Riding We i Stret

BAEBOL i talem se God i wantem we olgeta man oli “kasem stret save long trutok.” (1 Tim. 2:4, NW) Taswe, taem yumi ridim Baebol long ol narafala, yumi mas gat tingting ya se yumi wantem tumas blong givim stret save long olgeta.

I impoten tumas we yumi evriwan, ol yangfala mo ol olfala tu, yumi naf blong ridim long ol narafala, ol vas blong Baebol mo ol buk we oli eksplenem Baebol. Yumi ol Witnes blong Jehova, wok blong yumi i blong serem save long saed blong Jehova mo ol fasin blong hem. Blong mekem olsem, plante taem yumi mas rid long wan man no long wan grup blong man. Mo tu, yumi rid wetem famle blong yumi. Ol yangfala mo ol olfala we oli joen long Tiokratik Skul, oli gat janis blong kasem advaes we i save givhan long olgeta blong oli kam gud moa long fasin blong rid long ol narafala.

Yumi mas tinghevi long fasin blong ridim Baebol long fored blong ol man, nating se yumi rid long wan man no long wan grup blong man olsem kongregesen. Baebol i kamaot long God. Mo tu, “Tok blong God i wan samting we i laef, mo i stap wok, . . . [hem] i save jajem olgeta tingting blong man, mo ol samting we man i wantem long tingting blong hem.” (Hib. 4:12) Baebol i fulap long ol gudgudfala save we man i no save faenem long wan narafala buk. Baebol i save givhan long ol man blong oli save tru God mo blong oli fren gud wetem hem. Mo tu, Baebol i save givhan long ol man blong oli winim ol problem blong laef. Baebol i eksplenem olsem wanem blong kasem laef we i no save finis long niufala wol we God bambae i mekem. Taswe, yumi mas mekem bes blong yumi blong ridim gud Baebol.—Sam 119:140; Jer. 26:2.

?Yu Mekem Olsem Wanem Blong Rid Stret? I gat plante samting we oli save mekem riding blong yumi i gud. Fas samting se yumi mas rid stret. Hemia i min se yumi ridim stret tok we i stap long buk. I nogud yumi mestem sam wod, sotem sam wod, mo ridim rong sam wod from we yumi luk se oli klosap sem mak long sam narafala wod.

Sipos yu wantem ridim stret ol tok we i stap long buk, fastaem yu mas kasem save long haf ya we bambae yu ridim. Taswe i impoten blong rere gud. Sloslo bambae yu kam naf blong lukluk ol wod we oli kam biaen long olgeta we yu stap ridim, blong kasem tingting we i stap kam. Samting ya bambae i mekem se yu kam gud moa long fasin blong rid stret.

Taem man i rid, ol smosmol mak olsem fulstop, koma, mo kwestin mak, oli impoten. Ol mak ya oli soemaot weples blong spel smol, sipos spel i sot no i longfala, mo wetaem i stret blong mekem voes i go antap mo i godaon. Long sam lanwis, sipos yu no jenisim voes blong yu folem ol smosmol mak ya, yu save mekem se wan kwestin i kam olsem toktok we man i talem, mo yu save jenisim mining blong samting we yu stap ridim tu. Taswe i gud yu traem save mining blong ol mak ya. Hemia wan stamba samting we yu mas mekem sipos yu wantem se man i kasem gud mining blong ol tok blong yu. Yu mas rimemba se, yu rid blong givim save long man, i no blong talem ol wod nomo.

Blong rid stret, i impoten tumas we yu trenem yu. Yu save ridim wan paragraf fastaem, ale yu ridim sem paragraf ya bakegen mo bakegen, gogo yu save ridim we yu no moa mestem. Nao yu save mekem sem samting long nekis paragraf. Taem yu finisim evri paragraf, yu traem ridim plante pej wantaem we yu no mestem wan wod, yu no ripitim ol wod bakegen, mo yu no ridim rong wan wod. Afta we yu mekem ol samting ya, yu save askem long wan man blong i lesin long riding blong yu mo i talem wanem mastik we yu mekem.

Samfala oli no save rid gud from we ae blong olgeta i nogud, no from we oli no gat gudfala laet long haos. Sipos yu yu gat trabol olsem, i gud yu traem mekem wan samting blong stretem trabol ya. Olsemia, bambae yu kam gud moa long riding blong yu.

Sipos wan brata i traehad gogo hem i save rid gud, maet bambae oli askem long hem blong rid long Baebol Stadi Blong Kongregesen no long Wajtaoa Stadi. Be i no naf we hem i ridim stret ol wod nomo. Sipos yu wantem rid gud long fored blong plante man, fastaem yu mas lanem blong rid gud yu wan. Blong mekem olsem, yu mas luksave se ol wanwan wod long wan ful toktok oli gat wok blong olgeta. Yu no mas ting se i oraet nomo blong mestem sam wod. Sipos yu mestem sam wod, mining blong samting we yu ridim bambae i no klia. Nating se yu stap rid yu wan, be sipos yu ridim rong sam wod, bambae yu jenisim mining blong samting we yu ridim. Taem man i no tingbaot bigfala tingting blong samting we hem i stap ridim, plante taem hem i ridim rong sam wod. Yu mas traehad blong kasem save long mining blong ol wod wanwan, mo yu mas kasem save se oli joen olsem wanem wetem stori we yu stap ridim. Mo tu, yu mas tingbaot se ol fulstop, koma, mo kwestin mak, oli givhan blong putum mining long samting we yu ridim. Taem yu wantem givim wan tingting long narafala, klosap oltaem yu mas talem wan grup blong ol wod, i no wan wod nomo. I gud yu makem ol grup blong ol wod we oli givim wan tingting, nao taem yu stap rid long bigfala voes, yu joejoenem ol wod ya i go, yu no ridim ol wod ya wanwan. Yes, i impoten blong kasem save long samting we yu ridim. Long rod ya, yu givim stret save long olgeta we oli stap lesin long yu.

Aposol Pol i raetem leta i go long wan Kristin we i mekem wok blong elda plante yia finis, i talem se: “Yu mas mekem we wok ya blong ridim Baebol long ol man . . . i kam nambawan wok blong yu.” (1 Tim. 4:13) Ating hemia wan samting we yumi evriwan i save kam gud moa long hem.