Aoa i Kam Finis Blong ‘God i Jajem’ Ol Man

LASWAN buk blong Baebol, Revelesen, i talem se i gat wan enjel we i stap flae antap long skae, i “stap talemaot gud nius ya we i blong stap oltaem nomo, gogo i no save finis.” Enjel ya i singaot bigwan, i se: “Yufala i mas ona gud [“fraet,” NW] long God, mo yufala i mas leftemap nem blong hem, from we taem [“aoa,” NW] i kam finis blong hem i jajem olgeta man.” (Revelesen 14:6, 7) I gat tu samting we bambae oli mas kamtru long ‘aoa blong jajem ol man’: God bambae i givim woning blong talemaot jajmen, mo God bambae i mekem jajmen blong hem i kamtru. “Aoa” i wan sot taem nomo. God bambae i mekem jajmen blong hem i kamtru long en blong “ol las dei,” mo yumi stap long ol las dei naoia.—2 Timoti 3:1, NW.

‘Aoa blong jajem ol man’ i wan gudfala nius long ol man we oli laekem stret fasin. Long taem ya, God bambae i tekemaot trabol blong ol man blong hem, we oli bin safa bigwan from rabis wol ya we i fulap long raf fasin mo i no gat lav nating.

‘Aoa blong jajem ol man’ bambae i finis taem God i spolem ol rabis fasin blong wol ya. Naoia, bifo we aoa ya i finis, yumi mas obei long oda ya: “Yufala i mas ona gud [“fraet,” NW] long God, mo yufala i mas leftemap nem blong hem.” ?Yu yu stap mekem samting ya? I no naf we yu talem nomo se yu bilif long God, nogat. (Matiu 7:21-23; Jemes 2:19, 20) Fraet long God i mas pulum yumi blong ona long hem. Fraet ya i mas pulum yumi tu blong agensem ol nogud fasin. (Ol Proveb 8:13) Mo fraet ya i mas givhan long yumi blong lavem ol samting we oli gud mo blong no laekem nating ol samting we oli nogud. (Amos 5:14, 15) Sipos yumi ona long God, bambae yumi lesin long hem wetem bigfala respek. Bambae yumi no bisi tumas long ol prapa wok blong yumi, we yumi no gat taem blong ridim Tok blong hem, Baebol, evri dei. Oltaem bambae yumi trastem hem wetem fulhat blong yumi. (Ol Sam 62:8; Ol Proveb 3:5, 6) Olgeta we oli rili ona long God, oli luksave se hem i wokem heven mo wol, mo se hem i King blong heven mo wol. Olgeta oli lavem hem, ale oli obei long hem olsem King blong olgeta. Sipos yumi luksave se yumi no stap mekem ol samting ya, yumi mas stretem kwiktaem nomo.

I gat wan narafala nem blong taem ya we enjel i talem se jajmen bambae i kamtru long ol man, nem ya se ‘Bigfala Dei blong Hae God.’ Long yia 607 B.K.T.,a wan “dei” blong jajem ol man i kamtru long Jerusalem, from we ol man long taon ya oli no obei long ol woning we ol profet blong Jeova oli bin talemaot. Oli holem tingting ya se dei blong Jeova i longwe yet, mo hemia i putum laef blong olgeta long bigfala denja. Jeova i givim woning long olgeta se: “Dei ya . . . i kam klosap finis. I no longtaem, bambae i kamtru.” (Sefanaea 1:14) Wan narafala ‘bigfala dei blong God’ i kamtru long Babilon long yia 539 B.K.T. (Aesea 13:1, 6) Ol man Babilon oli no lesin long woning we ol profet blong Jeova oli givim, oli sua se stonwol blong taon ya mo ol god blong olgeta bambae oli protektem olgeta. Be long wan naet nomo, ol soldia blong Media mo Pesia oli winim strong taon ya Babilon.

