oli kamaot long olgeta laen blong ol man Isrel. Olgeta we mak blong God i stap long olgeta i olsem. Long laen blong Juda i gat twelef taosen man. Long laen blong Ruben i gat twelef taosen man. Long laen blong Gad i gat twelef taosen man. Long laen blong Isi i gat twelef taosen man. Long laen blong Naftali i gat twelef taosen man. Long laen blong Manase i gat twelef taosen man. Long laen blong Simeon i gat twelef taosen man. Long laen blong Livae i gat twelef taosen man. Long laen blong Isaka i gat twelef taosen man. Long laen blong Sebulan i gat twelef taosen man. Long laen blong Josef i gat twelef taosen man. Mo long laen blong Benjamin i gat twelef taosen man.”—Revelesen 7:4-8.

11. (a) ?From wanem ol vas we oli talemaot ol 12 laen ya oli no stap tokbaot ol prapa man Isrel long saed blong bodi? (b) ?From wanem Revelesen i mekem lis blong 12 laen? (c) ?From wanem i no gat wan laen long Isrel blong God we i blong ol king no ol pris nomo?

¹¹ ?Ating ol vas ya oli stap tokbaot ol prapa man Isrel long saed blong bodi? No gat, from we nem blong ol laen long Revelesen 7:4-8 oli no sem mak evriwan long nem blong ol laen blong ol prapa man Isrel. (Namba 1:17, 47) I klia se lis ya i no blong talemaot nem blong ol laen blong ol prapa man Isrel. Hem i blong soemaot se Isrel blong speret i wan ogenaesesen we oda mo plan blong hem i sem mak long oda mo plan blong Isrel bifo. Samting ya i stret nomo. Namba blong nyufala nesen ya i mas stret—144,000 memba nomo. I mas gat 12,000 man i kamaot long ol 12 laen wanwan. I no gat wan laen long Isrel ya blong God we hem i laen blong ol king nomo no laen blong ol pris nomo. Olgeta evriwan long nesen ya bambae oli rul olsem king. Mo olgeta evriwan long nesen ya bambae oli mekem wok blong pris.—Galesia 6:16; Revelesen 20:4, 6.

12. ?From wanem i stret nomo we ol 24 elda oli stanap fored long Smol Sipsip ya, nao oli singsing olsem Revelesen 5:9, 10 i talem?

¹² Ol prapa man Isrel mo ol narafala man we oli joen long tru wosip wetem ol man Isrel, oli kasem faswan jans blong God i jusumaot olgeta blong oli kam memba blong Isrel blong speret. Be smol nomo long nesen blong ol prapa man Isrel oli wantem. From samting ya, Jeova i singaot long ol man blong ol Jentael nesen tu. (Jon 1:10-13; Ol wok 2:4, 7-11; Rom 11:7) Fastaem, ol man Efesas oli “stap afsaed long kampani blong ol man Isrel.” Be biaen, olgeta wetem ol narafala man we oli no man Isrel, oli save kasem mak we tabu speret blong God i putum, nao oli save joen long kongregesen blong ol tabu Kristin man. (Efesas 2:11-13; 3:5, 6; Ol Wok 15:14) Taswe i stret nomo we ol 24 elda oli stanap fored long Smol Sipsip ya, nao oli singsing se: “Long ded blong yu, we blad blong yu i ron, yu yu pemaot ol man, oli blong God. Olgeta ya oli kamaot long olgeta laen, mo long olgeta lanwis, mo long olgeta kantri, mo long olgeta kala. Mo yu mekem olgeta oli kam wan kingdom, mo oli pris blong God blong yumi, mo bambae oli rul olsem king antap long wol.”—Revelesen 5:9, 10, NW.

13. ?From wanem Jemes, we hem i brata blong Jisas, i mekem i stret nomo taem hem i raetem leta blong hem i go long ‘ol twelef laen blong ol man Isrel, we oli stap wanwan olbaot long wol’?

