Japta 24

?From Wanem Jisas i Kam Long Wol?

LONG dei ya, Jisas i bin stap long Kapaneam wetem fo disaepol blong hem. Hem i bisi oltaem long dei ya. Long sapa, ol man Kapaneam oli tekem ol sikman blong olgeta oli kam long Jisas, blong hem i mekem olgeta oli kamgud bakegen. Long dei ya, Jisas i no save stap kwaet hem wan, long wan ples we i no gat man.

Long nekis dei, long eli moning, taem i no brok delaet yet, Jisas i girap, i goaot, hem wan nomo. Hem i go long wan ples we i no gat man long hem, nao hem i prea long Papa blong hem. Be smoltaem nomo, Jisas i stap hem wan. From we taem Pita wetem ol fren blong hem, oli luk we Jisas i no moa stap, oli go lukaotem hem.

Taem oli faenem Jisas, Pita i talem long hem se: “Olgeta man oli stap lukaot yu.” Ol man Kapaneam oli wantem we Jisas i stap wetem olgeta. Oli laekem tumas ol samting we Jisas i mekem blong givhan long olgeta. ?Be wanem bigfala risen from wanem Jisas i kam long wol? ?Blong mekem ol sikman oli gud bakegen nomo? ?Jisas i talem wanem long saed ya?

Store long Baebol i talem ansa we Jisas i givim long ol disaepol blong hem, i se: “I gud yumi go long ol velej raonabaot blong mi prij long sam narafala ples bakegen. From we mi mi kam long ples ya blong mekem wok ya.” Ol man oli traem blokem Jisas blong i no livim olgeta. Be hem i talem se: “No, be mi mas go long ol narafala velej ya tu, mi mi mas talemaot gud nyus [blong Kingdom blong God long olgeta, NW]. From we God i sanem mi blong mi mekem olsem.”

Yes, bigfala risen from wanem Jisas i kam long wol, i blong talemaot Kingdom blong God. Kingdom ya nao bambae i leftemap nem blong Papa blong hem, mo bambae i tekemaot olgeta sik blong ol man blong olwe. Be blong soemaot se God i sanem hem, Jisas i mekem plante sikman oli gud bakegen. Plante handred yia bifo, Moses i mekem samting we i kolosap sem mak. Hem i mekem sam merikel blong pruvum se hem i man blong God.

Nao Jisas i aot long Kapaneam, i go long ol narafala velej blong prij, mo fofala disaepol oli go wetem hem. Hemia Pita, mo brata blong hem Andru, mo Jon, wetem brata blong hem Jemes. Ating yu rimemba we wan wik bifo, Jisas i singaot fofala ya blong oli kam ol faswan disaepol we oli wokbaot wetem hem oltaem.

Nao Jisas i stap wokbaot wetem fofala disaepol blong hem, ale oli stap prij long olgeta ples long Galili. !Mo wok blong olgeta i karem gudfala frut! Nyus blong ol wok blong hem i kavremap ol ples ya, i go kasem Siria. Mo plante man tumas oli biaen long hem. Olgeta ya oli aot long Galili, mo long Judia, mo long ol ples long narasaed Jodan Reva i go, nao oli biaen long Jisas wetem ol disaepol blong hem. Mak 1:35-39; Luk 4:42, 43; Matyu 4:23-25; Eksodas 4:1-9, 30, 31.

▪ ?Jisas i bisi fuldei long Kapaneam, nao wanem i hapen long nekis moning?

▪ ?From wanem God i sanem Jisas i kam long wol? ?From wanem hem i mekem plante merikel?

▪ ?Taem Jisas i go prij long ol ples olbaot long Galili, hem i tekem hu i go wetem hem? ?Wanem frut blong ol wok blong Jisas long ples ya?