Stadi 15

Halpem Ol Narafala Blong Mekem Ol Samting We God i Wantem

?From wanem yu mas tokbaot ol samting we yu lanem wetem ol narafala? (1)

?Yu save serem gud nyus ya wetem hu? (2)

?Fasin blong yu i save mekem wanem long ol narafala? (2)

?Wetaem yu save stat blong joen long wok blong prij wetem kongregesen? (3)

1. Kam kasem naoia, yu lanem plante gudfala samting finis long saed blong Baebol. Save ya i mas lidim yu blong gat ol Kristin fasin. (Efesas 4:​22-24) Yu yu nidim save olsem, blong kasem laef we i no save finis. (Jon 17:⁠3) Be, ol narafala tu oli mas harem gud nyus ya blong bambae oli kasem laef. Ol trufala Kristin oli mas givim wetnes long ol narafala. Hem i wan oda blong God.​—Rom 10:10; 1 Korin 9:16; 1 Timote 4:⁠16.

2. Yu save stat blong givim wetnes, sipos yu serem ol gudfala samting we yu lanem wetem ol man raonabaot long yu. Talemaot ol samting ya long ol famle mo fren blong yu, long ol narafala long skul mo long ples blong wok. Yu mas kaengud mo gat longfala tingting taem yu mekem olsem. (2 Timote 2:​24, 25) Rimemba se, plante taem, ol man oli lukluk fasin blong narafala i bitim we oli lesin long samting we hem i stap talem. Taswe, gudfala fasin blong yu i save pulum narafala blong lesin long mesej we yu stap talemaot.​—⁠Matyu 5:16; 1 Pita 3:​1, 2, 16.

3. Biaen, maet yu naf blong joen long wok blong prij wetem kongregesen blong ol Wetnes blong Jeova long ples blong yu. Hemia wan impoten haf blong ol samting we yu mas mekem blong gohed gud. (Matyu 24:14) !Bambae yu kasem bigfala glad sipos yu givhan long wan narafala man blong kam wan man blong Jeova, nao hem i kasem laef we i no save finis!​—⁠1 Tesalonaeka 2:​19, 20.