¹³ Kristin kongregesen i “wan laen we God i jusumaot, wan kampani blong pris we i king, wan tabu nesen.” (1 Pita 2:9, NW) Ol man Isrel oli no moa spesel nesen blong God. Nyufala Isrel we hem i “prapa man Isrel blong God” i tekem ples blong olfala nesen ya. (Rom 9:6-8; Matyu 21:43)a Taswe Jemes we hem i brata blong Jisas, hem i mekem i stret nomo, taem hem i raetem leta blong hem i go long ‘ol twelef laen blong ol man Isrel, we oli stap wanwan olbaot long wol.’ Hemia i minim kongregesen blong ol Kristin we tabu speret i makemaot we oli stap long olgeta ples long wol. Namba blong olgeta i mas kasem 144,000.—Jemes 1:1.

Isrel Blong God Tede

14. ?Wanem i soemaot se olwe ol Wetnes blong Jeova oli bin holem bilif se 144,000 man hem i trufala namba blong olgeta man Isrel blong speret?

¹⁴ Faswan presiden blong Watch Tower Sosaeti, Charles T. Russell, hem i luksave se namba blong Isrel blong speret, hemia 144,000 man, hem i wan prapa namba, i no wan saen nomo. Long buk blong hem (The New Creation, Buk 6 long Studies in the Scriptures, we oli prentem long 1904), hem i talem se: “Mifala i bilif se buk blong Revelesen (7:4; 14:1) i talemaot stret namba blong ol man we God i jusumaot olgeta, nao i putum tabu speret long olgeta. Hemia 144,000 man ‘we oli kamaot long olgeta laen blong ol man.’ ” Seken presiden blong Watch Tower Sosaeti, J. F. Rutherford, i talem samting olsem long buk blong hem, (Light, Buk Wan, we oli prentem long 1930), i se: “144,000 memba blong bodi blong Kraes, hemia nao kampani we God i jusumaot, i putum tabu speret long ol, mo i putum mak blong hem long fes blong ol.” Ol Wetnes blong Jeova tede oli holem bilif ya yet se i rili gat 144,000 Kristin man we God i putum tabu speret long olgeta, hemia nao Isrel blong speret.

15. ?Taem dei blong Masta i no stat yet, ol Baebol studen oli ting se wanem bambae i kamaot long ol man Isrel, taem rul blong ol Jentael nesen bambae i finis?

¹⁵ ?Be ol man Isrel long saed blong bodi tede, i stret we oli kasem samfala spesel blesing yet, no no gat? Taem dei blong Masta i no stat yet, ol Baebol studen oli luksave finis plante stampa trutok blong Baebol. Be wan samting: Oli ting se taem rul blong ol Jentael nesen i finis, bambae ol man Isrel oli mas kam ol spesel man blong God bakegen. Taswe buk blong C. T. Russell (The Time Is at Hand, Buk 2 blong Studies in the Scriptures), we oli prentem long 1889, i talem se profet tok blong Jeremaea 31:29-34 bambae i kamtru long ol prapa man Isrel long saed blong bodi. Buk ya i talem se: “Ol man long wol oli luk we ol man Isrel oli bin kasem panis aninit long rul blong ol Jentael nesen i stat long 607 B.K.T. i kam kasem naoia. Mo hem i stap gohed yet. I no gat risen blong ting se ol man Isrel bambae oli hivap long wan nesen bakegen bifo long 1914 K.T. ‘Seven taem’ no 2520 yia i mas pas fastaem.” Oli ting se ol man Isrel bambae oli kam wan spesel nesen bakegen. Mo long 1917, i luk olsem we tingting blong olgeta i stret, from we Kontrak blong Balfour i promes se ol man Engglan bambae oli sapotem plan ya blong mekem Palestaen i ples blong ol man Isrel nomo.

16. ?Olsem wanem ol Wetnes blong Jeova oli traehad blong mekem Kristin mesej i kasem ol man Jyu? ?Wok blong olgeta i karem wanem frut?

