Japta Twanti
No Fogetem Dei Blong Jeova
1. ?Taem yu lanem fastaem se ol man oli gat janis blong kam fri long ol trabol blong olfala wol ya, yu yu harem olsem wanem?
WAN long ol faswan samting we yu lanem taem yu stadi long Baebol hemia se stamba tingting blong Jeova i blong mekem wol ya i kam wan paradaes. Long niufala wol, bambae i no moa gat ol faet, fasin blong brekem loa, fasin pua, ol sik, fasin safa, mo ded. Ol dedman tu, bambae oli laef bakegen. !Hemia ol nambawan promes we yumi wantem tumas blong luk! Wan pruf we i soemaot se olgeta promes ya bambae oli kamtru i no longtaem, hemia se Kraes i stat rul finis olsem King long 1914 mo, stat long taem ya, yumi stap laef long ol las dei blong rabis wol ya. !Taem ol las dei oli finis, bambae Jeova i spolem rabis wol ya mo i karem ol man blong hem oli go long niufala wol ya!
2. ?Wanem ya “Dei blong Masta blong yumi”?
2 Baebol i talem se, taem ya we God bambae i spolem olgeta samting, hemia “Dei blong Masta blong yumi [ Jeova].” (2 Pita 3:10) Hem i “dei blong kros blong Jeova” agensem wol ya blong Setan. (Sefanaea 2:3, NW ) Dei ya bambae i finis wetem “faet long bigfala Dei blong God ya we i gat olgeta paoa . . . we long lanwis blong ol laen blong Isrel nem blong hem ‘Amagedon.’ ” Long faet ya, “ol king blong evri ples long wol” bambae oli lus. (Revelesen 16:14, 16) ?Long laef blong yu, yu soemaot we yu yu bilif fulwan long ‘dei blong Jeova’ se hem i klosap?—Sefanaea 1:14-18; Jeremaea 25:33.
3. (a) ?Dei blong Jeova bambae i kam wetaem? (b) ?From wanem i gud we Jeova i no talemaot stret ‘dei mo taem’ blong samting ya?
3 Baebol i no talem stret taem we Jisas Kraes bambae i kam olsem Man we Jeova i jusum blong Givim Panis long rabis wol ya blong Setan. Jisas i talem se: “Dei blong samting ya, mo taem blong hem, i no gat man i save. Ol enjel long heven mo mi tu we mi Pikinini blong God, be mifala i no save. Papa blong mi, hem nomo i save.” (Mak 13:32) Ol man we oli no rili lavem Jeova, bambae oli tingting se dei ya i no save kam yet, nao bambae oli gohed blong ronem ol samting blong wol ya. Be ol man we oli rili lavem Jeova bambae oli yusum ful laef blong olgeta blong mekem wok blong hem, nomata wanem taem we rabis wol ya bambae i lus.—Ol Sam 37:4; 1 Jon 5:3.
4. ?Wanem woning we Jisas i givim?
4 Jisas i givim wan woning long olgeta man we oli lavem Jeova, i se: “Yufala i mas lukaot gud, mo oltaem yufala i mas rere, from we yufala i no save taem ya we bambae olgeta samting ya oli kamtru.” (Mak 13:33-37) Hem i askem strong long yumi blong no letem kakae mo dring mo ol wari blong laef oli tekem tumas taem blong yumi nao yumi no moa tingbaot se yumi stap long taem we i impoten tumas.—Luk 21:34-36; Matiu 24:37-42.
5. ?Olsem Pita i talem, dei blong Jeova bambae i mekem wanem i kamaot?
