Japta Fotin
?Jeova i Lidim Ogenaesesen Blong Hem Olsem Wanem?
1. ?Wanem save we Baebol i givim long saed blong ogenaesesen blong Jeova, mo from wanem samting ya i impoten long yumi?
?GOD i gat wan ogenaesesen? Baebol, we tabu spirit i pusum ol man blong raetem, i soemaot se God i gat wan ogenaesesen blong hem. Wan haf blong ogenaesesen ya i stap long heven mo Tok Blong God i givhan long yumi blong kasem save long hem. (Esikel 1:1, 4-14; Daniel 7:9, 10, 13, 14) Nating se yumi no save luk haf ya, hem i joen bigwan long wok blong ol trufala man blong God tede. (2 King 6:15-17) I gat wan haf blong ogenaesesen blong Jeova we yumi save luk from we hem i stap long wol ya. Baebol i halpem yumi blong save hu ya ogenaesesen ya mo olsem wanem Jeova i stap lidim hem.
Luksave Haf Blong Ogenaesesen Ya Long Wol
2. ?Wanem niufala kongregesen we God i jusum?
2 Nesen blong Isrel i stap olsem kongregesen blong God blong 1,545 yia. (Ol Wok 7:38) Be ol man Isrel oli no bin holem ol loa blong God fulwan mo oli sakemaot stret Pikinini blong God. From samting ya, Jeova i sakemaot kongregesen ya mo i lego hem. Jisas i talem long ol man Jiu i se: “Yufala i luk. God i lego yufala finis, ples blong yufala i emti i stap.” (Matiu 23:38) Ale, God i jusum sam narafala man blong oli stap olsem niufala kongregesen blong hem, mo hem i mekem wan niufala kontrak wetem kongregesen ya. God i jusum 144,000 man blong mekemap niufala kongregesen ya mo olgeta ya bambae oli joen wetem Pikinini blong hem long heven.—Revelesen 14:1-4.
3. ?Wanem i hapen long Pentekos 33 K.T. we i pruvum se naoia God i stap yusum wan niufala kongregesen?
3 Long Pentekos 33 K.T., tabu spirit blong Jeova i makemaot ol fasfala memba blong niufala kongregesen ya. Baebol i tokbaot spesel taem ya i se: “Long Dei blong Pentekos, we hemia wan lafet blong ol laen blong Isrel, olgeta ya we oli bilif long Jisas oli stap wanples. Nao wantaem nomo, i gat wan noes i kamaot long skae, we i olsem wan bigfala win i blu, nao noes ya i kavremap olgeta ples long haos ya we oli stap sidaon insaed long hem. Nao olgeta ya oli luk wan samting we i olsem faea i laet. Faea ya i seraot, nao laet blong hem i kam kasem evri man. Mo olgeta evriwan, Tabu Spirit i kam fulap long olgeta.” (Ol Wok 2:1-4) Taswe tabu spirit blong God i givim klia pruf se, grup ya nao we God bambae i yusum blong mekem stamba tingting blong hem i kamtru aninit long lida ya Jisas Kraes long heven.
4. ?Hu olgeta tede, we oli mekemap ogenaesesen blong Jeova long wol?
4 Tede, i gat wan smol haf nomo blong ol 144,000 man ya we oli stap yet long wol. Be folem ol profet tok blong Baebol, i gat wan “bigfala hip” blong “ol narafala sipsip,” we bambae oli kam joen wetem smol grup ya. Namba blong bigfala hip ya i bitim milian finis. Jisas we i Gudfala Man Blong Lukaot Long Sipsip, hem nao i joenem ol narafala sipsip ya wetem smol grup ya mo i mekem tufala i kam wan kampani nomo we i gat wan man nomo blong lukaot long olgeta. (Revelesen 7:9; Jon 10:11, 16) Olgeta evriwan ya oli mekemap wan kongregesen we i joengud, hemia ogenaesesen blong Jeova long wol.
Folem Tiokratik Oda
5. ?Hu i stap lidim ogenaesesen blong God, mo hem i mekem wok ya olsem wanem?