¹⁶ Biaen long Faswan Bigfala Faet Blong Wol, Palestaen i stap aninit long rul blong Engglan. Nao rod i open blong plante man Isrel oli gobak long ples blong ol. Long 1948, oli stanemap Stet blong Isrel olsem wan nesen blong wol. ?Samting ya i soemaot se ol man Isrel ya oli rere blong kasem sam blesing long God? Gogo plante yia i pas, ol Wetnes blong Jeova oli ting olsem. Taswe long 1925, oli prentem wan buk we i gat 128 pej long hem, nem blong hem Comfort for the Jews. Long 1929, oli prentem wan naes buk we i gat 360 pej blong hem, nem blong hem se Life. Oli wokem i stret nomo long tingting blong ol man Isrel, mo oli tokbaot buk blong Job long Baebol. Oli traehad blong mekem mesej ya long saed blong Mesaea i kasem ol man Isrel. Oli traehad moa long taon ya Nyu Yok. Samfala oli harem mesej ya. Be bighaf blong ol man Jyu, oli olsem ol bubu blong olgeta long faswan handred yia. Oli no wantem luksave se Mesaea i kamtru finis.

17, 18. ?Ol man blong wok blong God long wol oli kasem wanem save long nyufala kontrak, mo long ol profet tok blong Baebol we oli talem se nesen blong Isrel bambae i stanap bakegen?

¹⁷ Nao i kam klia se nesen blong Isrel mo ol man long nesen ya wanwan, hemia i no Isrel ya we Revelesen 7:4-8 mo sam narafala profet tok long Baebol oli joenem wetem dei blong Masta. Ol man Isrel oli gohed blong folem kastom blong ol, oli no stap yusum prapa nem blong God. (Matyu 15:1-3, 7-9) Buk ya Jehovah we Watch Tower Sosaeti i prentem long 1934, i eksplenem Jeremaea 31:31-34. Hem i talem klia nomo se: “Nyufala kontrak i no joen nating wetem laen blong ol man Isrel mo wetem ol man olbaot. . . . Hem i stret nomo long ol man Isrel blong speret.” Ol profet tok blong Baebol we oli talem se Isrel bambae i kam wan nesen bakegen, oli no kamtru long ol man Isrel long saed blong bodi. Mo oli no kamtru long nesen blong Isrel tede, we hem i wan memba blong Yunaeted Nesen mo hem i haf blong wol ya we Jisas i tokbaot long Jon 14:19, 30 mo 18:36.

¹⁸ Long 1931, ol man blong God long wol oli glad tumas blong tekem nem ya se ol Wetnes blong Jeova. Oli save agri wetem ful hat blong olgeta long ol tok blong Ol Sam 97:11, we i se: “Laet blong hem i stap saen long ol stret man, mo glad blong hem i stap kam fulap long ol gudfala man.” Long tingting blong olgeta i kam klia nomo se ol man Isrel blong speret nomo oli insaed long nyufala kontrak. (Hibrus 9:15; 12:22, 24) Ol prapa man Isrel we oli sakem Kraes oli no kam insaed long kontrak ya, mo ol man olbaot tu oli no stap long hem. Taem oli kasem save long samting ya, oli openem rod blong laet blong God i saen bigwan. Taem yumi ridim histri blong ol man blong God, yumi luk we hemia i bigfala taem long olgeta. I kam klia se Jeova i rere blong soemaot fulap sore, mo lav, mo kaen fasin, mo trutok long olgeta man we oli kam kolosap long hem. (Eksodas 34:6; Jemes 4:8) Yes, Isrel blong God mo plante narafala man bambae oli kasem blesing from we ol enjel oli blokem fo win blong oli no spolem wol yet. ?Hu ol narafala we oli kasem blesing from? ?Yu yu wan long olgeta ya? Yumi luk nao.

[Futnot]

[Tok Blong Pija Long Pej 117]

God i stap jusumaot kolosap olgeta memba blong trufala Isrel blong hem i stat long Pentekos long 33 K.T. go kasem 1935. Long 1935 nao, i gat wan bigfala asembli blong ol Wetnes blong Jeova long Wasington. Long asembli ya, oli talem se wok we i bigfala moa i blong hivimap bigfala kampani we bambae oli laef long wol. (Revelesen 7:9)