5 Pita tu i givim advaes long yumi blong no fogetem “dei [blong Jeova we] bambae heven i bon long faea mo i lus, mo ol defren haf [long skae bambae] oli hot we i hot tumas, gogo kasem we oli ronaot nomo.” Olgeta gavman blong man—we “heven” i pija blong olgeta—bambae oli lus, wetem ol rabis man tu—we “wol” i pija blong olgeta. “Ol defren haf ” ya, we i minim ol tingting mo wok blong rabis wol ya, olsem tingting blong stap independen long God mo laef we i fulap long ol doti fasin blong seks mo fasin blong ronem mane, olgeta ya tu bambae oli mas lus. Afta we ol samting ya oli lus, bambae i gat wan “niufala heven [Kingdom Blong God long heven] mo niufala wol [wan niufala fasin blong laef long wol], we stret fasin nomo bambae i stap long hem.” (2 Pita 3:10-13, NW ) Trabol ya we i spolem olgeta samting long wol, bambae i hapen kwiktaem nomo, long wan dei mo taem we yumi no tingbaot.—Matiu 24:44.
Stap Wekap Blong Luksave Saen
6. (a) ?Ansa we Jisas i givim long ol disaepol blong hem i kamtru olsem wanem long ol man Jiu? (b) ?Wanem haf blong ansa blong Jisas i laenap wetem ol samting we oli hapen stat long 1914 i go?
6 Yumi stap long wan taem we i impoten tumas, taswe yumi mas save gud ol defren haf blong saen ya we i soemaot se yumi stap long ol las dei—taem we “fasin blong wol ya i kasem en blong hem.” Tingbaot se taem Jisas i ansarem kwestin blong ol disaepol blong hem, we i stap long Matiu 24:3 (NW ), sam nomo long ol samting we hem i tokbaot long vas 4 kasem 22 oli bin kamtru finis long ol man Jiu long ol yia 33 kasem 70 K.T. Be bighaf blong profet tok ya i kamtru stat long 1914, taem Kraes i ‘stap finis [olsem king] mo fasin ya blong wol i kasem en blong hem.’ Matiu 24:23-28 i talem wanem we bambae i hapen stat long yia 70 K.T. go kasem taem we Kraes i kam King. Ol samting we Matiu 24:29–25:46 i tokbaot oli mas kamtru long taem blong en.
7. (a) ?From wanem i gud we yumi wanwan i stap wajem olsem wanem ol samting we oli hapen raonabaot long yumi oli stret long ol saen ya? (b) Ansarem ol kwestin long en blong haf ya we oli soem olsem wanem ol saen oli kamtru stat long 1914.
7 Yumi wanwan i mas stap wajem wanem samting i hapen mo wanem fasin we ol man oli gat we i mekem saen ya i kamtru. Sipos yumi traem luksave olsem wanem ol samting ya oli laenap wetem ol profet tok blong Baebol, bambae yumi no save fogetem dei blong Jeova. Mo tu, samting ya bambae i givhan long yumi blong toktok wetem strong bilif taem yumi givim woning long ol man se dei ya i stap kam klosap. (Aesea 61:1, 2) I gud yumi tingbaot samting ya taem yumi lukluk long ol kwestin biaen, we oli soemaot ol defren haf blong saen ya, olsem we i stap long Matiu 24:7 mo Luk 21:10, 11.
?Olsem wanem saen ya se ol “kantri bambae oli mekem faet long ol narafala kantri,” i kamtru bigwan stat long 1914? ?Long saed blong ol faet, wanem i bin hapen afta long yia ya?
?Long 1918, wanem sik we i karemaot laef blong plante moa man i bitim Wol Wo Wan? ?Nating se ol man oli gat plante moa save long saed blong meresin naoia, be wanem ol sik we oli stap gohed yet blong kilim plante milian man i ded?
?Nating se save blong ol sayentis i kam antap long laswan handred yia, be wanem trabol long saed blong hanggri we i spolem plante man yet?
?Wanem i pruvum long yu se ol tok blong 2 Timoti 3:1-5, 13, oli no stap tokbaot fasin blong laef we i stap longtaem finis long wol ya, be i stap tokbaot laef we i jenis bigwan long ol las dei ya klosap long en blong wol?
Seraotem Ol Man
8. (a) ?Wanem narafala samting i mas hapen long taem ya we klosap rabis wol ya i lus, olsem Matiu 13:24-30, 36-43 i tokbaot? (b) ?Wanem mining blong parabol ya blong Jisas?