?Wanem i stap fored long yumi tede? Hemia wan narafala ‘Dei blong God’ we i bigwan moa, from we bambae i kasem olgeta man long wol. (2 Pita 3:11-14) God i talemaot finis se bambae hem i jajem “Bigfala Babilon.” Folem tok blong Revelesen 14:8 enjel i talem se: “Bigfala Babilon i foldaon finis.” Yes, samting ya i hapen finis. Bigfala Babilon i no moa save blokem ol man blong wosipim Jeova. Ol man oli luk finis ol kruked fasin blong Bigfala Babilon mo olsem wanem hem i stap joen long ol faet. Naoia, en blong hem i klosap nomo. From samting ya Baebol i talem long ol man long evri ples se: “Yufala i kamaot long hem [Bigfala Babilon]. I nogud yufala i stap joen wetem hem long ol sin ya we hem i stap mekem, mo i nogud we bambae yufala i joen wetem hem blong kasem panis wetem hem. Ol sin ya blong hem i stap hivap i go kasem heven, mo God i stap tingbaot ol rabis fasin blong hem.”—Revelesen 18:4, 5.

?Wanem ya Bigfala Babilon? Hemia olgeta skul blong wol we oli gat sem fasin olsem Babilon bifo. (Revelesen japta 17, 18) Tingbaot sam long ol fasin ya.

• Ol pris long Babilon bifo oli joen bigwan long politik blong kantri blong olgeta. Tede tu, plante skul oli joen long politik.

• Plante pris blong Babilon bifo oli talem ol tok we i soem se oli agri long faet we kantri blong olgeta i stap mekem. Plante skul tede tu oli faswan blong blesem ol soldia blong ol kantri we oli go blong faet.

• Ol tijing mo fasin blong Babilon bifo, i lidim ol man blong hem blong mekem plante rabis fasin long saed blong seks. From we ol lida blong skul tede oli sakemaot ol rul blong Baebol long saed blong gudfala fasin, fulap long olgeta mo ol man long skul blong olgeta oli mekem rabis fasin long saed blong seks. Yumi makem tu we Revelesen i talem se Bigfala Babilon i olsem wan woman blong rod. Hemia from we taem Bigfala Babilon i joen long ol fasin blong wol mo politik, hem i mekem fasin olsem woman blong rod.

• Baebol i talem tu se fasin blong Bigfala Babilon, hemia se i “wantem evri samting.” Long Babilon bifo, jos i pem plante graon, mo ol pris oli kam ol bigfala bisnesman. Tede tu, Bigfala Babilon i gat plante joshaos, wetem plante narafala bisnes blong winim mane. Ol tijing mo ol lafet blong Bigfala Babilon oli karem bigfala mane i kam long hem bakegen, mo long ol narafala bisnesman tu.

• Long Babilon bifo, i gat plante aedol, majik, mo wok blong kleva. Tede tu i gat ol samting ya long plante ples. Ol man long olfala Babilon oli bin ting se taem man i ded, hem i pas i go long wan narafala laef. Taon ya i fulap long ol tempol mo jos, blong ol man Babilon oli save mekem wosip long ol god blong olgeta, be oli agensem wosip blong Jeova. Bigfala Babilon tu i gat semkaen bilif mo wosip.

Long taem bifo, Jeova i pulum ol kantri we oli gat paoa mo we ami blong olgeta i strong, blong oli panisim ol man we oli gohed blong agensem hem mo we oli no mekem samting we hem i wantem. Taswe, long yia 740 B.K.T., ol ami blong Asiria oli spolem Sameria. Long 607 B.K.T. ol ami blong Babilon oli spolem Jerusalem. Mo long 70 K.T.b ol ami blong Rom oli spolem taon ya bakegen. Long yia 539 B.K.T. ol ami blong Media mo Pesia oli winim Babilon. Baebol i talem se long taem blong yumi, ol gavman bambae oli agensem ‘woman blong rod ya,’ olsem we wan wael anamol bambae i kakae hem. Bambae oli tekemaot ol klos blong hem, i min se bambae oli soemaot wanem i rili fasin blong hem. Bambae oli spolem hem olgeta.—Revelesen 17:16.

?Olsem wanem? ?Ol gavman blong wol oli rili save mekem samting ya? Baebol i talem se: “Bambae oli mekem olsem, from we God i putum long tingting blong olgeta.” (Revelesen 17:17) Wantaem nomo samting ya bambae i hapen, ol man bambae oli sapraes, bambae oli seksek. Bambae man i no luksave se samting ya i stap kam, mo bambae i no hapen sloslo.

