Muvum Han, Bodi, Mo Fes

LONG sam kantri, taem ol man oli toktok, oli muvum han mo bodi blong olgeta oltaem, be long sam narafala kantri, ol man oli no mekem olsem. Nating se i olsem wanem, klosap olgeta man oli muvum fes blong olgeta mo mekem sam aksen wetem han mo bodi, taem oli toktok. Oli mekem samting ya taem oli storian wetem ol man evri dei, mo taem oli toktok long fored blong plante man.

Jisas mo ol disaepol blong hem oli muvum han mo bodi blong olgeta taem oli toktok, hemia fasin blong ol man long taem ya. Yu tingbaot man ya we i talem long Jisas se mama blong hem wetem ol brata blong hem oli wantem toktok long hem. Jisas i ansa long man ya se: “?Hu i mama blong mi, mo hu i brata blong mi?” Nao Baebol i talem se Jisas “i poen long ol man blong hem, i talem se, ‘Olgeta ya oli mama blong mi, mo oli brata blong mi.’” (Mat. 12:48, 49) I gat plante vas long Baebol we oli soemaot se ol man bifo oli muvum han mo bodi blong olgeta taem oli toktok. Ol Wok 12:17 mo Ol Wok 13:16 i talem se aposol Pita mo Pol tufala i leftemap han blong tufala taem tufala i toktok long ol man.

Yes, yu save yusum voes blong yu blong soemaot tingting blong yu, mo blong soemaot ol fasin we yu stap tokbaot, be yu save muvum han mo bodi blong yu tu blong mekem olsem. Sipos yu no muvum bodi blong yu nating, maet ol man oli ting se yu no kea long samting we yu stap talem. Be taem yu ademap sam aksen long ol tok blong yu, yu save mekem se ol man oli glad blong lesin. Yu save muvum han, bodi, mo fes blong yu taem yu toktok long telefon tu, nating se man we yu toktok long hem i no luk yu. Ol aksen ya bambae oli mekem we man i harem long voes blong yu se samting we yu talem i impoten. Mo bambae hem i luk tu se yu tingting olsem wanem long samting we yu stap tokbaot. Taswe, nating se yu stap mekem wan tok no wan riding, mo nating se ol man oli stap lukluk yu no oli stap lukluk Baebol blong olgeta, be i impoten blong muvum han, bodi, mo fes blong yu.

I no gat wan buk we i save tijim yu blong muvum han, bodi, mo fes blong yu. Taem yu bon i kam, i no gat wan man we i tijim yu blong laf mo blong kam kros. Hemia ol samting we oli kamaot olsem nomo. Sem mak long ol aksen we yu mekem wetem han, bodi, mo fes blong yu, oli mas kamaot olsem nomo folem ol samting we i stap long hat blong yu. Sipos i olsem, bambae toktok blong yu i moa gud.

Yu save muvum han, bodi, mo fes, blong givhan long yu blong mekem tufala wok ya: Faswan, i blong eksplenem wan samting, mo sekenwan, i blong givim paoa long sam haf blong tok blong yu. Blong eksplenem wan samting, yu yusum han mo bodi blong soemaot wan aksen we man i mekem, no saes blong wan samting, no ples we wan samting i stap long hem. Long Tiokratik Skul, taem yu stap wok long poen ya blong muvum han, bodi, mo fes, i gud yu traem mekem samting ya plante taem long tok blong yu, i no wan no tu taem nomo. I gud yu traem mekem sam aksen we oli stret long prapa fasin blong yu, i no olsem we yu stap fosem yu nomo. Sipos i no isi blong yu yu mekem olsem, yu save lukaot ol tok we i stret blong mekem aksen long hem. Yu save yusum han blong yu blong soemaot se wan samting i stap long fored, biaen, no long saed blong yu, i stap longwe olsem wanem, i bigwan olsem wanem, i stap weples, mo maet yu save soemaot tufala samting we tufala i stap long defdefren ples. Plante taem, i nidim nomo we yu putum olgeta tingting blong yu i stap long tok blong yu, yu no wari long tingting we ol man oli gat long yu. Sipos yu mekem olsem, bambae yu toktok olsem we yu stap storian evri dei, mo bambae yu mekem aksen we i stret. Taem wan man i no fraet mo i no wari, i isi nomo blong hem i muvum han mo bodi blong hem.

