Japta Naentin
Gohed Blong Talemaot Tok Blong God We Yu No Fraet Nating
1. (a) ?Wanem gudfala nius we ol disaepol blong Jisas oli talemaot, be sam man Jiu oli mekem wanem from nius ya? (b) ?Wanem kwestin we yumi save askem?
KLOSAP 2,000 yia bifo, tabu spirit i makemaot Jisas Kraes, we i pikinini blong God, olsem King we bambae i rulum wol long fiuja. Ol man oli kilim Jisas i ded folem rabis plan blong ol lida blong skul we oli no laekem Jisas nating. Be Jeova i mekem Jisas i laef bakegen long ded. From Jisas ya nao, ol man oli gat janis blong kasem laef we i no save finis. Be taem ol disaepol blong Jisas oli talemaot gud nius ya, ol man Jiu oli stat agensem olgeta. Oli sakem ol disaepol oli go long kalabus, oli wipim olgeta mo oli tok strong long olgeta se oli no mas tokbaot Jisas. (Ol Wok 4:1-3, 17; 5:17, 18, 40) ?Ol disaepol ya oli mekem wanem? ?Sipos yu yu stap long ples blong olgeta bambae yu mekem wanem? ?Bambae yu gohed blong givim witnes we yu no fraet nating?
2. (a) ?Wanem nambawan nius we ol man oli nidim blong harem tede? (b) ?Hu i gat wok ya blong talemaot gud nius?
2 Long 1914, King Blong Kingdom Blong God, hemia Jisas Kraes, i sidaon long jea blong king long heven blong “rulum ol enemi” blong hem. (Ol Sam 110:2) Nao, hem i sakemaot Setan mo ol rabis enjel long heven oli kamdaon long wol. (Revelesen 12:1-5, 7-12) Ol las dei blong rabis wol ya oli stat. Long en blong ol las dei ya, bambae God i spolem wol ya blong Setan, i finisim hem fulwan. (Daniel 2:44; Matiu 24:21) Ol man we God i sevem olgeta, bambae oli gat blesing ya blong laef olwe long paradaes long wol ya. Sipos yu yu harem mo yu bilif long gud nius ya, bambae yu wantem serem wetem ol narafala man tu. (Matiu 24:14) ?Be wanem bambae i hapen taem yu stat blong talemaot gud nius ya long ol narafala?
3. (a) ?Ol man oli mekem wanem taem yu talemaot gud nius blong Kingdom long olgeta? (b) ?Wanem kwestin we yumi mas askem long yumi wan?
3 Taem yu talemaot gud nius blong Kingdom, sam man bambae oli glad blong lesin, be bighaf blong ol man bambae oli no kea long nius ya. (Matiu 24:37-39) Maet sam man oli jikim yu no oli agensem yu. Jisas i talem se ol man blong famle blong yumi nomo, be bambae oli agensem yumi. (Luk 21:16-19) Maet yu fesem traem ya long wok no long skul tu. Long sam kantri long wol, gavman i putum tabu long wok blong ol Witnes Blong Jeova. ?Sipos yu fesem ol traem olsem bambae yu gohed blong talemaot tok blong God wetem fasin no fraet mo “stanap strong long bilif” blong yu?—1 Korin 16:13.
No Trastem Prapa Paoa Blong Yu
4. (a) ?Blong stap tru oltaem long Jeova, wanem wan impoten samting we yumi nidim? (b) ?From wanem ol Kristin miting oli impoten tumas?
4 Blong stap tru oltaem long Jeova mo wok blong hem, i impoten tumas blong trastem olgeta samting we hem i givim blong halpem yumi long saed blong spirit. Wan long ol samting ya hemia ol miting blong kongregesen. Baebol i pulum yumi blong no mestem ol miting. (Hibrus 10:23-25) Ol Witnes Blong Jeova we oli holem strong longtaem long bilif blong olgeta, oli naf blong mekem olsem from we oli traehad blong stap oltaem long ol miting wetem ol Kristin brata blong olgeta. Long ol miting ya, save we yumi gat long Baebol i stap gru. Mo tu, tangkiu we yumi gat long ol trutok we yumi save finis, i kam antap, mo yumi waes moa long ol defdefren rod blong yusum ol save ya. Yumi kam klosap moa long ol Kristin brata mo sista we yumi joen wetem olgeta blong wosip, mo yumi kasem paoa blong mekem wanem we God i wantem. Jeova i givim tabu spirit long kongregesen blong i lidimgud yumi, mo i olsem se Jisas i stap wetem yumi taem tabu spirit i stap.—Matiu 18:20; Revelesen 3:6.
5. ?Taem gavman i putum tabu long wok blong ol Witnes Blong Jeova, olsem wanem long ol miting?
5 ?Yu yu joen long olgeta miting? ?Yu yu traem bes blong yu blong folem wanem we yu harem long ol miting ya? Long sam kantri we gavman i putum tabu long wok blong ol Witnes Blong Jeova, ol brata oli mekem miting long ol smosmol grup nomo long haos blong sam brata. Maet i nidim blong jenisim taem mo ples blong ol miting ya oltaem, mo sam long ol miting ya maet oli mekem let long naet. Be ol brata sista blong yumi we oli strong long bilif oli traehad blong stap long olgeta miting ya, nating se maet i hadwok long olgeta mo i gat denja.
