Kasem Gudfala Frut Taem Yu Stadi Baebol

?YU YU save wanem samting we yu mas mekem blong jusum wan gudfala frut? Plante man oli luk kala mo saes blong wan frut blong save sipos hem i raep. Sam man oli smelem frut ya. Mo sam narafala oli tajem, no maet oli skwisim. Sam man oli holem ol frut wanwan nao oli harem se weswan i hevi moa. Long rod ya oli save weswan frut i gat plante wota long hem. ?Ol man ya oli stap tingbaot wanem, taem oli mekem samting ya? Oli stap skelem ol samting long saed blong frut ya, oli stap tingbaot wanem samting i mekem we ol frut ya oli defdefren, oli stap tingtingbak long sam narafala taem we oli jusum frut finis, mo oli stap skelem frut we oli luk naoia wetem frut we oli pem finis. From we oli tingting long ol samting ya, oli harem gud blong kakae wan frut we i swit.

Taem yu stadi long Tok blong God, yu save kasem plante gudfala frut long laef blong yu. Sipos stadi i wan impoten haf blong laef blong yu, bilif blong yu bambae i kam strong moa, lav blong yu bambae i kam bigwan moa, bambae yu karem frut long wok blong prij, mo ol desisen we yu mekem bambae oli soemaot we yu gat fasin luksave mo waes blong God. Ol Proveb 3:15 i tokbaot ol gudfala frut ya se: “I no gat wan samting nating we yu save wantem samtaem we i gud moa.” ?Yu yu stap kasem ol gudfala frut ya long laef blong yu? Maet hemia i dipen long fasin we yu folem blong stadi.—Kol. 1:9, 10.

?Stadi i minim wanem? Hem i no min se yu ridim wan buk nomo. Taem yu stadi, yu yusum tingting blong yu, yu tingting gud long samting we yu stadi long hem, no yu putum tingting blong yu i stap longtaem long samting ya. Mo tu, yu tingting gud long ol save we yu ridim, yu skelem wetem save we yu gat finis, mo yu makem gud ol tok we i eksplenem risen blong wan samting we yu ridim. Taem yu stadi, yu mas tingting dip long evri samting we i niu long yu. Mo tu, i gud yu tingbaot wanem we yu yu save mekem, blong folem advaes ya blong Baebol long laef blong yu. Mo from we yu yu wan Witnes blong Jehova, yu mas traem blong tingbaot sam rod blong yusum save we yu stadi long hem blong givhan long ol narafala. Yes, i klia se taem yu stadi Baebol, yu mas tingting dip.

Yu Mas Mekemrere Tingting Blong Yu

Taem yu stap mekemrere blong stadi, yu mas karem Baebol blong yu, ol buk we yu wantem yusum, wan pensel no pen, mo maet wan buk blong raet long hem. Be i gat wan samting moa yet. Yu mas rerem hat blong yu. ?Yu yu stap mekem olsem? Baebol i talem se Esra i ‘mekemrere hat blong hem blong ridimgud loa blong Jehova, mo blong mekem i wok, mo blong tijim ol man Isrel long ol rul mo long stret fasin.’ (Esra 7:10, NW) ?Yu mas mekem wanem blong rerem hat blong yu?

Prea i save givhan long yu blong yu gat stret tingting long stadi we yu mekem long Tok blong God. Yu wantem we hat mo tingting blong yu, tufala i rere fulwan blong harem ol advaes we Jehova i givim. Bifo we yu stadi, i gud yu askem long Jehova blong i givim tabu spirit long yu blong halpem yu. (Luk 11:13) Yu save askem long hem blong i givhan long yu long ol samting ya: kasem mining blong ol save we bambae yu stadi long hem, luksave olsem wanem ol poen long stadi ya oli joen wetem stamba tingting blong Hem, luksave olsem wanem oli givhan long yu blong save wanem i gud mo wanem i nogud, folem ol tingting blong hem long laef blong yu, mo fren gud wetem hem. (Prov. 9:10) Taem yu stap stadi, yu mas gohed blong “askem long God” blong i givim waes long yu. (Jem. 1:5) Yu save skelem fasin blong yu wetem ol samting we yu lanem long stadi blong yu. Taem yu mekem olsem, yu save askem long Jehova blong i givhan long yu blong sakemaot ol tingting we oli save lidim yu yu gorong, mo we oli save pulum yu blong wantem samting we i nogud. Oltaem yu mas ‘talem tangkiu long Jehova’ from ol samting we hem i soemaot long yu. (Sam 147:7) Fasin ya blong prea oltaem from stadi blong yu, bambae i pulum yu yu kam klosap moa long Jehova, from we i givim janis long yu blong yu toktok long hem long saed blong ol samting we hem i talem long yumi long Tok blong hem.—Sam 145:18.