?Yu yu mas mekem wanem? Traem ansa long kwestin ya: ‘?Mi mi stap joen yet long wan skul we i gat sam tijing no fasin blong Bigfala Babilon?’ Maet yu yu no joen long wan skul, be i gud yet blong askem se: ‘?Ol tingting blong Bigfala Babilon oli gat paoa long mi?’ ?Wanem ol tingting ya? Tingting ya se i oraet nomo sipos samfala oli wantem mekem rabis fasin long saed blong seks, tingting ya blong lavem ol sas samting mo ol pleplei bitim we yu lavem God, no tingting ya se yu no nidim blong obei long olgeta Tok blong Jeova (maet long sam samting we yu ting se oli smol nomo). Tingting gud long ansa we yu givim long ol kwestin ya.

Blong Jeova i glad long yumi, ol wok mo fasin blong yumi, wetem ol samting we yumi wantem long hat blong yumi, oli mas soemaot se yumi no joen nating long Bigfala Babilon. Yumi no mas tektaem blong stretem samting ya. Baebol i givim woning se en blong Bigfala Babilon bambae i kamaot wantaem nomo, i se: “Babilon. Yu yu wan bigfala taon, be . . . [God] bambae i sakemdaon yu, we bambae man i no save luk yu bakegen samtaem.”—Revelesen 18:21.

Be i gat wan moa samting yet we i mas hapen long ‘aoa blong jajem ol man.’ Bambae Jeova God i jajem ol politik paoa blong wol ya wetem ol lida blong olgeta, mo ol man we oli no wantem stret rul blong hem, hemia Kingdom blong hem long heven we i stap long han blong Jisas Kraes. (Revelesen 13:1, 2; 19:19-21) Daniel 2:20-45 i tokbaot wan vison we i olsem wan profet tok. Long vison ya, Daniel i luk wan bigfala aedol we haf blong hem i gol, haf i silva, haf i kopa, haf i aean mo haf i red graon. Aedol ya i pija blong ol politik paoa we oli bin rul, stat long Babilon kam kasem taem blong yumi. Profet tok ya i talem long saed blong taem blong yumi se: “God ya we i stap long heven bambae i stanemap wan king we rul blong hem bambae i no save finis samtaem.” Mo Baebol i tokbaot wanem samting we Kingdom ya bambae i mekem long ‘aoa blong jajem ol man’ i se: “Bambae hem i . . . flatemgud paoa blong ol narafala king [blong wol], nao bambae hem i rul oltaem gogo i no save finis.”—Daniel 2:44.

Baebol i givim woning long ol man we oli wosipim trufala God se oli no mas lavem ‘ol samting blong wol,’ hemia fasin blong laef blong ol man blong wol ya we oli stap longwe long trufala God. (1 Jon 2:15-17) ?Olsem wanem? ?Ol desisen mo fasin blong yu oli soemaot se yu yu stanap long saed blong Kingdom blong God nomo? ?Yu yu rili putum Kingdom ya long fasples long laef blong yu?—Matiu 6:33; Jon 17:16, 17.

[Ol futnot]

[Bokis blong pija long pej 14]

?Bambae En i Kam Wetaem?

“Mi, mi Pikinini blong Man, bambae mi kamtru long taem we yufala i no tingbaot.”—Matiu 24:44.

“Yufala i mas lukaot gud, from we yufala i no save dei blong samting ya mo aoa blong hem.”—Matiu 25:13.

“[Dei ya] i no save let.”—Habakuk 2:3, NW.

[Bokis blong pija long pej 14]

?Bambae Laef Blong Yu i Defren Sipos Yu Save Stret Taem?

?Sipos yu yu save se i gat sam yia i stap yet bifo we God i mekem jajmen blong hem i kamtru, bambae yu yusum laef blong yu long sem fasin we yu stap yusum naoia? Ating longtaem finis, yu bin ting se en blong rabis fasin blong wol ya bambae i kamtru. Be naoia from we i no kamtru kwik, ?yu yu no moa strong blong mekem wok blong Jeova?—Hibrus 10:36-38.