6. ?Olsem wanem yumi soemaot se yumi dipen long Jeova, mo olsem wanem samting ya i save halpem yumi blong gohed blong toktok wetem fasin no fraet?
6 Blong lanem blong trastem Jeova, yumi mas prea long hem evri dei from we yumi luksave se yumi nidim help blong hem. ?Yu yu mekem olsem? Taem Jisas i stap mekem minista wok blong hem long wol ya, hem i prea plante taem. (Luk 3:21; 6:12, 13; 22:39-44) Mo long naet bifo we oli nilim hem long pos, hem i talem strong long ol disaepol blong hem se: “Yufala i mas lukaot gud, yufala i mas prea, blong bambae i no gat wan samting i save traem yufala blong mekem yufala i foldaon.” (Mak 14:38) Sipos ol man oli no intres long mesej blong Kingdom we yumi talemaot, maet yumi save kam slak long wok blong prij. Sipos ol man oli jikim yumi no oli kilim yumi, maet yumi harem se i moagud we yumi stop blong prij olsem nao bambae yumi no gat trabol. Be sipos yumi prea strong blong God i halpem yumi wetem tabu spirit blong hem, bambae yumi save gohed blong toktok wetem fasin no fraet. Mo bambae yumi strong mo yumi no letem ol traem ya oli mekem we yumi foldaon.—Luk 11:13; Efesas 6:18-20.
Oli No Fraet Blong Talemaot Gud Nius
7. (a) ?From wanem yumi intres long stori we i stap long buk blong Ol Wok? (b) Ansarem ol kwestin we oli stap long en blong paragraf ya, mo traem faenem olsem wanem yumi save karem gudfala frut from save ya.
7 Stori we i stap long buk blong Ol Wok i pulum intres blong yumi evriwan. Stori ya i soemaot olsem wanem ol aposol mo ol narafala faswan disaepol—we oli man olsem yumi nomo— oli winim ol traem mo oli no fraet blong stap tru long Jeova olsem ol witnes blong hem. I gud yumi traem kasem moa save long wan haf blong stori blong olgeta ya. Blong mekem olsem, bambae yumi storebaot ol kwestin mo vas we oli stap daon. Tingbaot olsem wanem ol vas we yu ridim oli save givhan long yu wan.
?Ol aposol oli man blong hae save? ?Oli ol man we neva oli fraet, nomata wanem samting i kamaot long laef blong olgeta? ( Jon 18:17, 25-27; 20:19; Ol Wok 4:13)
?Wanem i givhan long Pita blong i no fraet blong toktok long fored blong kot blong ol man Jiu we i bin jajem stret pikinini blong God se bambae i mas ded? (Matiu 10:19, 20; Ol Wok 4:8)
?Ol aposol oli bin mekem wanem long ol wik bifo we ol man oli tekem olgeta i kam fored long Sanhedrin [hae kot blong ol man Jiu]? (Ol Wok 1:14; 2:1, 42)
?Pita mo Jon, tufala i ansa olsem wanem taem ol lida oli tok strong long ol aposol se oli mas stop blong talemaot nem blong Jisas? (Ol Wok 4:19, 20)
?Afta we ol aposol oli aot long kalabus, oli lukluk i go long hu blong kasem help? ?Taem oli prea, oli askem God blong i stopem ol man blong oli no moa kilim olgeta, no oli prea olsem wanem? (Ol Wok 4:24-31)
?Jeova i yusum wanem rod blong givhan long ol aposol taem ol man oli traem stopem wok blong prij? (Ol Wok 5:17-20)
?Ol aposol oli save from wanem God i mekem oli kam fri taswe oli mekem wanem blong soemaot samting ya? (Ol Wok 5:21, 41, 42)
?Taem ol trabol i mekem se plante disaepol oli ronwe i go long ol defdefren ples, oli gohed blong mekem wanem? (Ol Wok 8:3, 4; 11:19-21)
8. ?Wanem nambawan frut i kamaot long wok blong ol faswan disaepol, mo wanem i mekem se yumi joen long wok ya tu?
8 Wok blong talemaot gud nius i no wan wok we oli mekem blong nating nomo. Raonabaot 3,000 disaepol oli tekem baptaes long Pentekos 33 K.T. “Oltaem, Hae God i stap joenem plante man mo woman moa we oli stap bilif long Jisas long grup blong olgeta.” (Ol Wok 2:41; 4:4; 5:14) Sol blong Tasas, wan man we i bin mekem bigfala trabol tumas long ol man blong God, i kam wan Kristin we i no fraet nating blong talemaot trutok. Biaen, oli singaot hem se aposol Pol. (Galesia 1:22-24) Wok we ol disaepol oli statem long faswan handred yia i no finis yet. Long ol las dei ya, wok ya i kam antap bigwan mo i go kasem olgeta ples long wol. Yumi gat nambawan janis blong joen long wok ya, mo taem yumi mekem olsem, yumi save lanem plante samting long eksampol blong ol trufala witnes blong Jeova we oli mekem wok ya bifo long yumi.
