Japta 8

?Olsem Wanem Mi Save Gat Ol Trufala Fren?

WAN yangfala we nem blong hem Ronny, i harem nogud, i se: “!Mi mi stap 8 yia finis long skul blong mi, be mi no gat wan fren nating! Mi no gat wan.” Ating sam samtaem yu tu yu harem se yu no save fren wetem narafala. ?Be, wan trufala fren i olsem wanem? ?Mo olsem wanem yumi save gat ol trufala fren?

Wan proveb i talem se: “Wan fren i gat lav oltaem mo hem i kam olsem wan brata long taem blong trabol.” (Ol Proveb 17:17, The Bible in Basic English) Taem yu yu kasem trabol, wan fren i save leftemap tingting blong yu. Be i no hemia nomo. Gel ya, Marvia, i talem se: “Samtaem, wan we yu ting se hem i fren blong yu, i wet se yu kasem trabol, nao hem i talem se: ‘Mi mi luksave finis se bambae yu kasem trabol, be mi fraet blong talem long yu.’ Sipos hem i wan trufala fren mo hem i luksave se yu stap go rong, hem i no save wet. Bambae hem i givim woning long yu, nating sipos yu no glad long hem.”

?Olsem wanem nao sipos wan fren i tok stret blong givim woning long yu, from we hem i laekem yu? ?Bambae yu no moa wantem fren wetem hem from we hem i daonem flas blong yu lelebet? Ol Proveb 27:6 i talem se: “Yu save trastem man we i kilim yu from i laekem yu, i bitim man we i kisim yu be i no laekem yu.” (Byington) Taswe, yu mas wantem ol fren we oli gat stret tingting mo oli save tok stret long yu.

Ol Trufala Fren Mo Ol Giaman Fren

Gel ya Peggy we i gat 23 yia, i talem se: “Laef blong mi i soemaot klia se i no evri ‘fren’ we oli save mekem i gud long yumi.” Sam yia bifo, Peggy i aot long haos blong papa mama blong hem. Nao, tu Witnes blong Jeova, Bill mo waef blong hem Lloy, tufala i stadi Baebol wetem hem mo kam fren blong hem. Peggy i talem se: “Long ol manis we mi kampani wetem tufala ya, mi mi glad tumas, mi rili harem gud mo mi gat pis long tingting blong mi.” Be biaen, hem i lego Bill mo Lloy, blong folem sam narafala yangfala.

Peggy i gohed i talem se: “Ol niufala ‘fren’ blong mi oli lanem mi long plante samting—olsem wanem blong stilim ol tep, yusum ol giaman jek blong pem samting, smok drag ya mariuana. Biaen, oli lanem mi olsem wanem blong faenem 20,000 vatu evri dei blong pem ol drag we mi nidim.” Taem hem i gat 18 yia, hem i mitim wan boe we nem blong hem Ray. Boe ya i promes blong givim olgeta drag we hem i wantem, hem i no nid blong pem. Peggy i talem se: “Mi bin ting se olgeta trabol blong mi oli finis nao. Bambae mi no moa nidim blong stil mo giaman bakegen.” Be Ray i pulum hem blong wok olsem wan woman blong rod. Biaen, Peggy i ronwe long taon ya mo long ol nogud “fren” blong hem.

Wan dei, long niufala ples we Peggy i stap long hem, tu Witnes blong Jeova oli kam luk hem. Peggy i talem se: “Wota i ron long ae blong mi from glad. Mi holem tufala woman ya we tufala i sapraes tumas. Mi luksave finis se ol ‘fren’ blong mi oli gat tu fes, mo mi no moa laekem olgeta nating. Be mi save se ol Witnes oli tok tru mo stret nomo.” Ale, Peggy i stat stadi Baebol bakegen.

Be, i no isi blong hem i jenisim laef blong hem mo folem ol loa blong God. Hem i faenem i hadwok blong lego sigaret. Wan dei, wan fren blong hem we i wan Witnes i givim advaes ya se: “I nogud yu smok finis nao yu prea long God blong askem hem blong fogivim yu. I moa gud yu prea taem yu harem se yu wantem smok, askem long God blong givim strong tingting long yu.” Peggy i talem se: “Mi folem gudfala advaes ya we hem i givim long kaen fasin, mo i wok. . . . Hemia fastaem long laef blong mi we mi harem se mi klin, mo mi save tinghae long mi wan.”