Ol man blong Jehova oli rere oltaem blong lesin long ol tok blong Jehova, be ol man blong wol oli no olsem. Ol man we oli no ona gud long God, oli no bilivim ol tok blong Baebol, mo oli faenem poen oltaem long ol tok ya. Be fasin blong yumi i no olsem. Yumi trastem Jehova. (Prov. 3:5-7) Sipos yumi no kasem save long sam tok blong hem, yumi no hareap blong talem se tok ya i rong. Yumi gohed blong lukaot moa save, yumi stadi long Baebol blong kasem ansa blong kwestin blong yumi, mo yumi wet long Jehova. (Maeka 7:7) Yumi mas gat tingting olsem Esra. Yumi wantem kam naf blong folem ol save we yumi lanem, mo blong tijim ol narafala long ol save ya. Sipos yumi wantem samting ya long hat blong yumi, yumi save kasem plante blesing from stadi blong yumi.

?Wanem Fasin We Yu Mas Folem Blong Stadi?

Maet yu stat long paragraf 1 mo yu stadi go kasem las paragraf blong japta. Be fastaem, i gud yu spenem smoltaem blong traem luksave ol bigfala tingting long japta no long haf we yu wantem stadi long hem. Fas samting we yu save mekem, yu tingting gud long evri wod we i stap long nem blong japta. Hemia nao stamba tok blong samting we bambae yu stadi long hem. Nao yu ridim ol smol stamba tok mo yu tingbaot se oli joen olsem wanem wetem bigfala stamba tok no nem blong japta ya. Yu lukluk gud long ol pija, ol map, mo ol bokis we oli stap long japta ya. Nao yu tingting long ol kwestin ya: ‘?Ol samting ya oli soemaot se mi save lanem wanem long stadi ya? ?Long wanem rod bambae stadi ya i givhan long mi?’ Ol kwestin olsem bambae oli givhan long yu blong yu luksave from wanem yu stap stadi long japta ya.

Taem yu mekem ol samting ya finis, yu yu rere blong kasem ol impoten poen we oli stap long stadi ya. Ol stadi long Wajtaoa mo long sam buk, oli gat ol kwestin blong olgeta. Taem yu ridim wan paragraf finis, i gud yu putum laen aninit long ansa. Nating sipos i no gat kwestin, i gud yet blong putum mak long ol impoten poen we yu wantem rimemba olgeta. Sipos wan save i niu long yu, yu mas spenem smoltaem moa blong tingbaot save ya mo blong meksua se yu kasem gud. Yu lukaot ol pijatok mo ol tok we yu save yusum blong pulum tingting blong man we yu prij long hem, no maet yu yusum long wan tok we yu mekem long miting. Yu tingbaot sam man we yu save serem ol poen ya wetem olgeta blong mekem bilif blong olgeta i kam strong moa. Yu mas makem gud ol poen we yu wantem yusum, mo yu mas tingtingbak long olgeta afta we yu finisim stadi blong yu.

Taem yu stap stadi, yu mas jekemap ol vas blong Baebol we oli stap. Yu tingbaot se ol vas ya wanwan oli laenap olsem wanem wetem bigfala tingting we i stap long paragraf.

Maet yu faenem sam poen we i no isi blong kasem save long olgeta, no maet yu wantem save moa long wan poen. I nogud yu letem ol poen ya oli pulum yu yu gowe long stadi blong yu. Yu save raetem ol poen ya long wan pepa, nao yu lukluk olgeta samtaem biaen. Plante taem ol poen oli kam klia taem yu gohed long stadi blong yu. Sipos oli no kam klia, yu save lukaot moa save long ol narafala buk. ?Wanem samting we maet yu wantem lukaot moa save long hem? Maet yu ridim wan vas long stadi blong yu we yu no kasem save long hem. No maet yu no kasem save se vas ya i laenap olsem wanem wetem stadi. Maet yu kasem save long wan poen long stadi be yu harem se poen ya i no klia gud, mo ating yu no save eksplenem gud long wan narafala man. I nogud yu letem samting ya i pas olsem nomo. I waes blong lukaot moa save long saed ya, afta we yu finisim stadi blong yu.

