Japta Eitin

“Oli No Man Blong Wol Ya”

1. (a) ?Bifo we Jisas i ded, hem i prea from ol disaepol blong hem long saed blong wanem? (b) ?From wanem i impoten tumas we yumi “no man blong wol ya”?

LONG naet bifo we ol man oli kilim Jisas i ded, hem i prea from ol disaepol blong hem. Hem i save se Setan bambae i givim bigfala hadtaem long olgeta ya, taswe hem i talem long Papa blong hem se: “Mi mi no askem long yu blong yu tekemaot olgeta long wol ya. Mi wantem blong yu blokem man nogud ya Setan, blong i no kam spolem olgeta, yu holem olgeta oli stap gud oli sef. Mi mi no man blong wol ya, mo long sem fasin, olgeta tu oli no man blong wol ya.” ( Jon 17:15, 16) ?From wanem i impoten tumas we ol disaepol oli no joen long wol? From we Setan i rulum wol ya. Mo ol Kristin oli no wantem kam ol man blong wol ya we i stap long paoa blong rabis enjel ya.—Luk 4:5-8; Jon 14:30; 1 Jon 5:19.

2. ?Wanem sam samting we i soemaot se Jisas i no man blong wol ya?

² Jisas i no man blong wol ya, be hemia i no min se hem i no laekem ol man. Hem i mekem ol sikman oli kamgud bakegen, hem i mekem ol dedman oli laef bakegen, mo hem i tijim ol man long Kingdom Blong God. Mo tu, hem i givim prapa laef blong hem blong pemaot olgeta man long wol. Be Jisas i no laekem nating ol tingting mo fasin blong ol man blong wol ya we Setan i stap lidim olgeta. Taswe, hem i givim woning long ol man se oli no mas wantem tumas ol samting we oli nogud, oli no mas ronem mane, mo oli no mas lukaot haenem. (Matiu 5:27, 28; 6:19-21; Luk 20:46, 47) From samting ya, yumi save se Jisas i no joen long ol politik blong wol tu. Nating se hem i wan man Jiu, hem i no sapotem ol raorao blong politik we i stap gohed bitwin ol man Rom mo ol man Jiu.

“Kingdom Blong Mi i No Blong Wol Ya”

3. (a) ?Wanem giaman tok we ol lida blong skul oli sakem agensem Jisas long fored blong Paelat, mo from wanem? (b) ?Wanem i soem se Jisas i no intres nating blong kam king long wol ya?

³ Tingbaot wanem i hapen taem ol lida blong skul blong ol man Jiu oli holem Jisas. Oli tekem hem i go long Ponjes Paelat, wan man Rom we i hed gavman long ples ya. Oli stap harem nogud tumas from we Jisas i soemaot klia se oli gat tu fes. Nao oli wantem se hed gavman ya i panisim Jisas, taswe oli sakem giaman tok ya agensem Jisas se: “Mifala i faenem we man ya i stap pulum ol man ples blong mifala oli go krangke, oli agens long gavman. Hem i stap blokem mifala, se mifala i no pem takis long Sisa, we i stap rulum olgeta kantri. Mo hem i stap talemaot se hem i Mesaea, we i wan King.” (Luk 23:2) I klia nomo se tok blong olgeta i giaman from we, wan yia bifo long hemia, ol man oli bin traem blong fosem Jisas blong i kam king blong olgeta, be Jisas i no wantem. ( Jon 6:15) Jisas i save se bambae hem i kam King long heven mo hemia long fiuja nomo. (Luk 19:11, 12) Mo tu, i no ol man we bambae oli putumap hem olsem King, be Jeova nomo bambae i mekem samting ya.

4. ?Wanem tingting blong Jisas long saed blong takis we man i mas pem long gavman?

