Pruvum Samting We Yu Talem

TAEM yu toktok, ol man oli gat raet blong askem se: “?Wanem i pruvum se tok ya i tru? ?From wanem mi mi mas bilif long tok ya we hem i talem?” Taem yu tijim narafala, yu nao yu mas ansa long ol kwestin olsem, sipos no, yu mas givhan long ol man, blong olgeta nomo oli faenem ansa. Sipos tok we yu talem i impoten, yu mas pruvum, nao ol man oli save bilivim. Long fasin ya, bambae yu mekem se tok blong yu i pulum ol man blong oli bilif.

Aposol Pol i pulum man blong i bilif. Hem i pruvum ol tok blong hem, i mekem ol poen oli klia long tingting blong man, mo i toktok wetem fulhat blong hem. Hem i mekem ol samting ya blong traem givhan long man blong i jenisim tingting blong hem. Long fasin ya, hem i givim wan gudfala eksampol long yumi. (Wok 18:4; 19:8) I tru, sam man oli talem ol tok we i pulum ol man, from we oli wantem lidim olgeta oli gorong. (Mat. 27:20; Wok 14:19; Kol. 2:4) Maet oli stat wetem sam tok we oli no jekem gud, nao oli talem samting we i no tru. Maet oli yusum save blong ol man mo ol buk we i sem mak long rong tingting no tingting agens we oli gat. Maet oli yusum ol save we i no gat pruf blong hem. Maet oli no wantem luksave ol samting we i tru, we i defren long samting we olgeta oli tingbaot. Maet oli pulum ol man blong oli mekem samting we oli harem se oli wantem mekem nomo, i no samting we oli tingting gud long hem fastaem. Yumi no mas yusum ol fasin ya.

Tok i Mas Stanap Strong Long Baebol. Samting we yumi tijim man long hem i no mas kamaot long yumi nomo. Yumi traehad blong serem ol samting we yumi lanem long Baebol wetem ol narafala. Ol buk blong slef we i stret mo waes oli givhan bigwan long yumi long wok ya blong tijim ol man. Ol buk ya oli pulum yumi blong stadi gud long Baebol. Mo yumi pulum ol narafala man tu blong oli lukluk i go long Baebol. Yumi no mekem olsem wetem tingting ya blong pruvum se yumi stret. Be tingting daon nao i pulum yumi blong yumi wantem givhan long ol man blong oli lukluk gud long wanem we Baebol i talem. Yumi agri wetem Jisas Kraes, we hem i prea long Papa blong hem se: “Tok blong yu i tru olgeta.” (Jon 17:17) I no gat wan man we tok blong hem i hae moa, i winim Jehova God we hem i mekem heven mo wol. Sipos yumi wantem se tok blong yumi i gat paoa mo i tru olgeta, yumi mas mekem i stanap long Tok blong God.

Samtaem maet yu toktok long wan man we i no save Baebol nating, no long wan man we i no ting se Baebol i Tok blong God. Sipos i olsem, yu mas luksave stret taem blong yusum sam vas blong Baebol, mo stret toktok blong talem blong lidim man i go long ol vas ya. Be i gud yu traehad blong soem wan vas blong Baebol kwiktaem, from we hemia nao stamba blong ol save we yumi tokbaot.

?Olsem wanem? ?I stret blong ting se sipos yu talem ol tok we i kamaot long wan vas, hemia nomo i naf blong givim strong pruf we man i no save agensem? I no stret blong tingting olsem. Maet yu mas tokbaot sam vas raonabaot, blong soemaot se vas ya i pruvum samting we yu yu stap talem. Sipos yu wantem tokbaot wan rul blong Baebol long vas ya, be ol vas raonabaot oli stap tokbaot defren samting, maet yu mas givim moa pruf. Ating yu save soem sam narafala vas we oli tokbaot poen ya, blong mekem man i luksave se samting we yu stap talem i stanap strong long Baebol.

Taem yu stap eksplenem wanem samting we vas i pruvum, yu no mas ademap sam moa samting bitim wanem we i stret. Yu mas ridim gud vas ya. Maet bigfala tingting we yu stap tokbaot i stap insaed long vas ya. Be man bambae i bilif nomo sipos hem i luksave se vas ya i pruvum samting we yu yu stap talem.

Ol Narafala Pruf. Samtaem i gud yu yusum sam narafala pruf we i no kamaot long Baebol, be i kamaot long wan samting we yumi save trastem. Pruf olsem i save givhan long ol man blong oli luksave se ol tok blong Baebol i stret.

