Haf 5
Wan Gudfala Presen: Fasin Fri Blong Jusum Rod Blong Yumi
1, 2. ?Wanem gudfala presen ya we God i givim long man?
BLONG save from wanem God i letem trabol i stap mo olsem wanem bambae i finisim hem, fastaem yumi mas save olsem wanem hem i mekem yumi. Hem i no mekem yumi wetem wan bodi mo wan bren nomo. Hem i mekem yumi wetem tingting mo filing tu.
2 Wan bigfala haf blong tingting mo filing blong yumi hemia we yumi fri blong jusum rod blong yumi. Yes, God i putum long yumi fasin ya we yumi fri blong jusum rod blong yumi. Tru ya hemia i wan gudfala presen we i kamaot long hem.
Olsem Wanem Hem i Mekem Yumi
3-5. ?From wanem yumi glad long fasin fri blong jus?
3 Yumi lukluk nao olsem wanem fasin blong jus i joen wetem fasin ya we God i letem trabol i stap yet. Fastaem, tingtinggud long ol kwestin ya: ?Yu yu glad blong jusum wanem we yu wantem mekem mo talem, wanem bambae yu kakae mo yu werem, wanem wok bambae yu mekem, weples mo olsem wanem bambae yu laef? ?No, yu yu wantem we narafala i stap talem long yu ol tok we yu mas talem mo ol samting we yu mas mekem long evri menet long laef blong yu?
4 Wan man we i no krangke i no wantem se narafala i kontrolem laef blong hem oltaem olsem. ?From wanem? From fasin we God i putum long yumi fastaem. Baebol i talem se God i mekem man blong ‘i tekem fasin blong hem [God], olsem hem nomo,’ mo wan long ol fasin we God hem wan i gat hemia fasin fri blong jus. (Jenesis 1:26; Dutronome 7:6) Taem hem i mekem ol man, hem i givim gudfala fasin ya long olgeta—fri blong jus. From samting ya nao yumi harem nogud sipos ol strong lida oli bos tumas long yumi.
5 Taswe fasin blong yumi blong wantem stap fri i no wan mastik, from we God hem i God blong fasin fri. Baebol i talem se: “Taem Speret ya blong [Jeova, NW] i stap wetem man, hem i stap mekem man i fri.” (2 Korin 3:17) Olsemia nao, fasin fri blong jus, God i givim long yumi olsem haf long prapa fasin blong yumi we yumi bon wetem. Hem i save olsem wanem bambae tingting mo filing blong yumi oli wok, taswe hem i savegud se bambae yumi glad moa sipos yumi fri blong jus.
6. ?Olsem wanem God i mekem bren blong yumi blong i save wokgud wetem fasin fri blong jus?
6 Wetem presen ya blong fri blong jus, God i joenem fasin blong tingting, blong skelem olgeta samting, blong mekem ol disisin mo blong luksave wanem i stret mo wanem i no stret. (Hibrus 5:14) Olsem nao, fasin fri blong jus bambae i stanap long fasin waes. Yumi no olsem ol robot we oli no save tingting, we oli no naf blong jusum rod blong olgeta. Mo yumi no olsem ol anamol tu we oli folem plan we God i putum finis long bren blong olgeta blong oli mekem oltaem. Defren nao, God i wokem gudfala bren blong yumi blong i wokgud wetem fasin fri blong yumi blong jus.
Wan Gudfala Stat
7, 8. ?Wanem gudfala stat ya we God i givim long tufala faswan papa mama blong yumi?
7 Antap long presen ya blong fri blong jus, faswan papa mama blong yumi, Adam mo Iv, tufala i kasem evri samting we man i nidim. Samting ya i pruvum se God i kea long tufala. Hem i putum tufala long wan bigfala garen, wan paradaes. Tufala i gat evri samting long saed blong bodi. Tufala i gat tingting mo bodi we i stretgud olgeta, taswe tufala i no save kam olfala, tufala i no save sik mo ded—tufala i save laef foreva. Tufala i save gat ol pikinini we oli stretgud mo olgeta tu oli save haremgud blong olwe. Famle blong man i save kam plante mo oli save gat wok we oli glad long hem: mekem ful wol i kam wan paradaes.—Jenesis 1:26-30; 2:15.
8 Long saed blong wanem we God i givim long olgeta, Baebol i talem se: “God i luk olgeta samting we i wokem finis, mo olgeta wok blong hem i gud tumas.” (Jenesis 1:31, NW) Baebol i tokbaot God tu se: “Ol wok blong hem oli stret gud olgeta.” (Dutronome 32:4) Yes, Man ya we i Wokem olgeta samting hem i givim long famle blong man wan stat we i stret olgeta. Hem i no save mekem moa blong oli stapgud. !Yes, God i rili kea long olgeta!
Fasin Fri i Gat Mak Blong Hem
9, 10. ?From wanem fasin fri blong jus i mas gat mak blong hem?