8 Jisas i tokbaot sam narafala impoten samting we oli mas hapen long taem ya we klosap rabis wol ya i lus. Wan long ol samting ya hemia wok blong seraotem “ol man we God i King blong olgeta” long “ol man blong Setan.” Jisas i tokbaot samting ya long parabol blong hem blong wan garen we enemi i sakem ol sid blong rabis gras long hem. “Ol gudfala sid” long parabol ya i minim ol Kristin we tabu spirit i makemaot olgeta. “Ol rabis gras ya” i minim olgeta we oli talem se oli Kristin be rili, oli “ol man blong Setan,” from we oli no wantem lego ol fasin mo tingting blong wol ya we Setan i bos long hem. Olgeta ya bambae oli no moa stap wetem ol ‘pikinini we God i King blong olgeta’ be bambae oli kasem panis blong lus olwe. (Matiu 13:24-30, 36-43) ?Wok ya blong seraotem ol man i stat finis?
9. (a) ?Afta long Wol Wo Wan, olsem wanem ol man we oli talem se oli Kristin oli seseraot? (b) ?Olsem wanem ol tabu Kristin oli soemaot se oli ol trufala man blong Kingdom?
9 Afta long Wol Wo Wan, olgeta man we oli talem se oli Kristin oli seraot long tu haf: (1) Olgeta lida blong Krisendom wetem ol man blong olgeta, we oli sapotem Ligofnesen (we naoia hem i Yunaeted Nesen) mo oli leftemap prapa kantri blong olgeta, mo (2) ol trufala Kristin we, long ol yia afta long faet ya, oli sapotem Kingdom Blong Mesaea Blong God fulwan, i no ol nesen blong wol ya. ( Jon 17:16) Ol Kristin ya oli soemaot se oli ol trufala man blong Kingdom Blong God from we oli statem wok blong talemaot “gud nius ya blong Kingdom” long olgeta ples long wol. (Matiu 24:14, NW ) ?Wanem frut we i kamaot long wok ya?
10. ?Wok blong talemaot Kingdom i mekem wanem samting i kamaot fastaem?
10 Fastaem, oli hivimap ol laswan long grup ya we tabu spirit blong God i makemaot olgeta blong rul wetem Kraes long Kingdom blong heven. Nating se olgeta ya oli stap long plante nesen raon long wol, be oli joengud olsem wan kampani nomo. Taem i kam klosap nao, we wok blong putum mak long olgeta ya bambae i finis.—Revelesen 7:3, 4.
11. (a) ?Wanem wok blong hivimap ol man, i stap gohed yet, mo hemia i laenap wetem wanem profet tok? (b) ?From we profet tok ya i stap kamtru, hemia i soemaot wanem?
11 Biaen, Kraes i lidim wok ya blong hivimap “wan bigfala hip blong ol man, we . . . oli kamaot long olgeta kala, mo long olgeta kantri, mo long olgeta laen, mo long olgeta lanwis.” Olgeta ya oli ol “narafala sipsip” ya we bambae oli laef tru long “bigfala trabol” mo oli stap long niufala wol blong God. (Revelesen 7:9, 14; Jon 10:16) Wok blong talemaot Kingdom Blong God bifo we en i kam, i stap gohed yet tede. Bigfala hip blong ol narafala sipsip ya, we naoia namba blong olgeta i kasem plante milian man, i holemstrong long wok blong halpem ol tabu brata blong olgeta, blong oli talemaot impoten nius blong Kingdom. Ol man blong evri nesen oli stap harem nius ya.
?Wanem i Stap Long Fiuja?
12. ?Yumi mas gohed blong prij go kasem wanem mak bifo we dei blong Jeova bambae i kam?
12 Ol samting we yumi tokbaot finis oli soemaot se yumi stap klosap long taem we ol las dei bambae oli finis mo bigfala dei blong Jeova bambae i kamtru. ?Be i gat sam narafala profet tok we oli mas kamtru bifo we bigfala dei ya i stat? Yes. Wok blong seraotem ol man we oli sapotem Kingdom, i no finis yet. Long sam kantri we ol Witnes oli bin kasem fasin agens blong plante yia finis, naoia i gat plante moa disaepol oli stap joen wetem olgeta. Long ol ples ya tu we ol man oli no wantem harem gud nius, be yumi gohed blong prij blong soemaot se Jeova i sore yet long ol man ya. !Taswe, yumi mas gohed blong wok! Jisas i talem se taem wok ya i finis, ale, en bambae i kam.
