Haf 6
From Wanem God i Letem Trabol i Stap Yet
1, 2. ?Olsem wanem faswan papa mama blong yumi tufala i spolem gudfala stat we God i givim long tufala?
?WANEM samting i hapen? ?Wanem nao i spolem gudfala stat we God i givim long tufala faswan papa mama blong yumi long Paradaes long Iden? ?From wanem long plante taosen yia finis rabis fasin mo trabol i tekem ples blong pis mo fasin joengud we i stap long Paradaes bifo?
2 Ansa blong hem se Adam mo Iv tufala i no yusumgud fasin fri blong jus blong tufala. Tufala i fogetem se God i no wokem tufala blong oli gat gudfala laef sipos oli fogetem Hem mo ol loa blong hem. Tufala i jus blong seraot long God, tufala i ting se laef blong tufala bambae i kamgud moa olsemia. Tufala i bitim mak we God i putum long fasin fri blong jus blong tufala.—Jenesis, japta 3.
Kwestin Blong Hae Rul Blong Heven Mo Wol
3-5. ?From wanem God i no kilim i ded Adam mo Iv mo i statem laef bakegen wetem wan narafala man mo woman?
3 ?From wanem God i no kilim i ded Adam mo Iv mo i stat bakegen wetem wan narafala man mo woman? From we wan kwestin i stanap long saed blong hae rul blong hem, hemia raet blong hem blong rul we man i no save karemaot long hem.
4 Hemia nao kwestin we i stanap: ?Hu i gat raet blong rul, mo rul blong hu i stret? From we Hem i gat olgeta paoa mo Hem nomo i wokem evri samting, God i gat raet blong rul antap long olgeta. From we hem i waes tumas, fasin blong hem blong rul antap long olgeta i nambawan. Be oli agensem rul blong God. ?Mo tu, i gat wan samting i rong long man ya we God i mekem? Bambae yumi lukluk long ol haf we i kam biaen olsem wanem kwestin long saed blong fasin fasgud blong ol man long God i joen long bisnes ya.
5 Taem man i seraot long God, wan narafala kwestin i stanap: ?Ol man bambae oli harem i moa gud sipos oli no stap aninit long rul blong God? Man we i Wokem olgeta i savegud ansa blong kwestin ya, be blong ol man oli faenem ansa ya, hem i letem olgeta oli fri fulwan, olsem we oli wantem. Oli jusum rod ya olgeta nomo, ale God i letem olgeta.
6, 7. ?From wanem God i letem ol man oli fri fulwan blong longtaem?
6 Sipos God i givim inaf taem long olgeta man blong oli traem fasin fri ya we i fulwan, bambae hem i pruvum blong olwe sipos ol man oli stap moa gud aninit long rul blong God no long rul blong olgeta nomo. Mo hem i mas letem plante taem i pas blong ol man oli kasem ol hae mak long saed blong politik, ol bigfala faktri, sayens mo meresin.
7 From samting ya, God i letem ol man oli fri kam kasem taem blong yumi blong soemaot klia se taem ol man oli seraot long God, oli save lidimgud olgeta nomo, no no gat. Olsem nao, man i save jus blong folem kaen fasin no raf fasin, blong soem lav no fasin blong no laekem narafala, stret fasin no kruked fasin. Be hem i kasem frut blong ol samting we hem i jusum tu: hem i save mekem i stret mo i kasem pis, no hem i save mekem rabis fasin mo harem nogud.
Sam Speret Man Oli Agensem God
8, 9. (a) ?Olsem wanem fasin blong agensem God i kamaot long ples blong ol speret man? (b) ?Afta long Adam mo Iv, Setan i pulum hu bakegen blong agensem God?
