Japta 132

Long Raetsaed Blong God

LONG Pentekos, tabu speret blong God i kam fulap long olgeta. Samting ya i soemaot se Jisas i kasem heven bakegen. Smoltaem biaen, disaepol ya Steven i luk wan samting olsem wan drim. Samting ya tu i pruvum se Jisas i stap bakegen long heven. Ol man oli stap stonem Steven from gudfala wok we hem i stap mekem blong talemaot Jisas. Nao Steven i talem se: “Yufala i luk. Mi mi luk we heven i open, mo we Pikinini blong Man hem i stap stanap long raet saed blong God.”

Jisas i stap stanap long raetsaed blong God, i stap wet blong Papa blong hem i givim wan oda long hem, i se: “Yu bambae yu rulum ol enemi blong yu.” ?Be taem Jisas i stap wet blong obei long oda ya, hem i mekem wanem? Hem i rul long ol disaepol blong hem we tabu speret i makemaot olgeta finis. Hem i lidim olgeta long wok blong prij. Mo hem i stap rerem olgeta blong bambae oli save rul wetem hem long Kingdom blong Papa blong hem, taem oli laef bakegen long ded.

Wan eksampel: Jisas i jusumaot Sol (biaen ol man oli singaot hem long nem we ol man Rom oli putum long hem, se Pol), blong hem i lidim wok ya blong mekem disaepol long plante narafala ples. Fastaem Sol i bilif strong long Loa blong God, be hem i folem rong tingting blong ol lida blong skul blong ol man Isrel. From samting ya, hem i agri we ol man oli kilim Steven i ded. Be i no hemia nomo. Hae pris ya Kaeafas hem i givim raet long Sol blong go long Damaskes blong holem ol man mo ol woman long ples ya we oli stap folem Jisas, mo blong tekem olgeta oli kambak long Jerusalem bakegen. Nao taem Sol i stap go long Damaskes, wantaem nomo, i gat wan laet i saenaot long skae, i kam kasem hem mo ol ples raonabaot long hem. Ale Sol i foldaon long graon.

Nao hem i harem wan tok, be hem i no luk wan man we i talem tok ya. Tok ya i olsem: “!Sol! !Sol! ?Weswe yu yu stap ronem mi olsem?” Sol i askem se: “?Masta, yu hu?”

Nao tok ya i talem se: “Mi Jisas ya we yu stap ronem mi.”

Bigfala laet ya we i kasem Sol olsem wan merikel, i blaenem ae blong hem. Nao Jisas i talem long hem blong girap, mo blong wokbaot i go long taon ya Damaskes. Hem i mas wet long ples ya blong wan man i talemaot long hem wanem samting we hem i mas mekem. Nao wan disaepol blong Jisas, nem blong hem Ananaeas, i luk Jisas long wan samting olsem drim. Long saed blong Sol, Jisas i talem long Ananaeas se: “Mi mi jusumaot hem finis, blong hem i man blong wok blong mi. Hem bambae i talemaot nem blong mi long ol hiten man, mo long ol king, mo long ol man Isrel tu.”

Tru ya, from we Jisas i givhan long olgeta, Sol (nao oli singaot hem se Pol) mo ol narafala man blong Jisas oli gat gudfala frut long wok blong prij mo blong tijim ol man. 25 yia biaen we Jisas i kamtru long hem long rod we i go long Damaskes, Pol i raetemdaon se “gud nyus ya,” ol man “oli talemaot finis long olgeta man long wol.”

Plante yia i pas, ale Jisas i givim sam vison no drim long aposol ya we Jisas i laekem hem tumas, Jon. Jon i eksplenem ol vison ya long wan buk blong Baebol, nem blong hem Revelesen. Taem Jon i kasem ol vison ya, i olsem we hem i stap laef yet long taem we Jisas i kambak blong rul olsem king long Kingdom blong hem. Jon i talem se ‘paoa blong tabu speret i holem hem,’ nao i olsem we i tekem hem i go long fyuja, long ‘dei blong Masta.’ ?Wanem “dei” ya?

