Niufala Wol We God i Promes Blong Mekem
TOK blong God Baebol, i leftemap tingting blong yumi bigwan taem i talem se: “Stret long promes we God i mekem finis, yumi stap wet long niufala heven mo niufala wol, we stret fasin nomo bambae i stap long hem.”—2 Pita 3:13, NW.
?Wanem ya “niufala heven”? Baebol i joenem heven wetem fasin blong rul. (Ol Wok 7:49) Ale, “niufala heven” hemia wan niufala gavman we bambae i rul antap long wol ya. Hem i niu from we bambae i tekem ples blong ol gavman we oli stap rul tede. Mo tu, hem i wan niufala samting we God i wokem blong mekem se plan blong hem i save kamtru sloslo. Hemia nao Kingdom we Jisas i tijim yumi blong prea from. (Matiu 6:10) God nao i wokem gavman ya, mo God i stap long heven, taswe Baebol i kolem gavman ya se “kingdom blong heven.”—Matiu 7:21, NW.
?Wanem ya “niufala wol”? Hemia i no min se graon we yumi stap long hem bambae i jenis, nogat. Baebol i talem klia se bambae i gat ol man oli stap long graon ya gogo i no save finis. “Niufala wol” hemia wan niufala grup blong man. Hem i niu from we God bambae i spolem ol rabis man we oli stap fastaem. (Ol Proveb 2:21, 22) Olgeta man we oli laef long niufala wol, bambae oli ona mo obei long God we i wokem olgeta, mo bambae oli folem ol loa blong hem. (Ol Sam 22:27) Tok i stap goaot long ol man long olgeta kantri blong pulum olgeta blong kasem save long ol loa blong God mo folem olgeta. ?Olsem wanem? ?Yu yu stap mekem olsemia?
Long niufala wol, olgeta man evriwan bambae oli respektem rul blong God. ?Lav we yu yu gat long God i pulum yu blong obei long hem? (1 Jon 5:3) ?Yu yu soemaot klia se yu obei long God taem yu stap long haos, long wok, long skul, mo long fasin blong yu blong yusum laef blong yu?
Long niufala wol, olgeta man bambae oli joengud long wosip blong trufala God. ?Yu yu stap mekem wosip long God ya we i wokem heven mo wol? ?Wosip blong yu i mekem se yu joengud wetem ol man long skul blong yu we oli blong narafala kantri, kala, mo lanwis?—Ol Sam 86:9, 10; Aesea 2:2-4; Sefanaea 3:9.
[Bokis blong pija long pej 17]
God Ya We i Promes Blong Mekem Ol Samting Ya
God ya, hem i God we i Wokem heven mo wol. Hem nao we Jisas Kraes i talem se ‘hem nomo i tru God.’—Jon 17:3.
Bighaf blong ol man oli ona long ol god we olgeta nomo oli wokem. Plante milian man oli stap bodaon long ol aedol we oli no laef nating. Plante narafala man oli ona long ol grup we oli mekem spesel wok long wol, no oli leftemap ol waes blong man we i no stanap long Baebol nating, no oli ronem ol samting we olgeta nomo oli wantem. Olgeta we oli talem se wosip blong olgeta i stanap long Baebol, plante long olgeta tu oli no respektem nem blong God ya we Baebol i talem se “hem nomo i God.”—Dutronome 4:35.
God ya we i Wokem olgeta samting, i tokbaot hem wan i se: “Mi mi Jeova. Hemia nem blong mi.” (Aesea 42:5, 8, NW) Nem ya i stap samwe long 7,000 taem long ol Baebol blong bifo. Jisas Kraes i tijim ol man blong hem blong prea olsem: “Papa blong mifala long heven, nem blong yu i tabu.”—Matiu 6:9.
?Wanem ol fasin blong trufala God? Hem wan i talem se: “Oltaem mi gat sore long man, mo mi stap givhan long man long gladhat blong mi. Mi mi no save kros kwik. Oltaem mi stap lavem man mo oltaem mi stap holemstrong promes blong mi.” Long saed blong olgeta we oli wantem nomo blong gohed blong brekem loa blong hem, hem i talem se hem i no save letem olgeta oli fri long panis. (Eksodas 34:6, 7) Histri blong ol samting we i hapen long ol yia bifo i soemaot se God i gat ol fasin ya.
Ol man oli mas luksave se nem ya Jeova mo God ya we i karem nem ya, tugeta oli tabu. Jeova i wokem olgeta samting mo hem i King blong heven mo wol, taswe i stret nomo we yumi obei long hem mo wosipim hem nomo. ?Olsem wanem? ?Yu yu mekem olsemia?
[Bokis/Foto blong pija long pej 18]
?“Niufala Heven Mo Niufala Wol” Bambae i Mekem Wanem Jenis i Kamaot?
Wol bambae i kam Paradaes Luk 23:43
Ol man blong olgeta kantri, kala, Jon 13:35;
mo lanwis, bambae oli joengud from Revelesen 7:9, 10
we oli lavlavem olgeta
Bambae i gat pis long fulwol, Ol Sam 37:10, 11;
mo olgeta man oli rili sef Maeka 4:3, 4
Bambae ol man oli gat wok Aesea 25:6;
we oli haremgud long hem, 65:17, 21-23
mo bambae i gat plante kakae
Bambae i no moa gat sik, Aesea 25:8;
soasore, mo ded Revelesen 21:1, 4
Olgeta man blong wol bambae oli Revelesen 15:3, 4
joengud long wosip blong trufala God
[Bokis/Foto blong pija long pej 19]
?Bambae Yu Yu Kasem Ol Blesing Ya?
!God i no save giaman!—Taetas 1:2.
Jeova i talem se: “Tok blong mi bambae . . . i mekem olgeta samting we mi mi mekem plan se i mas mekem, we i no mestem wan long olgeta, bambae hem i mekem evri samting we mi mi sanem hem blong i mekem.”—Aesea 55:11.
Jeova i stat finis blong wokem “niufala heven mo niufala wol.” Gavman blong hem i stap wok finis long heven. Mo fandesen blong “niufala wol” i stap finis.
Revelesen i tokbaot ol nambawan blesing we “niufala heven mo niufala wol” bambae i karem long ol man. Biaen Revelesen i talemaot tok blong God ya we i King blong heven mo wol se: “!Yu luk! Mi mi stap mekem olgeta samting oli kam niuwan bakegen.” Mo tu, hem i talem se: “Yu raetem tok ya, from we tok blong mi i tru, mo ol man oli save bilif long hem.”—Revelesen 21:1, 5.
Kwestin we i impoten tumas se: ?Yumi wanwan i stap jenisim ol fasin we yumi mas jenisim blong yumi naf blong stap long “niufala wol” ya aninit long “niufala heven”?