Japta 100

Parabol Blong Selva Mane

ATING Jisas i stap yet long haos blong Sakias. Hem i bin stap smoltaem long ples ya taem hem i wokbaot i go long Jerusalem. Ol disaepol blong hem oli ting se taem oli kasem Jerusalem, bambae Jisas i talemaot se hem nao hem i Mesaea. Mo oli ting se bambae hem i stanemap Kingdom blong hem naoia nomo. Blong stretem tingting ya mo blong soemaot se i longtaem yet bifo we Kingdom i save stanap, Jisas i talem wan parabol.

Hem i talem se: “I gat wan haeman we i wantem go long wan narafala kantri longwe, blong kasem paoa blong kam king, blong bambae i kambak, i king.” Long parabol ya, “haeman” i minim Jisas. Mo “wan narafala kantri longwe,” hemia heven. Yes, taem Jisas i go antap long heven, Papa blong hem i givim paoa long hem blong hem i save rul olsem king.

Bifo we haeman ya i aot long ples blong hem, hem i singaot ten man blong wok blong hem oli kam long hem, nao i givim wan selva mane long evriwan. Selva mane ya oli kolem ‘maena.’ Nao hem i talem long olgeta se: “Yufala i yusum mane ya blong wokem bisnes, mo blong winim mane, gogo bambae mi mi kambak bakegen.” Ol ten man blong wok ya oli minim ol faswan disaepol blong Jisas. Be i gat wan bigfala mining moa. I minim olgeta man we God i givim jans long olgeta blong go rul wetem Jisas long Kingdom blong heven.

Ol selva mane ya oli sas tumas. Wan selva mane i olsem pei blong wan man we i wok tri manis long garen. ?Be ol selva mane ya oli saen blong wanem? ?Mo ol man blong wok blong haeman ya, oli mas yusum mane ya blong wokem wanem kaen bisnes?

Ol selva mane i minim olgeta samting we ol disaepol blong Jisas oli save yusum blong hivimap moa man we oli save rul wetem Kraes long Kingdom blong heven. Oli mas yusum ol samting ya gogo Jisas i kambak olsem king blong Kingdom ya. Taem hem i laef bakegen long ded mo hem i soemaot hem long ol disaepol blong hem, hemia nao taem we hem i givim ol selva mane long olgeta, blong oli save pulum moa man oli kam disaepol blong hem. Olsem ya nao, oli save mekem kampani blong Kingdom blong heven i kam bigwan moa.

Nao Jisas i gohed long parabol ya, i se: “Be ol man ples blong hem [haeman ya] oli no laekem hem, mo oli sanem ol man blong karem tok blong olgeta, blong oli folem man ya, blong talem long olgeta longwe se: ‘Mifala i no wantem we man ya bambae i king blong mifala.’ ” Ol man ples blong haeman ya i minim ol man Isrel, hemia ol man Jyu. Be i no minim ol disaepol blong hem. Taem Jisas i go antap long heven, ol man Jyu oli mekem trabol long ol disaepol blong hem. Oli soemaot se oli no wantem we hem i kam king long olgeta. Fasin blong olgeta i sem mak long fasin blong ol man ples we oli sanemaot ol man blong karem tok blong ol.

?Ol ten man blong wok blong haeman ya, oli yusum selva mane blong olgeta olsem wanem? Jisas i eksplenem se: “Olgeta longwe oli givim paoa long hem blong hem i kam king. Nao taem hem i kambak, hem i singaot ol man blong wok ya blong hem blong oli kam long hem, blong i harem we oli winim hamas long ol mane ya blong hem we oli stap yusum. Nao faswan i kam stanap long fes blong hem, i talem se: ‘Masta, long mane ya blong yu, mi winim ten mane olsem antap bakegen.’ Nao Masta blong hem i talem long hem, i se ‘Ei, wan gudfala wok ya. Yu yu wan gudfala man. From we yu yu mekem i stret gud long smol bisnes ya nomo we mi putum long han blong yu, bambae mi mi putumap yu blong yu gavman long ten bigfala taon.’ Nao sekenwan i kam, i talem se ‘Masta, long mane ya blong yu, mi mi winim faef mane olsem antap bakegen.’ Mo masta ya i talem long hem, i se ‘Mo yu, bambae mi putumap yu blong yu gavman long faef bigfala taon.’ ”

