HAF 15
?Yu Mas Gohed Blong Stadi Baebol Blong Wanem?
1. ?Baebol stadi bambae i givhan long yu olsem wanem?
Ating ol stamba tijing blong Baebol we yumi tokbaot finis oli mekem se yu lavem Jehova moa. Be yu mas wok strong blong mekem lav ya i kam bigwan moa. (1 Pita 2:2) Sipos yu wantem kasem laef we i no save finis, yu mas gohed blong stadi Baebol nao bambae yu fren moa wetem God.—Ridim Jon 17:3; Jud 21.
Taem yu kasem save moa long God, bambae bilif blong yu i kam strong moa. Yu mas gat bilif, olsem nao yu save mekem God i glad. (Hibrus 11:1, 6) Bilif bambae i pulum yu blong yu tanem tingting from ol sin blong yu, nao bambae yu jenisim laef blong yu.—Ridim Ol Wok 3:19.
2. ?Ol save we yu kasem, bambae yu yusum olsem wanem?
Yu save kam wan spesel fren blong Jehova
Ol samting we yu lanem, bambae yu wantem talemaot long ol narafala. Yumi evriwan i glad blong serem gud nius. Taem yu gohed blong stadi, bambae yu kam gud moa blong yusum Baebol. Nao bambae yu save eksplenem gud nius mo bilif blong yu long narafala.—Ridim Rom 10:13-15.
Maet yu yu wantem talemaot gud nius fastaem long ol fren mo famle blong yu, olsem plante man oli mekem. Be yu mas toktok kaen. I nogud yu talem stret long olgeta se skul blong olgeta i giaman. I moagud yu tokbaot ol promes blong God. Mo tu, yu mas tingbaot se kaen fasin blong yu i save gat moa paoa long narafala, i bitim ol tok blong yu.—Ridim 2 Timoti 2:24, 25.
3. ?Yu yu save kam wan spesel fren blong God?
Taem yu gohed blong stadi Baebol, bambae yu fren moa wetem God. Yu kam wan spesel fren blong God taem yu givim laef blong yu i go long hem. Yu yu save kam wan famle blong hem.—Ridim 2 Korin 6:18.
4. ?Yu mas mekem wanem blong gohed gud?
Sipos yu gohed blong stadi, bambae yu lanem blong folem ol stamba trutok blong Baebol long laef blong yu. (Hibrus 5:13, 14) Yu save askem long wan Witnes blong Jehova, blong yutufala i stadi long buk ya ?Wanem Samting We Baebol i Rili Tijim? Taem yu folem moa ol Tok blong God, bambae yu luk se laef blong yu i kam gud moa.—Ridim Ol Sam 1:1-3; Josua 1:8.
Gud nius i kamaot long Jehova, God ya we i stap harem gud oltaem. Yu save fren gud wetem hem sipos yu joen wetem ol man blong hem. (Hibrus 10:24, 25) Taem yu traehad blong mekem Jehova i glad, yu yu stap traehad blong kasem laef ya we i prapawan, hemia laef we i no save finis. I no gat wan samting we i moagud, i bitim we yu fren gud wetem God.—Ridim 1 Timoti 1:11; 6:19.