Maet yu tokbaot ol samting we yumi luk raonabaot long yumi, blong pruvum se i gat wan God we i mekem evri samting. Maet yu tokbaot graviti. Hem i olsem wan loa we i holem ol samting long skae oli stap long stret ples blong olgeta. Nao yu save tokbaot se i mas gat wan Man we i putum loa ya, blong ol samting long skae oli folem. Bambae ol tok blong yu i stret mo i klia sipos i stanap long ol save long Tok blong God. (Job 38:31-33; Sam 19:1; 104:24; Rom 1:20) Ol pruf olsem i gud, from we i soemaot se wanem we Baebol i talem i stret wetem ol samting we yumi luk.

?Yu yu stap givhan long wan man blong i luksave se Baebol hem i Tok blong God? Maet yu yusum tok blong sam man blong hae save we oli talem se Baebol i Tok blong God. ?Be yu ting se samting ya i naf blong pruvum poen ya? Ol tok blong wan man blong hae save bambae i givhan nomo long man we i respektem hem. Maet yu traem yusum save blong ol saentis blong pruvum se Baebol i tru. Be tingting blong ol saentis i no stret olgeta. Taswe sipos yu yusum tok blong olgeta olsem bigfala samting we i pruvum poen blong yu, i olsem we yu stap bildim haos long wan fandesen we i no strong. Be sipos yu yusum Tok blong God fastaem, nao biaen yu tokbaot ol samting we ol saentis oli faenemaot we i sapotem ol tok blong Baebol, ale ol tok blong yu bambae i stanap long wan fandesen we i strong.

Nomata wanem samting we yu stap traem blong pruvum, yu mas givim naf pruf blong soemaot se samting ya i tru. Samtaem maet yu nidim plante pruf, samtaem maet yu nidim smol nomo, i dipen long wanem kaen man we yu stap toktok long hem. Olsem nao, sipos yu stap tokbaot ol las dei long 2 Timoti 3:1-5, maet yu tokbaot wan nius ripot we i pruvum se ol man oli ‘no gat sore.’ Maet wan nius ya nomo i naf blong pruvum se saen ya blong ol las dei i stap kamtru.

I gud tu sipos yu tokbaot tu samting we sam impoten samting long saed blong tufala oli sem mak. Eksampol ya nomo bambae i no pruvum wan poen, from we yu mas jekem wetem Baebol tu. Be eksampol ya i save givhan long man blong i luksave se tingting we yu stap talem i no narakaen. Yu traem tingbaot sipos yu stap eksplenem Kingdom blong God, se hem i wan gavman. Maet yu tokbaot ol gavman blong man, se oli gat ol haeman blong olgeta, ol man we oli stap aninit long rul blong olgeta, ol loa, ol jaj, ol kot, mo ol skul we oli tijim man. Nao yu tokbaot se Kingdom blong God tu i gat ol samting ya.

Sipos yu wantem tokbaot sam advaes blong Baebol we i waes blong folem, plante taem i gud blong talem wan tru stori we i hapen long laef blong wan man we i folem advaes ya. Yu save yusum wan samting we i hapen long laef blong yu. Olsem nao, sipos yu stap tokbaot se i impoten blong ridim Baebol mo blong stadi long hem, yu save talem olsem wanem samting ya i mekem laef blong yu i gud moa. Taem aposol Pita i wantem leftemap tingting blong ol brata blong hem, hem i tokbaot samting we hem i bin luk. Hem i luk bigfala laet we i saenaot long Jisas mo i harem wan voes we i kamaot long heven. (2 Pita 1:16-18) Pol tu i tokbaot sam samting we oli hapen long laef blong hem. (2 Kor. 1:8-10; 12:7-9) Be yu no mas tokbaot laef blong yu tumas, from we samting ya i save pulum tingting blong ol man i kam long yu nomo.

Ol man wanwan oli gruap long defdefren ples mo fasin blong laef, mo tingting blong olgeta wanwan i defdefren. Taswe, pruf we yu givim long wan man i save mekem se hem i bilif, be long narafala man, maet i no mekem olsem. From samting ya, taem yu stap tingbaot wanem pruf we bambae yu givim mo ol tok we bambae yu talem, i gud yu save ol tingting blong man we yu toktok long hem. Ol Proveb 16:23 i talem se: “Man we i gat hed, hem i tingting gud fastaem, nao biaen i tok, mo ol samting we hem i talem i save pulum ol man oli folem tingting blong hem.”