Ol aksen we yu mekem blong givim paoa long tok blong yu, oli soemaot se tok blong yu i kamaot long hat mo se yu bilif strong long samting we yu talem. Oli mekem wan poen i kamaot klia, oli mekem tok blong yu i laef, mo oli sapotem wan tingting we yu talem. I impoten blong muvum han mo bodi blong givim paoa long tok blong yu. !Be lukaot! Sipos yu ripitim sem aksen oltaem, hemia i save kam wan slak fasin. Sipos yu mekem sem aksen bakegen mo bakegen, ol man bambae oli stap wajem aksen ya nomo. Bambae aksen ya i no moa mekem wok blong hem long tok blong yu. Sipos brata we i lukaot long Tiokratik Skul i talem se yu gat wan problem olsem, yu mas traem stopem aksen ya, mo yu mas traem mekem ol aksen we oli blong eksplenem samting nomo. Taem yu kam gud long hemia, yu save stat bakegen blong mekem ol aksen we oli givim paoa long tok blong yu.

Sipos yu wantem faenemaot hamas aksen mo wanem kaen aksen we yu mas mekem blong givim paoa long tok blong yu, i gud yu tingbaot ol man we oli stap lesin. Sipos yu poenem fingga blong yu long olgeta, maet oli harem nogud. Long sam kantri, sipos wan man i sapraes nao i kavremap maot blong hem wetem han blong hem, ol man oli ting se hem i gat fasin olsem woman. Long sam kantri, ol man oli ting se i no stret we woman i saksakem han blong hem taem hem i toktok. Taswe long ol kantri olsem, taem ol sista oli toktok, maet oli muvum fes blong olgeta nomo blong soemaot tingting blong olgeta. Mo tu, long klosap evri ples long wol, taem man i storian long wan smol grup nao i mekem ol aksen we oli bigwan bitim mak, ol man oli luk hem olsem se i stap mekem fani nomo.

Taem yu givim plante tok finis mo yu no moa fraet tumas, ol aksen we oli givim paoa long tok blong yu bambae oli kamaot isi nomo. Bambae oli soemaot samting we i stap long hat blong yu, mo bambae oli soemaot se yu tok tru mo yu bilif strong long samting we yu stap talem. Bambae oli mekem we tok blong yu i gat mining.

Fes Blong Yu. Taem yu toktok, ating fes blong yu nao i soemaot moa se yu harem olsem wanem, i bitim ol narafala haf blong bodi blong yu. Ae blong yu, maot blong yu, mo hed blong yu we i lei smol i go long wan saed, oli soemaot samting ya. Maet yu no toktok nating, be fes blong yu nomo i save soemaot se yu no kea, yu no laekem wan samting, yu konfius, yu sapraes, no yu glad. Taem yu toktok mo fes blong yu i soemaot se yu harem olsem wanem, samting ya i save gat paoa long man we i luk yu mo long tingting blong hem tu. God i mekem man wetem plante masel long fes blong hem, i gat bitim 30 masel evriwan. Taem yu smael, klosap stret haf blong ol masel ya oli wok.

Taem yu stap toktok long fored blong ol man no long wok blong prij, yu stap givim save long olgeta. Save ya i gud tumas mo i save mekem man i glad. Be ol man bambae oli luksave samting ya moa sipos yu smael taem yu toktok. Sipos fes blong yu i no soemaot wan samting, maet ol man oli ting se yu no bilif long samting we yu stap talem.

Antap long hemia, taem yu smael, yu soemaot fasin fren long ol man. Hemia wan samting we i impoten tumas, from we tede ol man oli stap fraet long ol strenja. Sipos yu smael long wan man, yu save givhan long hem blong i no fraet, nao bambae hem i glad blong lesin long samting we yu talem.