?Hu i Rili Rulum Wol?

SAMTING WE BAEBOL I TALEM

“Fulwol i stap long paoa blong man ya we i rabis.”—1 Jon 5:19.

“Pikinini blong God i kam . . . blong brekemdaon ol wok blong Devel.” —1 Jon 3:8, Niu Wol Translesen.

?SAVE YA I GIVHAN LONG YU OLSEM WANEM?

Hem i givhan long yu blong kasem save from wanem i gat ol trabol long wol ya.—Revelesen 12:12.

Hem i givhan long yu blong luksave from wanem God nomo bambae i mekem wol ya i kamgud.—1 Jon 2:17.

?YUMI SAVE BILIF LONG SAMTING WE BAEBOL I TALEM?

Yes, from ol risen ya:

• Rul blong Setan i stap go blong lus. Jehova i talem se bambae hem i flatemgud rul blong Setan. Hem i promes blong “finisim Devel.” Mo bambae hem i mekem wol ya i kamgud bakegen.—Hibru 2:14.

• God i jusum Jisas Kraes blong i rul long wol. Rul blong Jisas i defren olgeta long hemia blong Setan. Setan i rul long fasin we hem i tingbaot hem wan nomo, mo hem i mekem i strong tumas long ol man. God i tokbaot rul blong Jisas, long promes ya blong hem se: “Bambae hem i gat sore long man we i no gat nem, mo puaman. . . . Bambae hem i tekemaot olgeta long han blong ol man we oli mekem i strong tumas long olgeta, mo long raf fasin.”—Ol Sam 72:13, 14.

• God i no save giaman. Baebol i talem klia se: “God i neva save giaman.” (Hibru 6:18) Taem Jehova i plan blong mekem wan samting, oltaem samting ya i mas kamtru olsem we hem i talem. (Aesea 55:10, 11) God “bambae i sakemaot rula blong wol ya.”—Jon 12:31.