Ol trabol we Peggy i kasem oli soemaot trutok blong Ol Proveb 13:20. Vas ya i talem olsem se: “Sipos man i go joen long ol waes man, bambae hem i save kam waes, be sipos hem i go mekem fren wetem ol man we oli no gat hed, bambae hem i spolem hem nomo.” Peggy i talem se: “Sipos mi bin gohed nomo blong frengud wetem olgeta we oli laekem God, bambae mi no save kasem trabol ya, we mi sem blong tingbaot naoia.”

Faenem Ol Fren

?Weples yu yu save faenem ol fren we oli laekem God? Insaed long Kristin kongregesen. Traem faenem ol yangfala we oli no stap talem nomo se oli gat bilif, be we oli soemaot long ol fasin mo wok blong olgeta se oli gat strong bilif mo oli laekem God. (Skelem wetem Jemes 2:26.) Sipos i hadwok blong faenem ol yangfala olsem, traem savegud ol Kristin we oli olfala moa long yu. From we oli olfala moa, hemia i no min se yu yu no save fren wetem olgeta. !Baebol i tokbaot nambawan fasin fren we Deved i gat wetem Jonatan, nating se man ya i olfala olsem papa blong hem!—1 Samuel 18:1.

?Be, yu mas mekem wanem blong gat ol fren?

Tingbaot Ol Narafala

Jisas Kraes i frengud wetem ol narafala, mekem se ol fren blong hem oli rere blong ded from hem. ?Wanem i pulum olgeta blong laekem hem olsem? Jisas i tingbaot olgeta. Hem i girap i givhan long olgeta. Hem i “wantem” halpem olgeta. (Matiu 8:3) Tru, faswan samting we yumi mas mekem blong fren wetem narafala, se yumi mas intres long hem.

Boe ya Deved, i eksplenem se hem i gat plante fren, from we, “mi mi traehad blong rili laekem ol narafala mo soemaot se mi kea long olgeta.” Hem i talem se: “Wan bigfala samting, se yu mas save prapa nem blong hemia we yu wantem fren wetem hem. Plante man oli sapraes mo oli glad, taem yu tingbaot nem blong olgeta. Samting ya i soemaot se yu kea. Nao maet oli glad blong tokbaot wan samting long laef blong olgeta no wan trabol. Ale yufala i stat fren nao.”

Be hemia i no minim se yu toktok tumas mo sekhan long evriman jes blong soem yu nomo. Nogat. Jisas i gat ‘tingting daon,’ hem i no traem pulum ae blong ol man mo mekem flas. (Matiu 11:28, 29) Samting we bambae i pulum narafala, hemia taem yu rili intres long hem. Ol smosmol samting nomo oli save mekem fasin fren i gru moa, olsem kakae tugeta, mo givhan long hem blong mekem wan wok.

‘Lesin Gud’

Jisas i givim advaes ya se: “Tok ya we yufala i stap harem, yufala i mas tingting gud long hem.” (Luk 8:18) Jisas i stap minim se i impoten tumas blong lesingud long tok we God i talem. Be advaes ya i save halpem yumi blong fren wetem narafala tu. Blong gat wan fren, yu mas lesingud long ol tok blong hem.

Sipos yumi intres long ol tok we narafala i stap talem, bambae hem i harem se i laekem yumi. Be blong mekem olsem, yumi mas folem advaes ya: “Yufala evriwan i mas givgivhan long yufala long laef blong yufala. I nogud wan man i stap lukaot long laef blong hem nomo [maet long ol samting we yu nomo yu wantem talem].”—Filipae 2:4.

Stap Tru Oltaem Long Olgeta

Jisas i stap tru oltaem long ol fren blong hem. Hem “i stap lavem olgeta olwe, gogo hem i givim laef blong hem from olgeta.” (Jon 13:1) Yangfala ya Gordon, i stap mekem olsem long ol fren blong hem. Hem i se: “Faswan fasin blong wan fren se, hem i stap tru long yu oltaem. Bambae hem i stap klosap long yu blong halpem yu long ol trabol taem. Sipos samfala oli tok blong daonem mi, fren blong mi bambae i girap i tekem saed blong mi kwiktaem. Mo mi tu mi mekem sem mak sipos samfala oli daonem hem. Mitufala i rili sapotem gud mitufala, sipos i wan samting we mitufala i no rong long hem.”