5 Tok we Baebol i yusum se “kongregesen blong God ya we i laef,” i soemaot klia hu nao i stap lidim ogenaesesen ya. Yes, ogenaesesen ya hem i folem tiokratik oda, i min se God nao i stap rul long hem. Be blong lidim ogenaesesen ya, Jeova i stap yusum Jisas, we hem i putumap olsem Hed blong kongregesen. Mo hem i yusum Tok blong Hem, Baebol tu.—1 Timoti 3:14, 15, NW; Efesas 1:22, 23; 2 Timoti 3:16, 17.
6. (a) ?Olsem wanem i klia long faswan handred yia, se God nao i stap lidim kongregesen? (b) ?Wanem i soem se Jisas i stap yet olsem Hed blong kongregesen?
6 Long Dei blong Pentekos, God i soemaot klia se hem nao i stap lidim kongregesen blong hem. (Ol Wok 2:14-18, 32, 33) Mo sam pruf blong samting ya, hemia taem enjel blong Jeova i lidim ol disaepol oli go blong talemaot gud nius long Afrika, mo taem voes blong Jisas i kamaot long heven blong talem long Sol blong Tasas wanem rod we i stret blong folem, mo taem Pita i stat blong prij long ol Hiten man. (Ol Wok 8:26, 27; 9:3-7; 10:9-16, 19-22) Be, biaen, ol disaepol oli no moa harem voes we i kamaot long heven, oli no moa luk ol enjel, mo tabu spirit i no moa givim sam spesel paoa long olgeta blong mekem merikel. Be Jisas i mekem promes ya se: “Yufala i mas save se mi bambae mi stap wetem yufala oltaem, gogo wol ya i finis.” (Matiu 28:20; 1 Korin 13:8) Tede, ol Witnes Blong Jeova oli luksave we Jisas i stap lidim olgeta. Sipos i no olsem, bambae oli no naf blong gohed strong blong talemaot Kingdom long taem we man i agensem olgeta bigwan.
7. (a) ?Hu ya “slef we i stret mo waes,” mo from wanem yumi talem olsem? (b) ?Wanem wok we “slef ” ya i mas mekem?
7 Smoltaem bifo we Jisas i ded, hem i talem long ol disaepol blong hem se i gat wan “slef we i stret mo waes” we Masta, i minim hem, bambae i givim spesel wok long hem. “Slef ” ya bambae i stap taem Masta i gobak long heven mo taem Kraes i kasem paoa long Kingdom blong heven, bambae slef ya i stap mekem wok blong hem yet. From samting ya, i klia se slef ya i no minim wan man, be i minim kongregesen blong Kraes we tabu spirit i makemaot hem. From we Jisas i pemaot kongregesen ya long blad blong hem, hem i save tokbaot olgeta olsem “slef ” blong hem. Hem i givim oda long ol memba blong grup ya se oli mas pulum ol man oli kam disaepol mo “givim kakae [long saed blong spirit] long olgeta long stret taem blong hem.”—Matiu 24:45-47, NW; 28:19; Aesea 43:10; Luk 12:42; 1 Pita 4:10.
8. (a) ?Grup we i olsem slef i gat wanem wok tede? (b) ?From wanem i impoten we yumi lesin long slef ya we God i stap yusum?
8 Taem Masta i kambak long 1914, ol man long wol oli no luk hem, be grup ya we i olsem slef i stap gohed long wok we Masta i bin givim long hem. Taswe long 1919, i klia se Masta i givim moa wok bakegen long grup ya. Afta long yia ya, wan spesel taem i stat blong talemaot Kingdom long fulwol, mo wok ya i stap gohed yet blong hivimap wan bigfala hip blong ol man we oli wantem wosipim Jeova. Olgeta ya oli save stap sef long taem blong bigfala trabol. (Matiu 24:14, 21, 22; Revelesen 7:9, 10) Bigfala hip ya i nidim kakae long saed blong spirit tu, mo grup we i olsem slef nao i stap givim kakae ya. Taswe, blong mekem Jeova i glad, yumi mas letem hem i tijim yumi tru long slef ya, mo mekem laef blong yumi laenap wetem tijing ya.