Slef ya we i holem ten selva mane i saen blong kampani blong ol disaepol blong Jisas, i stat long Pentekos long 33 K.T., i kam kasem naoia. Ol aposol blong hem tu oli haf blong kampani ya. Olgeta we oli holem faef selva mane oli saen blong wan narafala kampani bakegen. Olgeta long kampani ya oli laef long semtaem wetem olgeta long narafala kampani. Mo oli tekem evri jans blong yusum ol samting blong olgeta blong hivimap moa samting blong king long wol. Tufala kampani ya i strong blong talemaot gud nyus blong Kingdom blong God. From samting ya, plante man we hat blong olgeta i stret oli kam Kristin. Naen long olgeta slef ya oli mekem gudfala bisnes, mo oli kasem plante moa samting from.

Jisas i gohed long parabol, i se: “Nao wan narafala man blong wok i kam, i talem se ‘Masta, hemia mane blong yu. Mi mi kavremap long wan kaliko, mi putum i stap gud. From we mi fraet long yu. From we yu yu wan had man. Yu yu save pikimap ol samting we narafala man i putum i stap, mo yu save tekem kakae long garen we yu yu no wokem.’ Be masta ya i talem se ‘A, yu rabis man. Tok blong yu nomo i jajem yu. Yu save finis we mi save pikimap ol samting we narafala man i putum i stap, mo mi save tekem kakae long garen we mi no wokem. ?Weswe yu no go putum mane blong mi long bang? Sipos yu mekem olsem, taem ya we mi mi kambak bambae mi save tekem mane blong mi wetem intres ya we bang i stap pem, be yu no putum.’ Nao i talem long ol man raonabaot, i se ‘Yufala i tekemaot mane ya long hem, yufala i go givim long man ya we i gat ten mane blong hem.’ ”

Rabis slef ya we i lusum selva mane blong hem, i olsem wan man we i lusum ples blong hem long Kingdom blong heven. Sipos hem i bin rul long Kingdom, i olsem we hem i rul antap long ten no faef bigfala taon. Be hem i lusum blesing ya. Mo tu yu save makem gud we masta i no talem long man ya se hem i wan rabis slef from we hem i mekem wan samting we i nogud. Be hem i wan rabis slef from we hem i slak blong mekem wok blong masta blong hem, hem i no mekem bisnes blong masta blong hem i kam bigwan moa.

Oraet, masta i tekemaot selva mane long rabis slef ya, i givim long faswan slef. Be sam long olgeta oli no glad, oli talem se: “!Be masta, hem i gat ten mane finis!” Be Jisas i talem long olgeta se: “Man we i gat samting finis, bambae hem i save kasem sam moa samting bakegen. Be man we i no gat samting, wanem smol samting nomo we hem i gat, bambae hem i mas lusum. Be long bisnes blong ol enemi ya blong mi, we oli no wantem we bambae mi mi king blong olgeta, yufala i go tekem olgeta i kam, yufala i kilim olgeta oli ded naoia, long fes blong mi.” Luk 19:11-27; Matyu 28:19, 20.

▪ ?From wanem Jisas i talem parabol blong ol selva mane?

▪ ?Haeman ya hem i saen blong hu? ?Mo narafala kantri longwe we hem i go long hem i minim wanem?

▪ ?Hu ya ol man blong wok blong haeman ya? ?Ol selva mane oli saen blong wanem?

▪ ?Hu ya ol man ples blong haeman ya? ?Mo olsem wanem oli soemaot se oli no laekem hem?

▪ ?From wanem masta i talem long wan slef se hem i wan rabis man? ?Taem slef ya i lusum selva mane blong hem, hemia i saen blong wanem?