9 ?Be God i talem se fasin fri blong jus i no gat mak blong hem? Tingbaot wan bigfala taon we i no gat ol loa blong ol trak oli folem taem oli ron long rod, we trak i save ron weples hem i wantem mo long wanem spid we hem i wantem. ?Yu yu wantem draev long wan ples olsem? No gat, from we ol trak bambae oli fasfas mo bambae i gat plante akseden.
10 Sem mak bakegen long fasin blong jusum rod blong yumi, presen ya blong God. Fasin fri we i no gat mak blong hem bambae i mekem laef blong ol man i olbaot. I mas gat ol loa blong lidim ol man long ol wok we oli mekem. Tok blong God i talem olsem: “Yufala i mas folem fasin blong man we i fri, mo yufala i neva mas yusum fasin fri ya olsem wan eskyus blong mekem nogud fasin.” (1 Pita 2:16, JB) God i wantem we i gat mak blong fasin fri blong mekem i gud long olgeta man. Plan blong hem hemia we yumi mas gat fasin fri, i no fri olgeta, be fri long sam samting nomo, folem ol loa.
?Ol Loa Blong Hu?
11. ?God i wokem yumi blong yumi mas obei long loa blong hu?
11 ?Bambae yumi obei long ol loa blong hu? Long wan narafala haf long 1 Pita 2:16 (JB) hem i talem olsem: “Yufala i slef blong God nomo.” Hem i no stap tokbaot wan nogud fasin slef, be hem i stap talem se God i wokem yumi olsem we sipos yumi folem ol loa blong hem, bambae yumi glad fulwan. (Matyu 22:35-40) Ol loa blong hem oli nambawan blong lidim yumi, bitim evri loa we ol man oli mekem. “Mi, Jeova, mi mi God blong yu, God ya we i stap tijim yu blong givhangud long yu. Mi mi stap mekem yu yu wokbaot long rod ya we yu yu mas wokbaot long hem.”—Aesea 48:17.
12. ?Wanem fasin fri blong jus, yumi save gat taem yumi folem ol loa blong God?
12 Nating se ol loa blong God oli putum mak we yumi no mas bitim long fasin fri blong yumi, be yumi fri bigwan yet blong jus. From samting ya, ol fasin blong ol man oli defdefren, nao famle blong man i gudwan. Tingbaot ol defren kakae, ol klos, myusek, ol pija, mo ol haos long olgeta ples blong wol. Yumi wantem we yumi nomo i jusum ol samting ya, bitim we wan narafala man i jus long ples blong yumi.
13. ?Wanem ol loa long saed blong bodi we yumi mas obei long olgeta sipos yumi wantem haremgud?
13 God i wokem yumi blong yumi glad sipos yumi folem ol loa blong hem we oli stap lidim man long ol fasin blong laef. Sem mak we yumi mas folem ol loa long saed blong bodi we God i mekem. Eksampel, sipos yumi no wantem luksave se i gat loa ya se evri samting oli foldaon sipos oli no stanap long graon, nao yumi jyam long wan hae ples, bambae yumi kasem kil no yumi save ded from. Sipos yumi no wantem luksave se i gat ol loa long saed blong bodi blong yumi, nao yumi no moa kakae, dring wora mo pulum win, bambae yumi ded.
14. ?Olsem wanem yumi save se God i no wokem ol man blong oli seraot long hem?
14 Yes, i tru nomo we God i mekem yumi blong yumi mas folem ol loa blong hem long saed blong bodi, sem mak nao, hem i wokem yumi blong yumi mas folem ol loa blong hem long ol fasin blong laef mo taem yumi joen wetem ol narafala man. (Matyu 4:4) God i no mekem ol man blong oli save seraot long Man we i Wokem olgeta mo haremgud tu long laef. Profet Jeremaea i talem se: “Man i no naf blong jusum wanem rod hem i mas wokbaot long hem. Plis Jeova, yu stretem mi.” (Jeremaea 10:23, 24) Taswe God i wokem ol man blong oli stap aninit long rul blong hem long evri samting, be i no aninit long prapa rul blong olgeta.
15. ?Ol loa blong God oli save kam hevi tumas long Adam mo Iv?
15 Fasin blong obei long ol loa blong God i no save kam hevi tumas long faswan papa mama blong yumi. Defren nao, samting ya i save mekem tufala i haremgud mo olgeta man we oli kamaot biaen long tufala oli save haremgud tu. Sipos faswan man mo woman tufala i folem ol loa we God i putumap, evri samting oli save gohed gud. !Sipos oli folem ol loa ya, naoia yumi stap long wan gudfala paradaes we yumi haremgud long hem mo yumi olsem wan famle blong man we oli joengud long lav! Nogud fasin, trabol mo ded neva oli save stap.
[Tok blong pija long pej 11]
Man we i Wokem yumi i givim wan gudfala stat long ol man
[Tok blong pija long pej 12]
?Yu yu wantem draev long ples we i gat plante trak long hem sipos i no gat loa blong ol draeva oli folem?