!Klosap Nao Fasin Safa Bambae i Finis!

Ating samtaem yu yu askem long yu wan se, ‘?From wanem i gat fasin safa?’ Plante taosen yia finis, ol man long wol ya oli safa bigwan from ol faet, fasin pua, ol disasta, raf fasin, fasin blong no mekem i stret long narafala, ol sik, mo ded. Long handred yia we i jes pas, ol man long wol oli safa moa i bitim ol narafala taem bifo. ?Bambae fasin safa i finis samtaem?

!Yumi glad blong harem se, yes fasin safa bambae i finis, mo samting ya bambae i hapen i no longtaem! Tok blong God, Baebol, i talem se: “Ol man nogud [bambae] oli lus. . . . Ol man we tingting blong olgeta i stap daon, bambae oli tekem graon ya i blong olgeta. Nao bambae oli harem gud, from we oli stap gud, mo oli gat plante samting.” ?Ol man ya bambae oli stap long graon ya gogo kasem wetaem? “Ol stret man ya bambae oli tekem graon ya i blong olgeta, mo bambae oli stap long hem gogo i no save finis.”​—Ol Sam 37:​10, 11, 29.

Wol ya bambae i jenis i kam wan paradaes, afta we God i karemaot ol man nogud. Nao, ol man bambae oli laef olwe, bambae oli save glad oltaem mo gat gudfala helt. Tok blong God i talem se: “[God] bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.”​—Revelesen 21:4.

Long niufala wol ya, ol man we oli ded bambae oli laef bakegen blong haremgud long ol gudfala laef ya: “God bambae i mekem olgeta man we oli ded oli laef bakegen, ol man we oli stret, wetem ol man we oli no stret.” (Ol Wok 24:15) Taswe, Jisas Kraes i save talem long rabis man ya we i bilif mo i tanem tingting blong hem from sin blong hem, se: “Yu bambae yu stap wetem mi long Paradaes.”​—Luk 23:43.

?From Wanem Fasin Safa i Stat?

God i promes long ol man se bambae oli save gat wan nambawan fiuja. ?Be, from wanem hem i letem fasin safa i stat mo from wanem fasin safa i stap longtaem?

Taem God i wokem Adam mo Iv, Hem i wokem tufala wetem tingting mo bodi we i stretgud olgeta. Hem i putum tufala long wan garen we i paradaes mo i givim wok long tufala, we i mekem tufala i haremgud. Baebol i talem se: ‘God i luk olgeta samting we hem i wokem finis, mo olgeta wok blong hem i gud tumas.’ (Jenesis 1:31) Sipos oli bin obei long God, bambae oli gat ol pikinini we oli stretgud olgeta, mo fulwol bambae i kam wan paradaes. Mo bambae ol man oli save glad blong laef foreva long pis.

Taem God i wokem Adam mo Iv, hem i mekem we tufala i fri blong jusum wanem we tufala i wantem. Hemia wan nambawan presen we hem i givim. Hem i no wokem tufala olsem ol mesin. Be, blong gohed blong haremgud olwe, tufala i mas yusum fasin fri ya long rod we i stret​—tufala i mas obei long ol loa blong God. Olsem God i talem: “Mi mi Hae God, mi God blong yufala. Mi nao mi stap tijim yufala blong givhan long yufala, mo mi stap lidim yufala long ol rod we i stret blong yufala i folem.” (Aesea 48:17) God i wokem ol man blong oli dipen long hem blong haremgud. Taswe ol man bambae oli kasem trabol sipos oli yusum fasin fri ya long rod we i no stret. Baebol i talem se: “Mi mi save we i no gat man i save wanem samting bambae i kamtru long laef blong hem, mo we i no gat man i save kam bos long laef blong hem.”​—Jeremaea 10:23.

Sore tumas, faswan papa mama blong yumi, tufala i ting se tufala i save haremgud nating se tufala i lego God. Be, taem tufala i sakemaot rul blong God, tufala i lusum laef ya we i stretgud olgeta, we God nomo i save givim. Taswe laef blong tufala i kam nogud, sloslo tufala i kam olfala mo tufala i ded. Ale, from we yumi ol pikinini blong tufala, taem yumi bon yumi gat sin finis mo biaen yumi ded tu.​—Rom 5:12.

Bigfala Kwestin​—?Hu i Gat Raet Blong Rul?

