Kam Gud Moa Long Fasin Blong Rimemba
TAEM Jehova God i mekem man, hem i givim wan bren long hem, we i gat nambawan fasin ya blong rimemba ol samting. Bren ya i save holem plante plante save. Long sem taem we yumi yusum sam long ol save ya, yumi no fogetem ol narafala nambawan samting we yumi putum i stap long tingting blong yumi. God i mekem se bren blong yumi i naf blong wok olwe. Hemia i stret long stamba tingting blong hem se ol man oli mas laef olwe.—Sam 139:14; Jon 17:3.
Be maet yu talem se, fulap samting we yu bin putum long tingting blong yu, yu fogetem finis. Yu traem blong tingbaot olgeta, be yu no moa save rimemba. ?Yu save mekem wanem blong kam gud moa long fasin blong rimemba?
Yu Mas Wantem Blong Save Moa
Blong kam gud moa long fasin blong rimemba, yu mas wantem blong save moa long saed blong ol samting we yu luk. Yu mas lukluk gud ol samting, mo yu mas traem kasem save long ol man mo ol samting we i stap hapen raonabaot long yu. Olsemia, yu mekem tingting blong yu i wok moa. Nao bambae yu wantem kasem save moa long ol impoten samting we yu ridim mo harem.
Plante man oli luk se i had blong rimemba nem blong ol man. Be yumi ol Kristin, yumi save se ol man oli impoten. Taswe, yumi traem rimemba nem blong ol Kristin brata sista blong yumi, olgeta we yumi prij long olgeta, mo ol man we yumi luk olgeta oltaem. ?Wanem i save givhan long yumi? Aposol Pol i raetem nem blong 26 Kristin man mo woman long leta we hem i sanem i go long wan kongregesen. Hem i no talem nem nomo, be hem i tokbaot laef blong olgeta tu. Samting ya i soemaot se hem i tingbaot olgeta. (Rom 16:3-16) Tede, sam seket elda blong ol Witnes blong Jehova oli rimemba gud nem blong plante brata sista long ol kongregesen we oli visitim, nating se evri wik oli stap long wan defren kongregesen. ?Wanem i givhan long olgeta blong oli rimemba ol nem ya? Taem oli mitim wan brata no sista, oli yusum nem blong hem bakegen mo bakegen long storian blong olgeta. Oli traehad blong rimemba fes blong man mo wanem nem i joen wetem fes ya. Mo tu, oli spenem taem wetem ol defren brata sista long wok blong prij mo taem oli kakae wanples. ?Olsem wanem long yu? ?Taem yu mitim wan man, yu rimemba nem blong hem? Fastaem, yu mas tingbaot from wanem yu wantem rimemba nem blong man ya. Mo biaen, yu save folem ol advaes we yumi jes tokbaot.
I impoten tu blong rimemba wanem we yu ridim. ?Wanem i save givhan long yu blong yu kam gud moa long saed ya? Ol save we yu stap ridim i mas pulum tingting blong yu, mo tu, yu mas kasem save long wanem we yu stap ridim. Sipos samting we yu stap ridim i pulum tingting blong yu, bambae yu putum tingting blong yu i stap fulwan long hem. Sipos tingting blong yu i flae olbaot taem yu stap rid, bambae yu no rimemba wan samting. Blong kasem save moa long samting we yu stap ridim, yu mas joenem ol niufala save wetem save we yu gat finis. Maet yu tingbaot se: ‘?Wetaem bambae mi folem save ya long laef blong mi, mo bambae mi folem olsem wanem? ?Mi save yusum poen ya olsem wanem blong givhan long ol narafala?’ Mo tu, bambae yu kasem save moa long samting we yu ridim sipos yu ridim ol wod long grup, be i no ol wod wanwan. Long rod ya, bambae yu kwik blong kasem ol bigfala tingting mo mining blong wanem we yu ridim, nao bambae i moa isi blong yu yu rimemba olgeta.