⁴ Tri dei nomo bifo we wan hip blong man i kam holem Jisas, ol Farisi oli bin traem pulum hem blong tok agensem fasin blong pem takis. Be Jisas i talem se: “Yufala i soem wan mane long mi [hemia wan denarias, we i mane blong Rom]. ?Fes ya i fes blong hu? ?Mo nem ya i nem blong hu?” Ol Farisi ya oli ansa se: “Fes blong Sisa ya, mo nem blong hem tu.” Nao Jisas i talem se: “Oraet, samting we i blong Sisa, yufala i givimbak long Sisa. Mo samting we i blong God, yufala i givimbak long God.”—Luk 20:20-25.

5. (a) ?Taem ol man oli kam blong holem Jisas, wanem lesen we Jisas i tijim long ol man blong hem? (b) ?Jisas i talem wanem long Paelat blong soem risen blong samting ya we hem i mekem? (c) ?Wanem disisen blong kot ya?

⁵ Jisas i neva pulum ol man blong oli agensem gavman. Taem sam soldia mo sam narafala man oli kam blong holem Jisas, Pita i karemaot naef blong faet blong hem mo i katemaot wansaed sora blong wan man. Be Jisas i talem se: “Yu putumbak naef blong yu long paos blong hem. Man we i stap tekem naef blong faet, hem bambae i ded long naef blong faet.” (Matiu 26:51, 52) Long nekis dei blong hemia, Jisas i eksplenem long Paelat se: “Kingdom Blong mi i no blong wol ya. Sipos kingdom blong mi i blong wol ya, bambae ol man blong mi oli save faet blong blokem olgeta ya we oli wantem putum mi long han blong ol man Jiu.” ( Jon 18:36, NW ) Paelat i luksave klia nomo se i no gat poen agens long Jisas. Be Paelat i letem hip blong ol man i winim tingting blong hem, nao i talem long olgeta blong oli nilim Jisas long pos.—Luk 23:13-15; Jon 19:12-16.

Ol Disaepol We Oli Biaen Long Jisas

6. ?Olsem wanem ol faswan Kristin oli lavem ol man be oli stap longwe long tingting mo fasin blong wol?

⁶ Ol disaepol blong Jisas oli save gud wanem we oli mas mekem blong stap olsem we oli no man blong wol ya. Oli mas stap longwe long ol tingting mo fasin blong wol ya we oli no kamaot long God. Ol man Rom oli laekem tumas blong wajem ol pleplei mo spot we oli raf tumas mo we oli leftemap ol nogud fasin blong seks. Ol disaepol oli save se i rong blong wajem no joen long ol samting ya. Taswe, ol man blong wol oli stap talem se ol disaepol oli no laekem ol narafala man. Be ol disaepol ya oli laekem ol man, mo oli wokhad blong halpem olgeta blong kasem blesing from ol samting we God i mekem blong sevem ol man.

7. (a) ?Ol faswan disaepol oli fesem wanem hadtaem from we oli no man blong wol ya? (b) ?Wanem tingting we ol disaepol oli gat long ol lida blong gavman mo fasin blong pem takis, mo from wanem oli tingting olsem?

⁷ Ol man oli mekem i nogud long ol disaepol blong Jisas olsem we oli bin mekem nogud long Jisas. Plante taem, ol lida blong gavman nao oli mekem nogud long olgeta, from we oli lesin long ol giaman stori we ol man olbaot oli talem long saed blong ol disaepol. Nating se ol lida oli mekem samting ya, aposol Pol i raetem leta i go long ol Kristin long Rom, blong talem long olgeta se oli mas “ona long gavman. Ol bigman blong gavman oli stap holem hae nem ya from we God nomo i givim long olgeta.” Hemia i no min se Jeova i stap stanemap ol gavman. Nogat. Be, Jeova i letem olgeta oli mekem wok blong olgeta go kasem taem we Kingdom blong hem nomo bambae i rulum wol ya fulwan. From samting ya, i stret we Pol i givim advaes long ol Kristin se oli mas respektem gavman mo pem takis.—Rom 13:1-7; Taetas 3:1, 2.

8. (a) ?Ol Kristin oli mas obei long ol lida blong gavman go kasem wanem mak? (b) ?Olsem wanem ol faswan Kristin oli folem eksampol blong Jisas?