?From wanem God i no karemaot Adam mo Iv mo wokem narafala man mo woman bakegen? From we tufala i agensem raet ya we God i gat blong rulum heven mo wol. Kwestin we i stap se, ?Hu i gat raet blong rul mo rul blong hu i stret? Mo tu, ?Ol man bambae oli haremgud moa long laef sipos God i no rulum olgeta? Taem God i letem inaf taem i pas blong ol man oli fri blong mekem wanem we oli wantem, samting ya bambae i pruvum sipos man i haremgud taem hem i rulum hem wan no sipos i nidim rul blong God. God i givim inaf taem long ol man blong oli traem ol defdefren rod blong rul mo olkaen fasin blong laef, hem i givim inaf taem blong oli wokem sam rod blong givim samting we wanwan komuniti i nidim blong laef, mo blong oli wokem prapa skul blong olgeta, we oli no nidim God.

?Wanem frut i kamaot from? Ol taosen yia blong laef blong man, i pruvum se ol man oli bin safa bigwan. Long handred yia we i jes pas, ol man oli safa bigwan moa. Long Wol Wo Tu, plante milian man oli ded. Bitim 100 milian man oli ded long ol narafala faet. Fasin blong brekem loa mo raf fasin i kam antap. Fasin blong yusum drag i kasem plante ples long wol kwiktaem nomo. Ol sik we oli kamaot from doti fasin long saed blong seks i gohed blong kam antap. Famle laef mo ol gudfala fasin i stap godaon long evri ples. Ol gavman blong man oli no save stretem ol trabol ya. I no gat wan gavman nating we naf blong blokem ol sik, ded, mo fasin blong kam olfala.

Baebol i talem finis se ol samting ya bambae i kamaot long taem blong yumi. Tok blong God i soem se yumi laef long “taem blong ol las dei” blong rabis wol ya, mo hem i se laef long taem ya “bambae i strong tumas, bambae i had blong winim ol trabol.” Mo olsem Baebol i talem finis se, “ol rabis man mo ol man blong giaman, bambae oli kam moa nogud yet.”​—2 Timoti 3:1-5, 13, New World Translation.

Fasin Safa Bambae i Finis i No Longtaem

Olgeta pruf oli soemaot se klosap nao ol rabis fasin mo fasin safa, bambae i finis. Ol trabol we oli kamaot taem man i stap independen long God, oli soemaot klia se man i no save harem gud long laef sipos hem i rulum hem wan. Rul blong God nomo i save mekem man i glad, i gat pis, i gat gudfala helt, mo i gat laef blong olwe. Klosap nao, bambae Jeova i no moa letem man i rul mo bambae hem i finisim ol rabis fasin mo fasin safa. I no longtaem, bambae God i stretem ol samting long laef blong ol man, taem hem i spolem fulwan rabis fasin blong laef long wol ya we i no karem gudfala frut nating.

Profet tok blong Baebol i talem se: “Long taem blong ol king ya [ol gavman blong man tede], God blong heven bambae i stanemap wan kingdom [long heven] we neva i save brokdaon. . . . Bambae hem i smasem mo i finisim olgeta kingdom ya [ol gavman blong man], mo hem nomo bambae i stanap olwe.” (Daniel 2:44, NW ) Stamba tijing we i kamaot long Baebol hemia nao se, hae rul blong God bambae i win tru long Kingdom blong heven. Wan impoten haf blong ol saen ya we Jisas i talem se bambae i kamaot long “ol las dei” hemia se: “Gud nius ya blong Kingdom, bambae ol man oli talemaot long olgeta ples long wol, blong oli witnes long hem long fes blong olgeta man, nao biaen bambae en i save kam.”​—Matiu 24:​14, NW.

?Taem en i kam, hu bambae i sef? Baebol i givim ansa se: “Ol stret man we yu save trastem olgeta, bambae oli save stap gud long ples ya blong yumi. Be ol man nogud we oli stap mekem ol rabis fasin, bambae God i tekemaot olgeta oli gowe long ples ya. Hem bambae i rutumaot olgeta, olsem we man i stap rutumaot ol smosmol tri long garen.” (Ol Proveb 2:21, 22) Ol stret man hemia ol man we oli lanem wanem we Jeova i wantem olgeta blong mekem, nao oli mekem. Jisas Kraes i talem se: “Laef ya [we i no save finis], hem i minim se man i save yu, we yu nomo yu tru God, mo i save mi, se mi, Jisas Kraes, we yu yu sanem mi mi kam. (Jon 17:3) Yes, “wol ya wetem ol samting we ol man blong hem oli wantem, oli stap lus. Be man we i stap mekem ol samting we God i wantem, hem bambae i no save lus samtaem.”​—1 Jon 2:17.

Mifala i yusum Baebol Long Bislama. Taem mifala i yusum wan narafala Baebol, mifala i raetem nem blong hem tu.