Yu Mas Tingtingbak
Samfala we oli gat bigfala save long fasin blong tij, oli talem se i impoten tumas blong tingtingbak long samting we yumi ridim. Wan tija blong haeskul i faenemaot se sipos man i spenem wan minit blong tingtingbak long ol save we hem i ridim finis, bambae hem i dabolem ol save we hem i holem long tingting blong hem. Taswe, taem yu finisim riding blong yu no wan haf blong hem, i gud yu stop mo yu tingtingbak long ol bigfala poen long riding ya. Olsem nao, bambae yu no fogetem ol poen ya. Yu save tingbaot se bambae yu eksplenem ol niufala poen ya olsem wanem. Sipos yu tingtingbak long ol save kwiktaem afta we yu ridim, bambae save ya i stap longtaem long tingting blong yu.
Ale, tutri dei biaen, yu save lukaot sam rod blong tokbaot ol niufala save ya. Maet yu tokbaot save ya wetem wan famle blong yu, wan brata no sista long kongregesen, wan fren long ples blong wok, wan fren long skul, wan man we i laef klosap long yu, no long wok blong prij. Yu traem talem bakegen niufala poen ya, mo i gud yu talem ol vas blong Baebol we oli joen wetem poen ya. Samting ya bambae i givhan long yu bigwan blong yu no fogetem ol impoten samting. Mo ol save we yu serem bambae i givhan long ol narafala tu.
Yu Mas Tingting Dip Long Ol Impoten Samting
Yes, yu mas tingtingbak long ol save we yu ridim, mo yu mas tokbaot save ya wetem ol narafala. Mo tu, i gud yu tingting dip long ol impoten samting we yu lanem. Asaf mo Deved, tufala man ya blong raetem Ol Sam, tufala i mekem olsem. Asaf i talem se: “Hae God. Bambae mi mi stap tingbaot ol bigbigfala wok blong yu, mo ol merikel ya we yu yu mekem bifo. Bambae mi stap tingting gud long olgeta bigbigfala wok ya blong yu.” (Sam 77:11, 12) Deved tu i raetem se: “I stat long sapa gogo kasem long moning mi mi stap tingting long yu,” mo “mi stap tingtingbak long ol dei ya we i pas finis, mi stap tingbaot olgeta wok ya we yu yu mekem.” (Sam 63:6; 143:5) ?Olsem wanem long yu? ?Yu tu yu stap tingting dip olsem?
Sipos yu tingting dip long ol wok blong Jehova, ol fasin blong hem, mo wanem we hem i wantem blong yumi mekem, bambae yu rimemba ol trutok. Be i no hemia nomo. Sipos yu lanem blong tingting dip, bambae ol impoten save i stap gud long hat blong yu. Nao ol save ya bambae i jenisim prapa fasin blong yu. Ol samting we yu yu rimemba, hemia samting we i stap long hat blong yu.—Sam 119:16.
Wok Blong Tabu Spirit
Taem yumi stap traehad blong rimemba ol trutok long saed blong ol samting we Jehova i mekem mo ol samting we Jisas Kraes i tokbaot, yumi no stap traehad yumi wan nomo. Long naet bifo we Jisas i ded, hem i talem long ol man blong hem se: “Mi mi talemaot ol tok ya long yufala long taem ya we mi mi stap yet wetem yufala. Mo Spirit ya blong Givhan, we hem i Tabu Spirit, we bambae Papa blong mi i save sanem i kam long nem blong mi, hem bambae i save tijim yufala long olgeta samting. Bambae hem i save mekem yufala i tingbaot olgeta samting ya bakegen, we mi mi stap talem long yufala.” (Jon 14:25, 26) Taem Jisas i talem tok ya, Matiu mo Jon, tufala tu i stap. ?Olsem wanem? ?Tabu spirit i givhan long tufala? !Yes! Samwe long eit yia biaen, Matiu i finisim wok ya blong raetemdaon stori blong laef blong Kraes. Hem i tokbaot ol nambawan samting we hem i stap tingbaot, olsem Bigfala Toktok we Jisas i givim antap long Hil, mo olgeta saen we oli soemaot se Kraes i stap mo se wol ya klosap i kasem en blong hem. Sikisti faef yia afta long ded blong Jisas, aposol Jon i raetem Gospel blong hem. Jon i tokbaot ol samting we Masta Jisas i talem long las naet we hem i stap wetem ol aposol blong hem. I tru, Matiu mo Jon, tufala i tingbaot gud ol samting we Jisas i bin talem mo mekem taem tufala i stap wetem hem. Be tabu spirit tu i givhan bigwan long tufala, blong tufala i no fogetem ol smosmol save we Jehova i wantem se i mas stap long Tok blong hem.