Taem yumi stadi gud long ol profet tok blong Baebol, mo long profet tok we Jisas i givim long saed blong ol las dei, i klia se ‘dei blong Masta’ i stat long yia ya 1914. Plante bigfala samting i stat kamaot long yia ya. !Yes, sam man we oli laef long 1914, oli laef i stap yet! Ale long 1914 Jisas i kambak, be ol man oli no luk hem. Hem i kambak long kwaet fasin, i no gat wan bigfala selebresen. Mo ol trufala man blong hem nomo oli luksave se hem i kambak finis. !Long yia ya nao, Jeova i talem long Jisas se hem i mas stat rul long ol enemi blong hem!

Jisas i obei long Papa blong hem, ale hem i klinim heven. Hem i sakemaot Setan mo ol rabis enjel blong hem, oli aot long heven oli kamdaon long wol. Long vison we hem i kasem, Jon i luk ol ­samting ya. Afta, hem i harem wan voes i kamaot long heven i se: “Naoia God blong yumi i sevem yumi. Naoia hem i soemaot we hem i gat paoa, mo hem i king. Naoia Mesaea blong hem i soemaot we hem i gat paoa long evri samting.” !Yes, long 1914, Kraes i stat rul olsem King!

!Hemia i gud nyus long olgeta long heven we oli stap wosip long Jeova! Taswe tok ya i go long olgeta, i se: “Yu heven, mo yufala evriwan we i stap long heven, yufala i mas harem gud.” ?Be olsem wanem long ol man long wol? Voes we i kamaot long heven i gohed i se: “Be sore tumas long yu, graon, mo long yu, solwora. From we Setan i kamdaon finis long yufala, mo hem i kros tumas, from we i save, i gat smol taem nomo blong hem i stap yet.”

Naoia yumi stap long smol taem ya. Wan wok blong seraotem ol man i stap gohed—long wan grup i gat olgeta we bambae oli go insaed long nyufala wol blong God, mo long narafala grup i gat olgeta we bambae oli lus. Tru, naoia yu yu stap jusumaot wanem fyuja blong yu. Kraes i stap lidim wok ya blong talemaot gud nyus blong Kingdom blong God long olgeta ples long wol. Samting we yu yu mekem naoia, taem yu harem gud nyus ya, i soemaot wanem fyuja we yu yu jusumaot.

Taem wok blong seraotem ol man i finis, God bambae i yusum Jisas Kraes blong finisim olgeta fasin blong Setan long wol, mo blong kilim ol man we oli sapotem ol fasin blong Setan. Baebol i talem se Jisas bambae i mekem wan bigfala faet blong tekemaot ol rabis fasin long wol ya, nem blong faet ya Ha-Magedon no Amageden. Afta, Jisas, we hem i hae moa long olgeta man long heven mo long wol, we Jeova God nomo i hae moa long hem, bambae hem i holem Setan wetem ol rabis enjel blong hem. Bambae hem i fasem olgeta blong oli stap 1,000 yia long wan “bigfala hol.” Hemia i min se oli no save mekem wan samting nating, oli stap olsem we oli ded nomo. Ol Wok 7:55-60; 8:1-3; 9:1-19; 16:6-10; Ol Sam 110:1, 2; Hibrus 10:12, 13; 1 Pita 3:22; Luk 22:28-30; Kolosi 1:13, 23; Revelesen 1:1, 10; 12:7-12; 16:14-16; 20:1-3; Matyu 24:14; 25:31-33.

▪ ?Taem Jisas i go antap long heven, hem i go stap wea? ?Hem i stap wet long wanem?

▪ ?Afta we Jisas i go long heven hem i rul long hu? ?Olsem wanem hem i soemaot se hem i stap rul long olgeta ya?

▪ ?‘Dei blong Masta’ i stat wetaem? ?Long stat blong dei ya, wanem i kamaot?

▪ ?Wanem wok blong seraotem ol man i stap gohed tede, we i gat paoa long laef blong yumi evriwan? ?Olsem wanem ol man oli stap jusumaot wanem fyuja blong olgeta?

▪ ?Taem wok blong seraotem ol man i finis, wanem bambae i hapen?