Taem aposol Pol i raetem leta blong hem i go long ol Hibru Kristin, hem i stop long medel blong leta ya, nao hem i talem se: ‘Stamba blong ol tok ya i olsem.’ (Hib. 8:1) ?Yu yu stap mekem samting ya blong tingtingbak? Tingbaot from wanem Pol i talem ol tok ya. Long ol fas japta blong leta blong hem, hem i soemaot se Kraes, we God i putumap hem olsem Hae Pris, i go insaed long heven finis. (Hib. 4:14 kasem Hib. 5:10; 6:20) Nao long stat blong japta 8, hem i talem stamba poen ya bakegen. Long rod ya, Pol i rerem tingting blong olgeta we oli ridim leta blong hem, blong oli tingting dip se poen ya i joen olsem wanem long laef blong olgeta. Hem i soemaot se Kraes i stanap finis long fes blong God blong toktok long saed blong olgeta, mo se hem i openem rod finis blong olgeta tu oli save go long “Rum we i Tabu” long heven. (Hib. 9:24; 10:19-22) Sipos oli bilif strong se promes ya bambae i kamtru, hemia i save mekem se oli glad blong folem ol narafala advaes we i kamaot long leta ya. Hemia ol advaes long saed blong bilif, fasin blong stanap strong, mo ol Kristin fasin. Yumi tu, taem yumi stadi, i gud yumi putum tingting blong yumi i stap long ol bigfala poen. Samting ya i save mekem stamba tok i kam klia, mo bambae yumi luksave from wanem i impoten blong mekem save ya i wok long laef blong yumi.

?Olsem wanem? ?Stadi we yu mekem yu wan, i gat paoa long yu? Hemia wan impoten kwestin. Taem yu lanem wan samting, i gud yu tingbaot se: ‘?Save ya i mas pusum mi blong jenisim wanem fasin blong mi, mo mi mas traehad long wanem rod? ?Bambae mi yusum save ya olsem wanem, taem mi stretem wan problem, taem mi mekem wan desisen, mo taem mi traehad blong kam gud moa long sam samting? ?Mi save yusum poen ya olsem wanem, long famle blong mi, long wok blong prij, mo insaed long kongregesen?’ I gud yu prea mo yu tingting gud long ol kwestin ya. Mo i gud yu tingbaot ol samting we oli save hapen long laef blong yu, we maet oli givim janis long yu blong mekem save ya i wok.

Taem yu finisim stadi blong yu long wan japta, yu save tingtingbak blong smoltaem. I gud yu traem tingbaot ol bigfala poen mo ol poen blong sapotem olgeta. Rod ya bambae i givhan long yu blong yu no fogetem ol save ya taem yu nidim bakegen.

?Bambae Yu Stadi Long Wanem Samting?

Ol man blong Jehova oli gat plante samting blong stadi long hem. ?Be bambae yu yu stat long wanem? Evri dei, i gud yu stadi long vas blong dei mo long smol toktok we i joen wetem vas ya, long buk ya Ridimgud Ol Tok Blong Baebol Evri Dei. I gud yu stadi blong rere from ol miting blong kongregesen evri wik. Olsem nao, ol miting ya oli save givhan moa long yu. Antap long hemia, sam long yumi oli yusum gud taem blong olgeta blong stadi long sam buk we oli kamaot bifo we oli kasem trutok. Sam narafala oli jusum sam vas long Baebol riding blong wik, mo oli stadi dip long ol vas ya.

?Bambae yu mekem wanem sipos ol samting long laef blong yu oli blokem yu blong yu no save stadi gud long olgeta save we yumi tokbaot long ol miting blong kongregesen evri wik? Yu no mas foldaon long trap ya blong spid nomo blong stadi long ol save we bambae yumi tokbaot long miting. Be i nogud tu sipos yu no stadi nating from we yu ting se yu no gat taem blong rerem ful miting. I moa gud yu luksave hamas haf blong miting we yu yu naf blong rerem, nao yu rerem gud ol haf ya. Yu mas mekem samting ya evri wik. Sloslo yu save traehad blong mekem sem samting long olgeta miting.