Be, ol giaman fren oli gat tu fes. Oli tokbaot yu biaen long baksaed blong yu, mo ting nating long fasin ya. Ol Proveb 18:24 (NW) i talem se: “I gat sam man we oli save spolem ol fren blong olgeta.” ?Bambae yu yu joen long ol tok we i daonem fren blong yu, mo “spolem” hem? ?No bambae yu stap tru long hem mo toktok blong sapotem hem?

Talemaot Ol Filing Blong Yu

Ol man oli laekem Jisas tumas from we hem i talemaot ol dip filing blong hem. Hem i talem long samfala se hem “i sore tumas” long olgeta, hem ‘i lavem olgeta tumas,’ mo ‘tingting blong hem i hevi tumas.’ Wan taem, hem “i krae.” Jisas i no sem blong soemaot wanem i stap long hat blong hem long ol man we hem i trastem.—Matiu 9:36; 26:38; Mak 10:21; Jon 11:35.

!Samting ya i no min se yu mas talemaot ol filing blong yu long eniman! !Nogat! Be yu mas tok tru long evriwan. Nao taem yu stat blong savegud wan man mo trastem hem, ale sloslou, yu save talemaot ol dip filing blong yu long hem. Mo tu, blong gat ol fren, yu mas lanem blong kasem save long filing blong olgeta mo blong “gat sore” long olgeta.—1 Pita 3:8.

Ol Fren Oli No Stretgud Olgeta

Oraet, maet yu stap frengud naoia wetem samfala. Be, yu no mas ting se ol fren ya oli stretgud olgeta. “Yumi evriwan i stap mestem long plante samting. Man we i save talem se hem i neva mestem long wan tok blong hem, hem i stret gud olgeta.” (Jemes 3:2, Phillips) Yu mas luksave tu se, blong stap frengud wetem narafala, yu mas lego sam samting. Yu mas givim taem mo filing blong yu long hem. Yangfala ya Presley, i talem se: “Yu yu mas rere blong givim sam samting. Hemia i impoten, taem yu gat wan fren. Yu yu save gat ol prapa filing blong yu long sam samting, be yu mas rere blong lego ol filing ya, blong traem kasem save long filing mo trabol blong hem.”

Be, ol samting we yu givim blong gat wan fren, oli smol nomo, taem yu tingbaot olsem wanem yu save harem nogud blong stap yu wan, we yu no soemaot lav long wan narafala. Taswe, yu mas faenem ol gudfala fren blong yu. (Skelem wetem Luk 16:9.) Givim taem mo paoa blong yu blong frengud wetem narafala. Lesingud long olgeta mo soemaot se yu rili intres long olgeta. Olsemia nao, maet bambae yu save talem long plante narafala, olsem we Jisas i bin talem se: “Yufala ya i fren blong mi.”—Jon 15:14.

Ol Kwestin Blong Tokbaot

◻ ?Olsem wanem yu save luksave wan trufala fren? ?Hu olgeta we oli giaman fren?

◻ ?Weples yu save faenem ol trufala fren? ?Yu mas fren wetem ol yangfala nomo, no olsem wanem?

◻ ?Sipos wan fren i kasem bigfala trabol, yu yu mas mekem wanem?

◻ Talem fo rod blong gat ol trufala fren.

[Tok blong makem poen long pej 66]

“Ol niufala ‘fren’ blong mi oli lanem mi long plante samting—olsem wanem blong stilim ol tep, yusum ol giaman jek blong pem samting, smok drag ya mariuana. Biaen, oli lanem mi olsem wanem blong faenem 20,000 vatu evri dei blong pem ol drag we mi nidim”

[Bokis blong pija long pej 68, 69]

?Bambae Mi Mi Ripotem Fren Blong Mi?

?Sipos yu save se fren blong yu i stap tekem drag, i mekem nogud wetem woman no man, i stap trikim narafala, no i stap stil, bambae yu ripotem hem? Plante yangfala oli no save mekem olsem, from we oli folem wan promes we plante yangfala oli mekem, se oli mas haedem ol nogud fasin blong ol fren blong olgeta.

Sam yangfala oli fraet se bambae ol narafala oli singaot olgeta se “man blong ripot.” Sam oli gat rong tingting se sipos oli ripotem wan fren, oli no stap tru long hem. Oli ting se fasin blong stretem wan man i spolem hem nomo, taswe sipos oli haedem rong blong wan fren, oli ting se oli stap mekem i gud long hem. Mo tu, oli fraet se sipos oli ripotem wan fren, bambae ol narafala yangfala oli save jikim olgeta, mo bambae oli no moa fren wetem olgeta.