13. ?Wanem impoten samting we i mas kamtru yet, olsem 1 Tesalonaeka 5:2, 3 i talem, mo hemia bambae i soemaot wanem long yumi?
13 Wan narafala impoten profet tok blong Baebol i talemaot se: “Taem bambae ol man oli talem se: ‘!Pis mo seftaem!’ long taem ya nao, bambae trabol i kam blong spolem ol man ya olgeta. Bambae trabol ya i kam long olgeta wantaem nomo, olsem woman we i gat bel, taem hem i harem nogud blong bonem pikinini. Mo olgeta bambae oli no save ronwe nating.” (1 Tesalonaeka 5:2, 3, NW ) Yumi no save yet olsem wanem ol man bambae oli singaot long tok ya “pis mo seftaem.” Be i klia se tok ya i no min se, ol lida blong wol oli stretem finis ol trabol blong ol man. Nogat. Ol man we oli tingrere oltaem long dei blong Jeova, bambae oli no bilivim tok ya. Oli save finis se, afta we ol man oli talem tok ya, wantaem nomo, bigfala trabol bambae i kam.
14. ?Wanem ol samting we bambae oli hapen long taem blong bigfala trabol, mo ol samting ya bambae oli folem wanem oda?
14 Long stat blong bigfala trabol ya, ol lida blong gavman bambae oli agensem Bigfala Babilon, hemia olgeta giaman skul blong wol, mo bambae oli spolem olgeta. (Matiu 24:21; Revelesen 17:15, 16) Afta long hemia, olgeta kantri bambae oli agensem ol man we oli stap leftemap hae rul blong Jeova. Aksin blong olgeta ya bambae i pulum kros blong Jeova i kamap agensem olgeta gavman mo ol sapota blong olgeta, mo long taem ya nao bambae oli go blong lus olgeta. Hemia nao faet blong Amagedon we bambae i finisim bigfala trabol ya. Ale, Setan mo ol rabis enjel blong hem bambae oli go kalabus, we oli no moa save bos long laef blong ol man. Yes, ol samting ya bambae oli makem en blong dei blong Jeova, we bambae i leftemap nem blong hem.—Esikel 38:18, 22, 23; Revelesen 19:11–20:3.
15. ?From wanem i no waes blong tingting se dei blong Jeova i stap longwe yet?
15 En blong wol ya bambae i kam long stret taem we God i makem finis. Hem i no save let. (Habakuk 2:3) Rimemba taem we Jerusalem i lus long 70 K.T. Samting ya i hapen kwiktaem nomo, we ol man Jiu oli no rere from, mo oli ting se denja i pas finis. ?Mo olsem wanem long Babilon bifo? Babilon i wan strongfala taon, ol man blong hem oli trastem ol bigbigfala stonwol blong taon ya se bambae oli blokemgud ol enemi. Be long wan naet nomo hem i lus. Long sem fasin, kwiktaem nomo God bambae i spolem rabis wol we i stap naoia. Mo taem trabol ya i kam, i gud se yumi stap joengud long trufala wosip from we yumi stap tingrere long dei blong Jeova.
Tingtingbak
• ?From wanem i impoten blong tingting rere oltaem long dei blong Jeova? ?Wanem i save givhan long yumi blong mekem olsem?
• ?Fasin blong seraotem ol man blong God long ol man blong Setan i joen olsem wanem long laef blong yumi wanwan?
• ?Wanem samting we i mas kamtru yet, bifo we dei blong Jeova i stat? ?Taswe, yumi wanwan i mas stap mekem wanem?
[Tok blong pija long pej 180]
I no longtaem ol las dei bambae oli finis nao rabis wol ya blong Setan bambae i lus