Haf 8
Plan Blong God Kolosap i Kamtru
1, 2. ?Wanem rod God i folem blong finisim trabol?
FAMLE blong man i harem nogud long plante yia long rul blong ol man nogud mo ol devel. I no minim se God i no kasem save long ol trabol blong yumi. Defren nao, long ol yia we oli pas finis, hem i stap wokem rod blong sevem ol man long ol fasin nogud mo long trabol.
2 Long taem we fasin stronghed i kamaot long Iden, God i stat blong soemaot plan blong hem blong stanemap wan gavman we bambae i mekem wol ya i kam paradaes blong ol man oli stap long hem. (Jenesis 3:15) Biaen, Jisas, nambawan Man blong Karem Tok blong God, hem i yusum fyuja gavman ya blong God olsem stampa tijing blong hem. Hem i talem se hemia nomo i hop blong olgeta man.—Daniel 2:44; Matyu 6:9, 10; 12:21.
3. ?Jisas i givim wanem nem long gavman ya blong God long fyuja, mo from wanem?
3 Jisas i putum nem blong gavman blong God ya blong fyuja se “kingdom blong heven,” (NW) from we bambae hem i rul long heven. (Matyu 4:17) Hem i givim wan narafala nem blong hem tu se “kingdom blong God,” (NW) from we God nao bambae i stanemap Kingdom ya. (Luk 17:20) Longtaem finis, God i yusum ol man blong hem olsem ol sekretari blong oli raetemdaon ol profet tok long saed blong olgeta we bambae oli rul long gavman ya mo wanem bambae gavman ya i mekem.
Nyu King Blong Wol
4, 5. ?Olsem wanem God i soemaot we Jisas i King we hem i putumap?
4 Kolosap tu taosen yia finis, Jisas nao i mekem plante profet tok oli kamtru long saed blong King ya blong Kingdom blong God. Hem i soemaot se God i jusum hem blong bambae hem i Jif blong gavman ya long heven we bambae i lidim ol man long wol. Antap moa, biaen long ded blong hem, God i mekem Jisas i laef bakegen long ded blong laef long heven olsem wan speret man we i gat bigfala paoa mo we i no save ded samtaem. Plante man oli luk Jisas afta we hem i laef bakegen.—Ol Wok 4:10; 9:1-9; Rom 1:1-4; 1 Korin 15:3-8.
5 Long taem ya Jisas i “sidaon long raet saed blong God.” (Hibrus 10:12) Long ples ya, hem i stap wet long taem ya we God bambae i givim paoa long hem blong hem i save wok olsem King long Kingdom blong God long heven. Olsemia nao profet tok blong Ol Sam 110:1 i kamtru, we God i talem long Jisas se: “Yu sidaon long raet saed blong mi, yu wet. Bambae mi mekem ol enemi blong yu oli stap daon, oli slef blong yu nomo.”
6. ?Olsem wanem Jisas i soemaot we hem i naf blong kam King long Kingdom blong God?
6 Taem hem i stap yet long wol, Jisas i soemaot we hem i naf blong mekem wok ya. Long ol traem we hem i kasem, hem i jusum blong stap strong long saed blong God. Taem hem i mekem olsem, hem i soemaot we Setan i bin gyaman taem hem i talem se i no gat man i save holemstrong long God sipos i kasem traem. Jisas, man we i stretgud olgeta, ‘namba tu Adam’ i soemaot we God i no rong taem hem i mekem ol man oli stretgud olgeta.—1 Korin 15:22, 45; Matyu 4:1-11.
7, 8. ?Wanem gudfala samting we Jisas i mekem taem hem i stap long wol, mo samting ya i soemaot wanem?
7 ?Hu lida blong wol we hem i mekem ol gudfala samting olsem Jisas i mekem long smoltaem we hem i mekem minista wok blong hem? Taem tabu speret blong God i givim paoa long hem, Jisas i mekem ol sikman, olgeta we oli no save wokbaot, ol blaen man, olgeta we sora blong olgeta i fas, mo olgeta we oli no save toktok oli kamgud bakegen. !Hem i go moa i mekem ol dedman oli laef bakegen! Hem i soemaot smol nomo wanem we bambae hem i mekem long ol man long olgeta ples long wol taem bambae hem i tekem paoa blong hem blong rul long Kingdom.—Matyu 15:30, 31; Luk 7:11-16.
8 Jisas i mekem plante gud samting taem hem i stap long wol ale disaepol blong hem Jon i talem se: “Nao i gat plante narafala samting we Jisas i mekem. Mo sipos ol man oli raetemdaon olgeta samting ya, mi mi ting se bambae wol ya i no naf. Bambae i no gat ples blong ol buk ya we oli save raetem olsem.”—Jon 21:25.a
9. ?From wanem ol man we oli gat gudfala tingting oli kam long Jisas?