“Yu Mas Bildimap Famle Blong Yu”

Jehova i save se hed blong famle i mas wok had blong givim ol samting we famle i nidim. Ol Proveb 24:27 (NW) i talem se: “Yu mas mekemrere wok blong yu afsaed long haos, mo yu mas wokem garen blong yu.” Be yu no mas fogetem se famle blong yu i nidim save blong God tu. Taswe, vas ya i gohed se: “Biaen yu mas bildimap famle blong yu.” ?Hed blong famle i save mekem wanem blong bildimap famle blong hem? Ol Proveb 24:3 (NW) i talem se: “From fasin luksave [wan famle] i save stanap strong.”

?Sipos yu yu gat fasin luksave, hemia i save givhan olsem wanem long famle blong yu? Man we i gat fasin luksave, hem i no tingting nomo long samting we hem i luk wetem prapa ae blong hem, be hem i traem blong save moa. Blong karem gudfala frut long famle stadi, hed blong famle i mas save gud famle blong hem. ?Olsem wanem? ?Evriwan long famle blong yu oli stap gohed gud blong fren wetem God? Yu mas lesin gud taem yu storian wetem olgeta. ?Oli stap komplen oltaem no oli stap kros? ?Bigfala samting long laef blong olgeta i blong traem kasem plante sas samting? ?Taem yu prij wetem ol pikinini blong yu, oli stap sem blong soemaot se oli Witnes blong Jehova? ?Oli glad blong joen wanples wetem famle, blong ridim Baebol mo blong mekem famle stadi? ?Oli traehad blong mekem laef blong olgeta i laenap wetem ol fasin we Jehova i wantem? Sipos yu we yu hed blong famle, yu stap lukluk gud long ol samting ya, bambae yu faenemaot wanem we yu mas mekem blong givhan long evriwan long famle blong yu, blong oli wokem ol gudfala Kristin fasin, mo blong oli stanap strong long ol fasin ya.

Yu save lukluk ol Wajtaoa mo Wekap! blong faenem ol stori we oli givim stret advaes we yu nidim. Ale, bifo long dei blong stadi, yu save talemaot long famle wanem we bambae yufala i tokbaot. Long rod ya, bambae oli save tingrere long stadi ya. Yu mas soemaot lav taem yufala i stadi. I no stret blong tok strong mo mekem wan long famle i sem long fored blong ol narafala. Yu mas soemaot from wanem ol samting we yufala i stadi long hem oli impoten. Mo yu mas soemaot olsem wanem yufala evriwan long famle i save mekem advaes ya i wok long laef blong yufala. Yu mas pulum evriwan long famle blong oli tekpat long stadi ya. Mo yu mas givhan long olgeta evriwan blong oli luksave se Tok blong Jehova i “stret gud” blong givim ol samting we man i nidim long laef.—Sam 19:7.

Bambae i Gat Gudfala Frut

Plante man we oli no gat save long Baebol, oli save stadi long ol samting long skae mo wol, mo long ol samting we oli stap hapen long wol, mo long prapa bodi mo tingting blong olgeta. Be maet oli no kasem save se ol samting ya oli soemaot wanem. Ol man we oli stadi oltaem long Tok blong God, oli defren. Tabu spirit i givhan long olgeta blong oli luksave se ol samting we God i mekem long skae mo long wol, oli soemaot ol fasin blong hem. Oli luksave se ol samting we oli hapen long wol oli folem ol profet tok blong Baebol, mo oli luksave se stamba tingting blong God blong blesem ol man we oli obei long hem, i stap kamtru sloslo.—Mak 13:4-29; Rom 1:20; Rev. 12:12.

Save ya i nambawan tumas, be yumi no mas kam flas from. Fasin ya blong stadi long Tok blong God evri dei, i mas givhan long yumi oltaem, blong yumi mekem tingting blong yumi i stap daon. (Dut. 17:18-20) Mo tu, stadi i save mekem se ‘sin bambae i no pulum’ yumi. Hemia from we, taem Tok blong God i gat paoa long hat blong yumi, sin i no save pulum yumi isi, mo i no save spolem strong tingting blong yumi. (Hib. 2:1; 3:13; Kol. 3:5-10) Ale bambae yumi ‘mekem laef blong yumi i kam stret gud olsem we Masta blong yumi i wantem. Oltaem, bambae yumi mekem ol stret fasin wetem ol gudgudfala wok.’ (Kol. 1:10) Hemia nao samting we yumi wantem kasem taem yumi stadi. Olsem nao, stadi blong yumi i karem gudfala frut.