Haf 1
?God i Rili Kea Long Yumi?
1, 2. ?Wanem kwestin ol man oli stap askem long saed blong God, mo from wanem?
Long wan taem long laef blong yu, ating yu askem se: “?Sipos i gat wan God we i rili kea long yumi, from wanem i letem tumas trabol i stap yet?” Yumi evriwan i kasem trabol finis, no ating yumi save wan man we i kasem trabol.
2 I tru nomo, long histri ol man oli harem nogud long bodi mo long tingting blong olgeta from ol faet, raf fasin, fasin blong brekem loa, kruked fasin, fasin pua, sik mo from ded blong olgeta we oli laekem tumas. Long las wan handred yia nomo, namba blong ol man we oli ded long faet i bitim 100 milyan. Ol handred milyan narafala man oli bin kasem kil no oli lusum haos mo olting blong olgeta. Long taem blong yumi plante nogud samting oli hapen mekem se fulap man oli harem nogud, oli krae mo oli lusum hop.
3, 4. ?Wanem tingting blong plante man from we God i letem trabol i stap?
3 Tingting blong sam man i kam konkon mo oli talem se sipos God i stap, hem i no rili kea long yumi. No oli ting se i no gat God nating. Eksampel, long taem blong Faswan Bigfala Faet Blong Wol wan man i harem nogud, oli kilim sam fren mo famle blong hem oli ded from fasin blong no laekem man blong narafala kantri. Man ya i talem se: “?God i stap wea taem mifala i nidim hem?” Wan narafala man, we i laef tru long taem we ol Nasi oli kilim milyan man oli ded long Namba Tu Bigfala Faet Blong Wol, hem i harem nogud tumas from ol trabol soa we hem i luk, nao i talem se: “Hat blong mi i konkon we sipos yufala i save likim hat blong mi, bambae yufala i kasem posen.”
4 Olsemia nao, plante man oli no save from wanem wan gudfala God i save letem ol samting nogud oli kamaot. Oli no save sipos God i rili kea long yumi mo sipos hem i stap. Mo plante long olgeta oli ting se trabol bambae i stap oltaem long laef blong man.
[Tok blong pija long pej 2, 3]
?Wan nyufala wol we i no gat trabol long hem i kolosap?