9 Jisas i gat kaen fasin mo i karem trabol blong ol narafala, hem i gat wan dip lav long olgeta man. Hem i givhan long ol puaman mo long olgeta we ol man oli lukluk daon long olgeta, be hem i no mekem i nogud tu long ol rijman no olgeta we oli gat haenem. Ol man we oli gat gudfala tingting oli folem tok ya blong Jisas we i stanap long lav se: “Yufala evriwan we yufala i stap hadwok tumas, yufala i stap karem ol hevi samting, yufala i kam long mi. Bambae mi mi givim spel long yufala. Yufala i mas putum yok blong mi long solda blong yufala, blong yufala i mekem wok blong mi. Mo yufala i mas lan long mi, from we mi mi wan kwaet man, tingting blong mi i stap daon. Nao bambae yufala i faenem we tingting blong yufala i gat spel. From we yok ya we bambae mi putum long yufala, wok blong hem i isi. Mo ol samting we mi givim long yufala blong yufala i karem, oli no hevi.” (Matyu 11:28-30) Ol man we oli fraet long God oli kam long hem mo oli stap wet long taem we bambae hem i rul long olgeta.—Jon 12:19.
Olgeta We Bambae Oli Rul Wetem Hem
10, 11. ?Hu bambae i joen long Jisas blong rulum wol?
10 Wan gavman blong man i gat sam man we oli wok wetem hem: i sem mak bakegen long Kingdom blong God long heven. Jisas bambae i joen wetem ol narafala blong rulum wol ya, from we hem i promes long ol disaepol blong hem se bambae oli joen wetem hem olsem ol king blong rulum ol man long wol.—Jon 14:2, 3; Revelesen 5:10; 20:6.
11 Olsemia nao, biaen long Jisas, i gat wan stret namba blong ol man we oli laef bakegen blong stap long heven. Olgeta ya oli olsem Kingdom blong God we bambae i karem plante blesing long ol man blong olwe. (2 Korin 4:14; Revelesen 14:1-3) Long ol yia we oli pas finis Jeova i putum faondesen blong wan rul we bambae i karem plante blesing blong olwe long famle blong man.
En Blong Rul Blong Man
12, 13. ?Kingdom blong God i rere blong mekem wanem?
12 Long laswan handred yia God i stap lukluk long ol bisnes blong wol ya. Olsem we haf 9 blong buklet ya bambae i tokbaot moa klia, ol profet tok blong Baebol oli soemaot we Kingdom blong God long han blong Kraes i stanap long 1914 mo kolosap nao bambae i finisim olgeta rul blong Setan. Kingdom ya i rere blong “rulum ol enemi blong [Kraes].”—Ol Sam 110:2.
13 Profet tok blong Daniel 2:44 i tokbaot samting ya: “Long taem blong ol king ya [we oli stap rul naoia], God blong heven bambae i stanemap wan kingdom [long heven] we neva i save brokdaon, mo paoa blong rul blong hem bambae i no go long han blong wan narafala man [bambae God i no moa letem man i rul]. Hem [Kingdom blong God] bambae i smasem olgeta kingdom ya mo i finisim olgeta, mo hem bambae i stap gogo i no save finis.”—Revised Standard Version.
14. ?Wanem sam gudfala blesing we bambae oli kamtru taem rul blong man i finis?
14 Taem olgeta rul we oli no dipen long God oli finis olgeta, Kingdom blong God bambae i rul long olgeta ples long wol. From we Kingdom i stap long heven, i no gat wan man i save spolem. Paoa bambae i stap long ples we i bin stap fastaem, long heven, kolosap long God. Mo from we rul blong God bambae i kavremap olgeta ples long wol, ol gyaman skul, ol tingting blong ol man we oli skulgud, mo ol tingting blong politik, bambae oli no moa save pulum man i go long nogud rod. Olgeta samting ya bambae oli no moa stap.—Matyu 7:15-23; Revelesen, japta 17 kasem 19.
[Futnot]
a Bambae yufala i lukluk moa long laef blong Jisas long buk ya Man We i Hae Moa Long Olgeta Man, we Watchtower Sosaeti i prentem long 1991.
[Tok blong pija long pej 18]
Taem hem i stap long wol, Jisas i mekem ol sikman oli kamgud mo i mekem ol dedman oli laef bakegen blong soemaot wanem we bambae hem i mekem long nyufala wol
[Tok blong pija long pej 18]
Kingdom blong God long heven bambae i finisim ol rul we i no dipen long hem