⁸ Be, i no oltaem we ol disaepol oli obei long gavman, sam samtaem oli no save obei. Taem wan loa blong man i agensem loa blong Jeova, ol man blong Jeova oli mas obei long loa blong Jeova fastaem. Makem wanem we wan buk (On the Road to Civilization—A World History) i talem long saed blong ol faswan Kristin: “Sam loa we ol man Rom oli stap folem, be ol Kristin oli no wantem folem. Ol Kristin . . . oli luksave se sipos oli joen long ami, oli go agensem bilif blong olgeta. Oli no wantem tekem wan wok insaed long politik. Oli no wantem mekem wosip long bigfala rula [blong Rom].” Taem hae kot blong ol man Jiu i “tok strong” long ol disaepol se oli no moa prij, olgeta ya oli ansa se: “Mifala i mas obei long God, mifala i no save obei long man.”—Ol Wok 5:27-29.

9. (a) ?Long 66 K.T., wanem i pulum ol Kristin long Jerusalem blong tekem aksin? (b) ?Olsem wanem fasin blong olgeta i wan gudfala eksampol?

⁹ Ol disaepol oli no joen nating long ol raorao blong politik mo ol faet. Long 66 K.T., ol man Jiu long Judia oli girap agensem Sisa. Nao kwiktaem nomo ol ami blong Rom oli raonem Jerusalem. ?Ol Kristin we oli stap long taon ya oli mekem wanem? Oli tingbaot advaes we Jisas i bin talem se oli mas ronwe long taon ya. Ale, taem ol ami blong Rom oli aot blong smoltaem, ol Kristin oli ronwe i go long narasaed long Jodan Reva, oli go haed long ol hil blong Pela. (Luk 21:20-24) Fasin blong olgeta blong no joen long wol i givim wan gudfala eksampol long ol Kristin we oli kam biaen.

Ol Kristin We Oli Laef Long Ol Las Dei Ya

10. (a) ?Ol Witnes Blong Jeova oli stap bisi long wanem wok, mo from wanem? (b) ?Ol Kristin oli no tekpat nating long wanem samting?

¹⁰ ?I gat sam man long ol las dei ya we oli no joen nating long wol olsem we ol faswan Kristin oli bin mekem? Yes i gat. Hemia ol Witnes Blong Jeova. Long ol las dei ya, ol Witnes oli gohed strong blong talemaot se Kingdom Blong God nomo i save putum pis we i stap olwe, mo givim glad mo plante samting long ol man we oli lavem stret fasin. (Matiu 24:14) Be taem ol nesen oli raorao, ol Kristin oli no tekem wan saed agensem narawan.

11. (a) ?Olsem wanem ol Witnes oli defren olgeta long ol lida blong skul? (b) ?Ol Witnes Blong Jeova oli tingting olsem wanem long ol narafala man we oli joen long politik?

¹¹ Ol lida blong ol skul long wol ya oli mekem fasin we i defren olgeta long ol Kristin. Olgeta ya oli joen fulwan long politik. Long sam kantri, ol lida blong skul oli mekem kampen blong sapotem wan kandidet no blong agensem narafala kandidet. Sam lida blong skul oli gat wok insaed long gavman. Sam narafala lida blong skul oli pulum ol bigman blong gavman blong oli sapotem ol plan we olgeta oli putumap. Be, ol Witnes Blong Jeova oli no joen nating long politik. Oli no traem blokem ol man we oli wantem joen long wan pati blong politik, no we oli wantem kasem wan posisen insaed long gavman. Mo tu, oli no traem blokem ol man blong vot long taem blong eleksen. Jisas i talem se ol disaepol blong hem bambae oli no man blong wol ya, taswe ol Witnes Blong Jeova oli no tekpat long politik.

12. ?Wanem i kamaot from we ol skul oli joen long politik?