9, 10. (a) ?Long faswan handred yia, wanem rod i stap blong ansarem ol kwestin we man i gat long saed blong bilif mo blong lidim wok blong talemaot gud nius? (b) ?Wanem rod we Jeova i stap yusum tede blong lidim ol man blong hem long wok blong hem?
9 Sam samtaem, kwestin i stanap long saed blong wan tijing no wan rod we ogenaesesen i folem. ?Wanem i hapen long taem olsem? Ol Wok japta 15 i talem olsem wanem ol faswan Kristin oli stretem wan problem we i bin kamaot wetem ol Hiten man we oli stat joen long Kristin skul. Oli tokbaot problem ya long ol aposol mo olfala we oli stap long Jerusalem, we olgeta ya oli olsem hed kampani long taem ya. Ol man ya oli no stretgud olgeta, be God i stap yusum olgeta. Oli skelem wanem we Baebol i talem long bisnes ya mo oli tingbaot se tabu spirit blong God nao i lidim olgeta blong prij long ol Hiten man. Nao oli tekem wan disisen. God i blesem ol disisen blong hed kampani ya. (Ol Wok 15:1-29; 16:4, 5) Mo tu, hed kampani ya nao i sanem ol man oli go long evri ples blong mekem wok blong talemaot Kingdom.
10 Long taem blong yumi, sam brata we tabu spirit i makemaot olgeta, we oli blong ol defdefren kantri, oli mekemap Hed Kampani blong ogenaesesen blong Jeova long wol. Oli stap mekem wok ya long hedkwota blong ol Witnes Blong Jeova. Hed Kampani ya we Jisas Kraes i lidim, i stap mekem klin wosip i go kasem evri ples, mo i lidim wok blong prij blong ol Witnes Blong Jeova long plante taosen kongregesen. Olgeta we oli wok long Hed Kampani oli gat sem tingting olsem aposol Pol, we i raet i go long ol Kristin brata blong hem i se: “Mifala i no wantem mekem i strong long yufala, blong makem wanem tok i stret blong yufala i bilif long hem mo wanem i no stret, nogat. Bilif blong yufala, i stanap finis. Mifala i wantem wok wetem yufala, blong mekem yufala i harem gud moa.”—2 Korin 1:24.
11. (a) ?Olsem wanem oli putumap ol elda mo ol man blong givhan? (b) ?From wanem yumi mas wokgud wetem olgeta we oli gat wok insaed long kongregesen?
11 Ol Witnes Blong Jeova raon long wol oli lukluk i go long Hed Kampani blong jusum mo givim raet long sam brata we oli nafgud, blong oli putumap ol elda mo ol man blong givhan blong lukaot long ol kongregesen. Baebol nao i talemaot wanem mak we ol man ya oli mas kasem blong kam elda no man blong givhan. Mo ol mak ya oli no strong tumas blong kasem, nating se ol man ya oli no stretgud olgeta, mo oli mekem mastik samtaem. Ol elda we oli luklukgud long laef blong wan brata blong luk sipos hem i naf blong tekem wok insaed long kongregesen mo olgeta we bambae oli putumap brata ya long wok olsem, oli mekem wan impoten wok long fes blong God. (1 Timoti 3:1-10, 12, 13; Taetas 1:5-9) Taswe, oli prea blong God i halpem olgeta wetem spirit blong hem mo oli lukaot help blong hem long Baebol. (Ol Wok 6:2-4, 6; 14:23) I gud yumi soem tangkiu long ol man ya we oli olsem “presen,” we oli halpem yumi blong “yumi evriwan i save kam wan nomo” long bilif.—Efesas 4:8, 11-16.
12. ?Wanem wok we Jeova i yusum ol woman blong mekem folem tiokratik oda?
12 Baebol i soem se wok blong lukaot long kongregesen i blong ol man nomo. Hemia i no daonem ol woman, from we sam woman bambae oli kasem Kingdom blong heven, mo ol woman oli givhan bigwan long wok blong prij. (Ol Sam 68:11) Mo tu, taem ol woman oli lukaot gud long wok blong olgeta insaed long famle, oli mekem we kongregesen i gat gudnem long lukluk blong ol man raonabaot. (Taetas 2:3-5) Be wok blong tij insaed long kongregesen hem i blong ol man nomo.—1 Timoti 2:12, 13.