?Olsem wanem long ol man blong God tede? ?Tabu spirit i stap givhan long olgeta tu? !Yes! Be tabu spirit i no save mekem se yumi tingbaot samting we yumi neva lanem. Bambae hem i mekem se yumi tingbaot nomo ol impoten samting we yumi stadi finis long olgeta. (Luk 11:13; 1 Jon 5:14) Taem i gat nid, bambae tabu spirit i mekem se yumi “tingbaot bakegen, ol tok we ol tabu profet oli talem bifo, mo tok blong Masta mo Sevia blong yumi.”—2 Pita 3:1, 2.
“Yufala i No Mas Fogetem Ol Samting Ya”
Bakegen mo bakegen, Jehova i givim woning long ol man Isrel se: “Yufala i no mas fogetem ol samting ya.” Hemia i no min se oli mas rimemba evri samting. Be Jehova i wantem se oli no mas ronem ol samting we olgeta nomo i wantem, nao oli fogetem ol samting we hem i bin mekem long olgeta. Oltaem oli mas tingbaot we Jehova i sevem olgeta, taem enjel blong hem i kilim i ded ol fasbon blong ol man Ijip. Mo Jehova i sevem olgeta bakegen, taem hem i mekem wota blong Red Si i seraot, nao biaen i mekem wota ya i kambak bakegen, i draonem Fero wetem ol ami blong hem. Ol man Isrel oli mas tingbaot se God i givim Loa long olgeta taem oli stap long Hil ya Sinae, mo se hem i lidim olgeta oli gokros long draeples go kasem Promes Lan. Oli no mas fogetem ol samting ya. Yes, ol samting ya oli mas gat paoa long laef blong olgeta evri dei.—Dut. 4:9, 10; 8:10-18; Eks. 12:24-27; Sam 136:15.
Yumi tu, yumi mas lukaot gud se yumi no fogetem Jehova. Taem yumi stap fesem ol trabol long laef, yumi mas tingbaot Jehova mo ol fasin blong hem. Mo yumi mas tingbaot bigfala lav we hem i soemaot taem hem i givim Pikinini blong hem, blong i pemaot yumi long sin mo i mekem se yumi save kasem laef we i no save finis. (Sam 103:2, 8; 106:7, 13; Jon 3:16; Rom 6:23) Sipos yumi ridim Baebol oltaem mo yumi joen oltaem long ol miting mo long wok blong prij, bambae yumi rimemba ol nambawan trutok ya.
Taem yu mas mekem wan desisen, nating se desisen ya i bigwan no i smol, yu mas tingbaot bakegen ol nambawan trutok ya, mo yu mas letem olgeta oli lidim tingting blong yu. Yu no mas fogetem Jehova. Yu mas askem long Jehova blong i soemaot rod long yu. Yu no mas folem prapa tingting blong yu, mo yu no mas trastem hat blong yu. I moa gud yu askem se: ‘?Long saed blong desisen ya we mi mas mekem, wanem ol advaes mo rul long Tok blong God we mi mas tingbaot?’ (Prov. 3:5-7; 28:26) Yu no save rimemba wan samting we yu neva harem no yu neva ridim bifo. Be taem yu kasem moa save mo yu lavem Jehova moa, tabu spirit bambae i givhan long yu blong yu rimemba plante moa save. Mo from we yu lavem Jehova tumas, bambae yu wantem folem ol save ya long laef blong yu.