¹² Long taem blong yumi, ol nesen oli faet agensem narafala nesen bakegen mo bakegen, olsem we Jisas i bin talem. Mo tu, insaed long ol wanwan nesen i gat ol grup blong man we oli stap faetfaetem olgeta. (Matiu 24:3, 6, 7) Klosap oltaem nomo, ol lida blong skul oli sapotem wan nesen no wan grup agensem narawan, mo oli pulum ol memba blong jos tu blong oli mekem sem mak. ?Wanem i kamaot from? Ol man blong semfala skul nomo be oli stap kilkilim olgeta i ded long ol faet jes from we oli kamaot long defren kantri no defren laen. Hemia i agensem wanem we God i wantem.—1 Jon 3:10-12; 4:8, 20.

13. ?Wanem i pruvum se ol Witnes Blong Jeova oli no joen long wol?

¹³ Ol Witnes Blong Jeova oli strong blong stap longwe long olkaen faet no rao. Wajtaoa blong Novemba 1, 1939, i talem se: “Olgeta man we oli stap long saed blong Masta bambae oli no joen long ol faet we ol kantri oli mekem.” Ol Witnes Blong Jeova oli holem strong long disisen ya, nomata wanem kantri oli stap long hem mo wanem trabol i kamaot. Oli no letem politik mo ol faet oli seraotem kampani blong olgeta, we i olsem wan famle nomo raon long wol. Oli ‘hamarem ol naef blong faet oli kam aean blong digim graon mo ol spia oli kam huknaef blong katem grep.’ Yes, from we oli no joen long wol, oli no man blong mekem faet.—Aesea 2:3, 4; 2 Korin 10:3, 4.

14. ?From we ol Witnes Blong Jeova oli no joen long wol, oli kasem wanem?

¹⁴ ?Wanem i kamaot from we oli no man blong wol? Jisas i talem se: “Yufala i no man blong wol ya, . . . taswe ol man blong wol ya oli no laekem yufala, oli agens long yufala.” ( Jon 15:19) Plante Witnes Blong Jeova oli go long kalabus from we oli mekem wok blong God. Ol man oli spolem bodi blong olgeta, oli kilim sam long olgeta i ded, olsem oli bin mekem long ol Kristin blong faswan handred yia. Ol trabol ya i kasem olgeta from we Setan, “rabis god blong wol ya,” i agensem ol man blong Jeova, we oli no joen long wol ya.—2 Korin 4:4; Revelesen 12:12.

15. (a) ?Wanem bambae i hapen long olgeta nesen i no longtaem, mo ol Witnes Blong Jeova oli lukaot blong no mekem wanem? (b) ?From wanem i impoten tumas blong no joen long wol?

¹⁵ Ol man blong Jeova oli glad blong stap longwe long wol, from we i no longtaem, olgeta nesen blong wol ya bambae oli lus long Amagedon. (Daniel 2:44; Revelesen 16:14, 16; 19:11-21) Bambae yumi save sef long taem ya from we yumi no joen long wol. Olsem wan kampani raon long wol, yumi stap tru long Kingdom Blong God we i stap long heven. I tru se, taem yumi no joen long wol, ol man oli jikim yumi mo oli kilim yumi. Be, i no longtaem, olgeta samting ya bambae oli finis, from we rabis wol ya we i stap long paoa blong Setan bambae i lus blong olwe. Olgeta man we oli mekem wok blong Jeova bambae oli laef olwe long niufala wol we stret fasin nomo i stap long hem mo we Kingdom Blong God i rul long hem.—2 Pita 3:10-13; 1 Jon 2:15-17.

Tingtingbak

• ?Olsem wanem Jisas i soem mining blong tok ya se yumi “no man blong wol ya”?

• ?Ol faswan Kristin oli tingting olsem wanem long saed blong (a) ol tingting mo fasin blong wol, (b) ol gavman, mo (c) fasin blong pem takis?

• ?Long taem blong yumi, olsem wanem ol Witnes Blong Jeova oli soemaot se oli holem Kristin fasin blong no joen long wol?

[Tok blong pija long pej 165]

Jisas i talem se hem, wetem ol man blong hem, oli “no man blong wol ya”