9. (a) ?Wanem janis we Pol i tekem blong prij? (b) ?Wanem ol defren rod we yu yusum blong talemaot mesej blong Kingdom long ol narafala?
9 ?Taem Pol i lanem trutok long saed blong Jisas Kraes, hem i mekem wanem? “Wantaem nomo, hem i stat . . . talemaot se Jisas ya, hem i Pikinini blong God.” (Ol Wok 9:20) Pol i luksave se God i soemaot kaengud fasin long hem, mo hem i luksave tu se olgeta man oli nidim gud nius ya we hem i bin kasem. Pol i wan man Jiu, mo folem kastom blong olgeta ya, hem i go long ol haos prea blong prij. Hem i go tu long ol haos wanwan mo hem i storian wetem ol man long ples blong maket, i stap mekem olgeta oli tingting gud long Baebol. Mo hem i rere blong muv i go long narafala ples blong talemaot gud nius.—Ol Wok 17:17; 20:20; Rom 15:23, 24.
10. (a) ?Taem Pol i prij, olsem wanem hem i soem se hem i no fraet mo hem i gat fasin luksave? (b) ?Olsem wanem yumi save soem ol fasin blong Pol taem yumi prij long ol famle, long ples blong wok no long ol fren long skul?
10 Pol i no fraet blong toktok, be hem i gat fasin luksave tu. Yumi mas gat sem fasin. Taem Pol i toktok long ol man Jiu, hem i tokbaot ol promes we God i bin mekem long ol bubu blong olgeta bifo. Taem hem i toktok long ol man Gris, hem i tokbaot ol samting we olgeta oli savegud long hem. Sam samtaem hem i yusum stori blong hem, olsem wanem hem i lanem trutok, blong prij long ol man. Hem i se: “Mi mekem ol samting ya from gud nius blong Jisas Kraes, blong bambae mi tu mi save kasem ol gudgudfala samting we i blong olgeta we oli bilif long gud nius ya.”—1 Korin 9:20-23; Ol Wok 22:3-21.
11. (a) ?Pol i mekem wanem blong i no westem taem blong raorao wetem ol man we oli agensem hem? (b) ?Wetaem mo olsem wanem yumi save waes olsem Pol? (c) ?Hu i givim paoa we yumi nidim blong gohed blong toktok we yumi no fraet?
11 Sam samtaem, ol man oli agensem Pol bigwan gogo hem i luk se i moagud we hem i go prij long narafala ples blong smoltaem. Hem i no westem taem blong raorao bakegen mo bakegen wetem ol man ya we oli agensem hem. (Ol Wok 14:5-7; 18:5-7; Rom 12:18) Be hem i neva sem long gud nius. (Rom 1:16) I tru, Pol i no laekem nating taem ol man oli tok nogud long hem—mo givim kil long hem tu—be ‘God i mekem tingting blong hem i strong’ blong gohed blong prij. Hem i se: “Masta blong yumi, hem i stap wetem mi, mo hem i givim paoa long mi blong mi talemaotgud ol tok blong hem.” (1 Tesalonaeka 2:2; 2 Timoti 4:17) Jisas, we hem i Hed blong Kristin kongregesen, i gohed blong givim paoa we yumi nidim blong mekem wok we hem i bin talemaot finis se bambae yumi mas mekem long taem blong yumi.—Mak 13:10.
12. ?Ol Kristin we oli no fraet blong toktok oli mekem wanem, mo from wanem oli no fraet?
12 Yumi mas gohed blong talemaot tok blong God we yumi no fraet, olsem we Jisas mo ol narafala man blong God oli bin mekem long faswan handred yia. Hemia i no min se yumi no kaen long ol man mo i no min se yumi traem fosem olgeta blong lesin long tok blong God sipos oli no wantem. Be i min se yumi no stop blong talemaot gud nius taem ol man oli no wantem lesin; mo yumi no lego wok ya taem oli agensem yumi. Yumi mekem olsem Jisas, mo yumi pulum tingting blong ol man i go long Kingdom Blong God olsem stret gavman blong rulum wol. Yumi no hafhaf long toktok we yumi talemaot, from we yumi tok long nem blong Jeova, Haefala Rula Blong Heven Mo Wol, mo ol tok we yumi talemaot i no kamaot long yumi be i kamaot long Hem. Lav we yumi gat long Jeova, hemia nao bigfala samting we i mas pusum yumi blong presem hem.—Filipae 1:27, 28; 1 Tesalonaeka 2:13.
Tingtingbak
• ?From wanem i impoten blong serem gud nius blong Kingdom wetem evri man, mo yumi save se sam man bambae oli mekem wanem?
• ?Olsem wanem yumi soemaot we yumi no dipen long prapa paoa blong yumi nomo blong mekem wok blong Jeova?
• ?Wanem gudfala lesen we yumi lanem long buk blong Ol Wok?
[Tok blong pija long pej 173]
Olsem long taem bifo, ol man blong Jeova tede oli talemaot tok blong God we oli no fraet