8 I gat wan narafala poen we yumi evriwan i mas luklukgud long hem. I no faswan papa mama blong yumi nomo we tufala i agensem rul blong God. ?Be hu bakegen i laef long taem ya? Ol speret man. Bifo we God i mekem ol man, hem i mekem sam man we oli hae moa: olgeta enjel we oli plante tumas, we oli save laef long heven. God i mekem olgeta enjel ya oli fri blong jus tu mo oli nidim blong stap aninit long rul blong God.—Job 38:7; Ol Sam 104:4; Revelesen 5:11.
9 Baebol i soemaot se fasin blong agensem God i kamaot fastaem long ples blong ol speret man. Wan speret man i wantem kam fri olgeta. Hem i wantem tu we ol man long wol oli wosip long hem. (Matyu 4:8, 9) Speret man ya we i agensem God hem i gyaman long Adam mo Iv se God i blokem wan samting we tufala i save haremgud long hem nao hem i pulum tufala blong agensem God. (Jenesis 3:1-5) From samting ya oli kolem hem Devel (Man blong spolem nem blong narafala man) mo Setan (Man blong agensem man). Biaen, hem i pulum sam narafala speret man tu blong agensem God. Oli kolem olgeta ol rabis enjel.—Dutronome 32:17; Revelesen 12:9; 16:14.
10. ?Wanem frut i kamaot from ol man mo ol speret man oli agensem God?
10 Ol man long wol tu oli kam aninit long paoa blong Setan mo ol rabis enjel blong hem from we oli agensem God. From samting ya Baebol i kolem Setan “rabis god blong wol ya” mo hem “i satem tingting blong [ol man] finis.” Taswe Baebol i talem se: “olgeta man blong wol oli stap long paoa blong Setan.” Jisas hem wan i kolem Setan “masta blong wol ya.”—2 Korin 4:4; 1 Jon 5:19; Jon 12:31.
Tu Kwestin
11. ?Setan i agensem God long wanem narafala kwestin?
11 Setan i stanemap wan narafala kwestin blong agensem God. I olsem we hem i talem se God i rong long fasin blong Hem blong wokem man mo we i no gat man i save mekem i stret taem hem i kasem ol traem. Yes, hem i talem se sipos ol man oli kasem trabol bambae oli tok nogud long God. (Job 2:1-5) Long fasin ya, Setan i talem se ol man oli no save fasgud long God.
12-14. ?Olsem wanem taem we i pas bambae i soemaot trutok long saed blong tufala kwestin we Setan i stanemap?
12 From samting ya God i letem inaf taem i pas blong ol man we hem i wokem olgeta oli save luk olsem wanem bambae hem i stretem kwestin ya mo narafala kwestin long saed blong hae rul blong hem long heven mo wol. (Skelem Eksodas 9:16.) Olgeta samting we bambae oli kamtru long histri blong man bambae oli soemaot trutok long saed blong tufala kwestin ya.
13 Faswan samting, ?ol taem we oli pas bambae oli soemaot wanem long kwestin ya long saed blong hae rul blong God mo sipos hae rul blong hem i stret no no gat? ?Ol man oli naf blong rulum olgeta nomo, bitim we God i save rulum olgeta? ?Long olgeta gavman blong man we oli no stap folem ol loa blong God, i gat wan we i save mekem wan wol we i gat glad, i no gat faet, i no gat fasin blong brekem loa mo rabis fasin? ?I gat wankaen rul blong man we i save tekemaot fasin pua mo givim plante samting long ol man? ?I gat wan we i save finisim sik, fasin blong kam olfala mo ded? Hemia ol samting we rul blong God i save mekem.—Jenesis 1:26-31.
14 Long saed blong namba tu kwestin, ?ol yia we bambae oli pas bambae oli soemaot wanem long saed blong ol man long wol? ?God i rong long fasin blong hem blong wokem ol man? ?Bambae i gat samfala we oli mekem i stret nating se oli kasem trabol? ?Sam man bambae oli soemaot we oli wantem rul blong God bitim rul blong man we hem i seraot long God?
[Tok blong pija long pej 13]
God i letem taem long ol man blong kasem ol hae mak blong olgeta
[Credit Line]
Shuttle: Based on NASA photo