Stadi 11
Ol Bilif Mo Kastom We God i No Laekem
?Wanem kaen bilif mo kastom oli rong? (1)
?Ol Kristin oli mas bilif se God i olsem wan Triniti? (2)
?From wanem ol trufala Kristin oli no mekem lafet blong Krismas, Ista, mo betde? (3, 4)
?Ol dedman oli save mekem trabol long ol man we oli laef? (5)
?Jisas i ded long wan kros? (6)
?From wanem i impoten tumas blong mekem God i glad? (7)
1. I no olgeta bilif mo kastom evriwan we oli nogud. Be God i no agri long ol bilif mo kastom we oli kamaot long wan gyaman skul, mo we oli agensem ol tijing blong Baebol.—Matyu 15:6.
2. Triniti: ?Jeova i wan Triniti? ?Hem i olsem tri man long wan God nomo? !No gat! Jeova, we i Papa, hem ‘nomo i God tru.’ (Jon 17:3; Mak 12:29) Jisas i fasbon Pikinini blong hem, mo hem i stap daon moa long God. (1 Korin 11:3) Papa i hae moa i bitim Pikinini. (Jon 14:28) Tabu speret i no wan man. Hem i paoa blong God.—Jenesis 1:2; Ol Wok 2:18.
3. Krismas mo Ista: Jisas i no bon long Desemba 25. Hem i bon samples long Oktoba 1. Hemia taem blong yia we ol man blong lukaot long sipsip oli stap afsaed long naet wetem ol sipsip blong olgeta. (Luk 2:8-12) Jisas i neva givim oda long ol Kristin blong mekem lafet blong makem dei we hem i bon. Be, hem i talem long ol disaepol blong hem blong rimemba, no blong tingbaot bakegen, ded blong hem. (Luk 22:19, 20) Krismas mo ol kastom blong hem oli kamaot long ol olfala gyaman skul blong bifo. Samting ya i tru tu long saed blong ol kastom blong Ista, olsem ol eg mo rabet. Ol faswan Kristin oli no mekem lafet blong Krismas mo Ista, mo tede, ol trufala Kristin tu oli no mekem ol lafet ya.
4. Betde: I gat tu lafet blong betde nomo we Baebol i tokbaot, mo ol man we oli mekem tufala lafet ya oli no wosip long Jeova. (Jenesis 40:20-22; Mak 6:21, 22, 24-27) Ol faswan Kristin oli no mekem lafet blong betde. Kastom blong mekem lafet blong betde i kamaot long ol gyaman skul blong bifo. Ol trufala Kristin oli givim presen mo oli haremgud tugeta long plante narafala taem blong yia.
5. Fraet Long Ol Dedman: Ol dedman oli no save mekem wan samting mo oli no save filim samting tu. Yumi no save halpem olgeta, mo oli no save mekem nogud long yumi. (Ol Sam 146:4; Eklesiastis 9:5, 10) Sol i save ded. Hem i no stap laef afta we man i ded. (Esikel 18:4) Be samtaem, ol rabis enjel, hemia ol dimon, oli gyaman se oli olsem speret blong ol dedman. Olgeta kastom we oli joen wetem fraet no wosip long ol dedman, oli rong.—Aesea 8:19.
6. Kros: Jisas i no ded long wan kros. Hem i ded long wan pos no wud. Long plante Baebol, Grik tok we oli tanem i kam “kros,” i minim wan wud nomo. Saen ya blong kros i kamaot long ol gyaman skul blong bifo. Ol faswan Kristin oli no yusum mo wosip long kros. Taswe, ?yu ting se i stret blong yusum wan kros blong wosip?—Dutronome 7:26; 1 Korin 10:14.
7. Maet i hadwok long yu blong lego sam long ol bilif mo kastom ya. Ol famle mo fren oli save tok long yu se yu no mas jenisim bilif blong yu. Be i moa impoten blong mekem God i glad i bitim we yu mekem man i glad.—Proveb 29:25; Matyu 10:36, 37.
[Tok blong pija long pej 22]
God i no wan Triniti
[Tok blong pija long pej 22]
Krismas mo Ista oli kamaot long ol gyaman skul blong bifo
[Tok blong pija long pej 22]
I no gat wan risen blong wosip long ol dedman no blong fraet long olgeta