Boe ya, Lee, i faenemaot se besfren blong hem Chris, i stap smok. Lee i talem se: “!Tingting blong mi i stap stikim mi, from we mi mi save se mi mas talemaot samting ya!” Wan yangfala long Baebol i fesem semkaen trabol ya. “Josef, hem i wan yang boe we i gat seventin yia blong hem, mo oltaem i stap joen wetem ol brata blong hem blong lukaot long ol sipsip mo ol nani blong papa blong olgeta. . . . Hem i stap ripotem olgeta long papa blong olgeta.” (Jenesis 37:2) Josef i save se sipos hem i no ripotem ol brata blong hem, oli save kasem trabol we i mekem se oli no moa frengud wetem God.

Sin i gat paoa blong spolem man. Man we i mekem nogud i nidim narafala blong givhan long hem. Maet narafala i yusum Baebol blong stretemgud hem. Sipos i no mekem olsem, maet man ya i go nogud moa. (Prija 8:11) Taswe, sipos yu haedem sin blong fren blong yu, bambae yu no givhan long hem, be maet bambae yu spolem hem nomo.

From samting ya, Baebol i givim advaes ya se: ‘Ol brata mo sista. Sipos wan long yufala i foldaon, yufala we spirit blong God i stap long yufala, yufala i mas givhan long hem blong stretem hem. Be yufala i mas mekem long kwaet fasin.’ (Galesia 6:1) Ating yu harem se yu yu no gat ol fasin we Baebol i talem se yu nidim blong stretem fren blong yu. Sipos yu tingting olsemia, i gud yu toktok long narafala we hem i naf blong halpem fren blong yu.

I impoten tumas we yu go luk fren blong yu stret, blong talemaot rong blong hem. (Skelem wetem Matiu 18:15.) Blong mekem olsem, tingting blong yu i mas strong, yu no mas fraet. Yu mas talem stret long hem wanem samting yu save long saed blong sin blong hem, mo olsem wanem yu save samting ya. Yu mas pruvum ol tok blong yu. (Skelem wetem Jon 16:8.) Yu no mas promes blong stap kwaet, from we ol promes ya oli no stret long ae blong God. God i agensem man we i haedem sin.—Ol Proveb 28:13.

Maet yu rong taem yu talem se fren blong yu i mekem sin. (Ol Proveb 18:13) Be sipos hem i bin mekem, ating hem i glad we yu yu tokbaot trabol ya long klia ples. Yu mas lesingud long hem. (Jemes 1:19) Taem hem i talemaot filing blong hem long yu, yu no mas jajem hem mo blokem hem wetem ol tok olsem: “!Yu yu mekem samting we i nogud tumas ya!” Yu no mas tok kros long hem, se: “?Olsem wanem yu save mekem samting ya?” Traem kasem save long filing blong hem.—1 Pita 3:8.

Plante taem, samting we yumi save mekem blong givhan long ol fren olsem, i no naf. Taswe, yu mas strong long hem blong go talemaot sin ya long papa mama blong hem no long wan narafala bigman we hem i naf blong halpem hem. ?Be, olsem wanem sipos hem i no wantem mekem olsem? Yu mas talem long hem se bambae yu letem sam dei i pas blong hem i go stretem bisnes ya. Be, sipos hem i no stretem, yu nao, olsem trufala fren blong hem, yu mas go luk wan man we i save stretem.—Ol Proveb 17:17.

Fastaem, ating fren blong yu bambae i no kasem save from wanem yu yu mekem olsem. Maet hem i harem nogud, i kros long yu, i no moa wantem fren wetem yu. Be Lee i talem se: “Mi save se mi mekem wan gudfala samting taem mi ripotem hem. Tingting blong mi i no moa stikim mi, from we naoia Chris i stap kasem help we hem i nidim. Biaen, hem i kam luk mi, i talem se hem i no kros from samting we mi mi mekem. Tok ya tu i mekem mi mi harem gud.”

Sipos fren blong yu i stap kros longtaem from we yu bin ripotem hem, hemia i soem se hem i no wan trufala fren. Be, yu yu save glad from we yu bin stap tru long God mo yu bin soemaot se yu yu wan trufala fren.

[Tok blong pija long pej 67]

?I hadwok long yu blong faenem ol fren?

[Tok blong pija long pej 70]

Blong faenem ol fren, yu mas intres long ol narafala