Japta 8

Oli Ronwe Long Wan Strong Rula

JOSEF i wekemap Meri. Hem i hareap blong givim wan nyus long hem. Enjel blong Jeova i jes kamtru long hem, i talem long hem se: “Yu girap, yu tekem pikinini ya wetem mama blong hem, yufala i ronwe i go long Ijip. Mo yufala i mas stap long ples ya longwe, gogo bambae mi talem long yu, blong yufala i kambak. From we bambae i no longtaem, King Herod i lukaot pikinini ya blong kilim hem i ded.”

Ale kwiktaem trifala ya i ronwe. I gud we trifala ya i go kwik, from we Herod i faenemaot se ol man blong lukluk long sta oli trikim hem, oli aot long kantri ya. Herod i bin talem long olgeta se taem oli faenem Jisas, oli mas mekem ripot long hem. Be oli no mekem. Taswe Herod i kros tumas. Blong traem kilim Jisas i ded, hem i talem long ol soldia blong hem, blong oli go lukaot olgeta pikinini we oli boe, we oli stap long Betlehem mo ol ples raonabaot, we yia blong olgeta i no bitim tu yia yet, blong kilim olgeta oli ded. Hem i kaontem taem ya from save we hem i kasem finis long ol man blong lukluk long sta, we oli kam long Is.

!I nogud tumas blong luk we olgeta oli stap kilim ol pikinini boe oli ded! Ol soldia blong Herod oli stap brekemdaon doa blong ol haos wanwan. Taem oli faenem wan pikinini boe, oli tekemaot hem long han blong mama blong hem. ?Oli kilim hamas pikinini i ded? Yumi no save, be ol krae mo sore blong ol mama i mekem tok we profet blong God Jeremaea i raetemdaon long Baebol i kamtru.

Long taem ya, Josef wetem famle blong hem oli kamtru finis long Ijip, nao oli stap sef long ples ya. Wan naet, Josef i luk enjel blong Jeova long wan drim. Hem i talem long Josef se: “Yu girap, yu tekem pikinini ya wetem mama blong hem, yufala i gobak bakegen long kantri ya Isrel. From we olgeta ya bifo we oli wantem kilim pikinini ya, oli ded finis.” Wan narafala profet tok blong Baebol i talem se God bambae i singaot pikinini blong hem, blong hem i kamaot long Ijip. Ale blong mekem profet tok ya i kamtru, famle ya i gobak long kantri blong olgeta.

Bifo we oli ronwe oli go long Ijip, oli stap long taon ya Betlehem, long Judia. I luk olsem we Josef i wantem stap long ples ya bakegen. Be hem i harem we rabis pikinini blong Herod, nem blong hem Akaleas, i tekem ples blong papa blong hem, nao hem i king long Judia. Nao Jeova i tok long hem bakegen long wan drim, blong givim woning long hem. Ale Josef wetem famle blong hem oli aot long ples ya, oli go stap long not, long taon ya Nasaret, long Galili. Taon ya i longwe long ples we hem i stampa blong skul blong ol man Isrel. Ale Jisas i gruap long ples ya. Matyu 2:13-23; Jeremaea 31:15; Hosea 11:1.

▪ ?Taem ol man blong lukluk long sta oli no kambak long Herod, King ya i mekem wanem rabis samting? ?Olsem wanem Jisas i stap sef long taem ya?

▪ ?Taem Josef i aot long Ijip i kambak long kantri blong hem, from wanem hem i no go stap long Betlehem?

▪ ?Wanem profet tok blong Baebol oli kamtru long taem ya?