Yumi no save stret taem we en bambae i kam. Hemia i gud, from we i givim janis long yumi blong soemaot se yumi stap mekem wok blong God from stret risen. Olgeta we oli savegud Jeova oli save se bambae Hem i no glad long man we i kam strong long wok blong Hem long las minit nomo. Jeova i stap lukluk wanem we i stap long hat blong man.—Jeremaea 17:10; Hibrus 4:13.

Ol man we oli lavem Jeova tru, oltaem oli putum hem i stap long fasples long laef blong olgeta. Ol trufala Kristin oli mas wok blong winim mane olsem ol narafala. Be oli no traehad blong kam rijman. Oli wantem nomo blong kasem wanem we oli nidim blong laef, wetem smol samting blong serem long ol narafala. (Efesas 4:28; 1 Timoti 6:7-12) Oli haremgud tu blong spel mo pleplei. Be oli mekem olsem blong givim spel long tingting blong olgeta mo blong kasem paoa bakegen, i no blong folem fasin blong laef blong ol narafala man raonabaot long olgeta. (Mak 6:31; Rom 12:2) Olsem Jisas Kraes, oli glad tumas blong mekem samting we God i wantem.—Ol Sam 37:4; 40:8.

Ol trufala Kristin oli wantem laef olwe mo mekem wok blong Jeova gogo i no save finis. Maet oli mas wet longtaem moa blong kasem blesing ya i bitim we sam long olgeta oli bin tingting fastaem. Be janis blong kasem blesing ya i stap yet olsem wan sas samting long tingting blong olgeta.

[Bokis/Foto blong pija long pej 15]

?Rul Blong Hu i Moagud?

Blong save from wanem God i letem ol man oli safa, yumi mas kasem save long wan bigfala kwestin we i stanap longtaem finis, hemia se: ?Rul blong hu i moagud?

From we Jeova i wokem olgeta samting, hem i gat raet blong rul antap long wol ya mo ol man blong hem. Be Baebol i talem se long taem blong faswan man mo woman, i gat wan kwestin i stanap long saed blong rul blong Jeova. Setan i talem se loa blong Jeova i strong tumas, mo se God i giaman long faswan papa mama blong yumi taem hem i talem long tufala se bambae tufala i ded sipos tufala i no obei long loa blong hem be tufala i folem prapa tingting blong tufala. Mo Setan i talem tu se i moagud we tufala i no dipen long God, tufala nomo i mas bos long tufala.—Jenesis japta 2 mo 3.

Sipos God i bin spolem ol stronghed ya wantaem nomo, bambae hem i soemaot se hem i gat paoa. Be samting ya i no save givim ansa long kwestin ya we i kamaot. Taswe, Jeova i no kilim olgeta i ded long taem ya. Hem i letem ol enjel mo ol man oli luk wanem frut i kamaot from fasin stronghed blong olgeta. I tru, samting ya i mekem we man i safa. Be tingbaot: ?Sipos God i bin spolem olgeta wantaem nomo, olsem wanem long yu? Yes, bambae yu no laef nating.

Mo tu, from we Jeova i lavem ol man, hem i rere blong lego pikinini blong hem i kamdaon long wol blong mekem rod blong ol man we oli obei long hem mo bilif long sakrefaes blong Jisas oli save kamfri long sin mo ol nogud frut blong hem, mo oli save laef long Paradaes. Maet samfala we oli ded finis, oli mas laef bakegen blong kasem ol blesing ya.

From we God i letem taem i pas blong kwestin ya i kasem ansa blong hem, i gat wan narafala gudfala samting i kamaot. Ol man blong God oli gat janis blong soemaot se oli gat tangkiu from lav blong God, mo blong soem se oli naf blong stanap strong long saed blong hem long taem blong trabol mo traem. I impoten we kwestin ya long saed blong rul blong God mo fasin blong ol man blong holemstrong long hem, i kasem ansa blong hem. Olsem nao, olgeta samting long heven mo wol bambae oli gat respek long ol loa blong God. Sipos oli no gat respek olsem, i no save gat trufala pis.

[Foto]

Olgeta politik paoa blong wol bambae oli finis