13. (a) ?Wanem tingting we Baebol i talem se ol elda oli mas gat long wok blong olgeta? (b) ?Wanem janis blong wok we yumi evriwan i gat?
13 Long lukluk blong wol, eni man we i holem wan hae posisen hem i wan impoten man. Be insaed long ogenaesesen blong God, rul we yumi folem hemia se: “Man we i daon moa long yufala evriwan, hem i hae moa long yufala.” (Luk 9:46-48; 22:24-26) Baebol i givim advaes long ol elda se oli mas lukaot blong no mekem olsem we oli bigfala masta blong ol sipsip ya we God i putum long han blong olgeta. Defren olgeta, oli mas soemaot eksampol blong stret fasin we ol sipsip ya oli save folem. (1 Pita 5:2, 3) Wok blong talemaot nem blong Jeova mo tokbaot Kingdom blong hem long olgeta ples, i no wok blong wan spesel grup blong man nomo. Olgeta Witnes Blong Jeova evriwan, ol man wetem ol woman, oli gat janis blong mekem wok ya blong Haefala Masta blong heven mo wol.
14. Yusum ol vas blong tokbaot ol kwestin we oli stap.
14 I gud we yumi askem long yumi wan se: ‘?Mi mi luksave mo mi agri long rod we Jeova i stap yusum blong lidim ogenaesesen blong hem long wol ya? ?Ol fasin, ol toktok, mo ol aksin blong mi oli soemaot samting ya?’ Ol poen we oli kam biaen oli save halpem yumi wanwan blong luksave sipos yumi stap mekem olsem.
?Sipos mi rili obei long Kraes we i Hed blong kongregesen, ale, folem wanem we Baebol i talem, bambae mi mi stap mekem wanem? (Matiu 24:14; 28:19, 20; Jon 13:34, 35)
?Taem mi gat tangkiu from ol plan mo ol presen long saed blong spirit we “slef ” mo Hed Kampani oli stap givim, mi mi stap soem respek long hu? (Luk 10:16)
?Yumi evriwan long kongregesen, antap moa ol elda, yumi mas mekem wanem fasin long ol Kristin brata sista blong yumi? (Rom 12:10)
15. (a) ?Fasin mo tingting we yumi gat long saed blong ogenaesesen blong Jeova long wol, i soemaot wanem? (b) ?Wanem sam samting we yumi gat janis blong mekem blong pruvum se Setan i man blong giaman mo blong mekem Jeova i glad?
15 Blong lidim yumi tede, Jeova i stap yusum ogenaesesen blong hem long wol ya we Kraes i hed blong hem. Fasin mo tingting we yumi gat long saed blong ogenaesesen ya i soemaot sipos yumi stap sapotem hae rul blong God no nogat. (Hibrus 13:17) Setan i wantem pruvum se yumi ol man, yumi intres nomo long yumi wan. Be sipos yumi rere blong mekem eni wok we God i givim long yumi mo yumi blokem fasin ya we yumi traem pulum ol man blong lukluk yumi nomo, bambae yumi pruvum we Setan i giaman. Sipos yumi lavem mo yumi respektem olgeta we oli lidim yumi, mo yumi no wantem nating blong ‘switim ol narafala man blong mekem ol man ya oli folem tingting blong yumi,’ ale bambae yumi mekem Jeova i glad. ( Jud 16; Hibrus 13:7) Sipos yumi stap tru long ogenaesesen blong Jeova, yumi soem se Jeova i God blong yumi mo yumi joengud wanples blong wosipim hem.—1 Korin 15:58.
Tingtingbak
• ?Hu ya ogenaesesen blong Jeova long wol tede? ?Wok blong hem i blong mekem wanem?
• ?Hu i Hed blong kongregesen, mo hem i yusum wanem rod long wol ya blong lidim yumi wetem lav?
• ?Wanem ol gudfala fasin we yumi mas soem long ol man insaed long ogenaesesen blong Jeova?
[Tok blong pija long pej 133]
Jeova i lidim yumi tru long ogenaesesen blong hem long wol, we Kraes i Hed blong hem