Stadi 12

Soem Respek Long Laef Mo Blad

?Yumi mas gat wanem tingting long saed blong laef? (1) ?fasin blong kilim pikinini i ded long bel? (1)

?Olsem wanem ol Kristin oli save soemaot se oli lukaotgud oltaem blong stap sef? (2)

?I rong blong kilim anamol i ded? (3)

?Wanem sam fasin we oli soemaot se man i no gat respek long laef? (4)

?Wanem loa blong God long saed blong blad? (5)

?Loa ya i agensem fasin blong tekem blad blong narafala man i kam long bodi blong yumi? (6)

1. Jeova i Stampa blong Laef. Olgeta laef samting oli kasem laef blong olgeta long God. (Ol Sam 36:⁠9) Long tingting blong God, laef i tabu. Jeova i tingbaot laef blong wan pikinini we i no bon yet, we i stap insaed long mama blong hem, olsem wan sas samting. Long ae blong Hem, i rong blong kilim bebi ya i ded.​—⁠Eksodas 21:​22, 23; Ol Sam 127:⁠3.

2. Ol trufala Kristin oli lukaotgud oltaem blong stap sef. Oli meksua se trak mo haos blong olgeta i sef oltaem. (Dutronome 22:⁠8) Ol man blong God oli no mekem samkaen pleplei we oli denja long laef blong olgeta, jes blong haremgud nomo. Taswe, oli no joen long ol spot we oli raf mo we oli givim kil long narafala man. Oli stap longwe long ol sinema mo pija long televisin we oli soem raf fasin.​—⁠Ol Sam 11:⁠5; Jon 13:35.

3. Laef blong ol anamol tu i tabu long ae blong Man ya we i Wokem Olgeta Samting. Wan Kristin i save kilim anamol i ded blong kasem kakae mo klos, no blong protektem hem long sik mo denja. (Jenesis 3:21; 9:3; Eksodas 21:28) Be i rong blong spolem no kilim ol anamol i ded, olsem wan spot no pleplei blong haremgud nomo long hem.​—⁠Proveb 12:⁠10.

4. Smok tabak, kakae betelnat, mo tekem drag blong haremgud nomo, oli ol fasin we Kristin i no mas mekem. Ol fasin ya oli rong from we (1) oli mekem yumi slef blong olgeta, (2) oli mekem nogud long bodi blong yumi, mo (3) oli doti. (Rom 6:19; 12:1; 2 Korin 7:⁠1) Maet i hadwok blong lego ol fasin ya. Be yumi mas mekem olsem, blong Jeova i glad long yumi.

5. Blad tu i tabu long ae blong God. God i talem se sol, no laef, i stap insaed long blad. Taswe i rong blong kakae blad. I rong tu, blong kakae mit blong wan anamol we oli no mekem blad blong hem i ronaot fastaem. Sipos wan man i jokem nek blong wan anamol, no anamol ya i fas long wan trap nao i ded, i no stret blong kakae anamol ya. Sipos man i sperem no i sutum wan anamol blong kakae, hem i mas mekem blad blong hem i ronaot kwiktaem.​—Jenesis 9⁠:​3, 4; Levitikas 17:​13, 14; Ol Wok 15⁠:​28, 29.

6. ?I rong blong letem dokta i putum blad blong narafala man long bodi blong yu? Rimemba, Jeova i no wantem se yumi karem blad. Samting ya i minim se yumi no mas tekem blad i kam insaed long bodi blong yumi long enikaen rod, nating sipos hem i blad blong narafala no hem i prapa blad blong yumi we oli kipim i stap blong putumbak long bodi blong yumi. (Ol Wok 21:​25) Taswe, ol trufala Kristin oli no letem dokta i putum blad blong narafala man long bodi blong olgeta. Oli karem ol narafala meresin we oli no gat blad long olgeta, olsem botel wora we oli hangem long sikman. Ol trufala Kristin oli wantem stap laef, be oli no save brekem loa blong God blong traem sevem laef blong olgeta.​—⁠Matyu 16:⁠25.

[Tok blong pija long pej 25]

Blong mekem God i glad, yumi no mas tekem blad, yumi mas lego ol doti fasin mo olkaen pleplei we oli denja